Go Back

2 Maũndũ ma Matukũ ma Tene Chapter 7

• 1. Na rĩrĩ, Suleimani aarĩkia kũhoya-rĩ, mwaki ũgĩgĩikũrũka uumĩte igũrũ, ũgĩcina ihaki rĩa njino biũ, o na magongona marĩa mangĩ; naguo riri wa Jehova ũkĩiyũra nyũmba ĩo.
• 2. Nao athĩnjĩri-Ngai makĩremwo nĩ gũtonya nyũmba ya Jehova, nĩ gũkorũo riri wa Jehova nĩwaiyũrĩte nyũmba ĩo ya Jehova.
• 3. Nacio ciana cia Isiraeli ciothe ikĩĩrorera mwaki ũcio ũgĩikũrũka, o na riri ũcio wa Jehova wĩ igũrũ rĩa nyũmba ĩo; nao magĩkĩinamĩrĩra magĩturumithia mothiũ thĩ hau haarĩtwo mahiga, makĩhoya Jehova, na makĩmũgatha makiugaga atĩrĩ, Nĩ ũndũ nĩ mwega, nĩ gũkorũo tha ciake iĩũũraga tene na tene.
• 4. Hĩndĩ ĩo mũthamaki o na andũ othe makĩrutĩra igongona mbere ya Jehova.
• 5. Nake Suleimani, ũcio mũthamaki, agĩkĩruta igongona rĩa ndegwa ngiri mĩrongo ĩĩrĩ na igĩrĩ, o na ndũrũme ngiri igana rĩa mĩrongo ĩĩrĩ. Ũguo nĩguo mũthamaki, o na andũ othe, maarugũrĩirie Ngai nyũmba ĩo, makĩmwamũrĩra.
• 6. Nao athĩnjĩri-Ngai makĩrũgama makarute wĩra wao o ũrĩa maatuĩrĩirũo; o nao Alawii makĩrũgama me na inanda ciao iria mũthamaki Daudi aathondekithĩtie cia kũgathaga Jehova nacio, hĩndĩ ĩrĩa aamũgathaga gũkĩinwo ciugo ici: “Nĩ ũndũ tha ciake itũũraga tene na tene;” nao athĩnjĩri-Ngai makĩhuha tũrumbeta marĩ mbere yao; nao Aisiraeli othe magĩikara marũgamĩte.
• 7. O na ningĩ Suleimani akĩamũra kũu gatagatĩ ka nja ĩrĩa ya mwena wa na mbere wa nyũmba ĩo ya Jehova, nĩ ũndũ hau nĩho aarutĩire mahaki ma njino, o na maguta ma magongona ma ũiguano; nĩ gũkorũo kĩgongona gĩa gĩcango kĩrĩa Suleimani aathondekete nĩkĩaagire kũiganĩra ihaki rĩa njino, o na igongona rĩa mũtu, o na maguta.
• 8. Ũguo nĩguo Suleimani aathondekire gĩathĩ kĩu mĩthenya mũgwanja ihinda rĩu, nao Isiraeli othe maarĩ hamwe nake, me kĩrĩndĩ kĩingĩ mũno kĩoimĩte o gwata itonyero-inĩ rĩa Hamathu, nginya o karũũĩ-inĩ ka Misiri.
• 9. Ningĩ mũthenya wa ĩnana makĩgĩa na gĩtũngano kĩngĩ gĩtheru; nĩ ũndũ maaninire mĩthenya mũgwanja makĩamũra kĩgongona; o nakĩo gĩathĩ kĩu kĩaninire mĩthenya mũgwanja.
• 10. Na rĩrĩ, mũthenya wa mĩrongo ĩĩrĩ na ĩtatũ wa mweri wa mũgwanja-rĩ, Suleimani agĩkĩĩra andũ meinũkĩre hema-inĩ ciao makenete, na maiguĩte wega ngoro-inĩ ciao, nĩ ũndũ wa ũtugi ũrĩa Jehova aatugĩte Daudi, na Suleimaniĩ, o na andũ ake Isiraeli.
• 11. Ũguo nĩguo Suleimani aarĩkirie mwako wa nyũmba ya Jehova, o na nyũmba ya mũthamaki; namo mawĩra mothe marĩa Suleimani aacirĩire marutwo kũu nyũmba ya Jehova thĩinĩ, o na nyũmba yake we mwene thĩinĩ-rĩ, agĩkĩmaruta makĩagĩrĩra.
• 12. Ningĩ Jehova akiumĩrĩra Suleimani ũtukũ, akĩmwĩra atĩrĩ, Nĩnjiguĩte ihoya rĩaku, na nĩndĩĩthurĩire handũ haha hatuĩke nyũmba ya kũrutagĩrũo igongona.
• 13. Na rĩrĩ, ingĩhinga matu nĩguo kwage mbura, kana njathe ngigĩ irĩe irio cia bũrũri ũyũ, o na kana ndehithie mũrimũ mũũru thĩinĩ wa andũ akwa-rĩ,
• 14. andũ acio akwa, o acio metanagio na rĩĩtwa rĩakwa, mangĩkenyihia ma’hoe, o na marongorie ũthiũ wakwa, na magarũrũke matigane na mĩthiĩre yao ya waganu; hĩndĩ ĩo nĩngaigua ndĩ o kũu igũrũ, na nĩngohanĩra mehia mao, o naguo bũrũri wao ndĩũhonie.
• 15. Gwata rĩu maitho makwa nĩmekũracũrio, o namo matũ makwa mategerũo ihoya rĩrĩa rĩrĩhoyagĩrũo handũ haha.
• 16. Nĩ gũkorũo rĩu nĩ’thurĩte nyũmba ĩno ngamĩamũra, nĩ getha rĩĩtwa rĩakwa rĩtũũre kuo tene na tene; o namo maitho makwa na ngoro yakwa igũtũũra kuo hingo ciothe.
• 17. Naho ha ũhoro waku-rĩ, ũngĩkorũo nĩũrĩthiaga na mĩthiĩre ĩrĩa nyonaga yerekereire, o ta ũrĩa thoguo Daudi aathiaga nayo, na wĩkage maũndũ mothe o ta ũrĩa ngwathĩte, na ũmenyagĩrĩre irĩra cia watho wakwa wa kũrũmĩrĩrũo, o na matuĩro makwa ma cira-rĩ,
• 18. nĩngatũma ũhoro waku wa gũikarĩra gĩtĩ gĩaku kĩa ũnene ũtũũre ũrũmĩte wega, o ta ũrĩa ndarĩkanĩire na thoguo Daudi, ngiuga atĩ, Wee ndũkaaga mũndũ wa gũtuĩka mwathani thĩinĩ wa Isiraeli.
• 19. No rĩrĩ, mũngĩkagarũrũka mũtige kũnũmĩrĩra, na mũtigane na irĩra cia watho wakwa wa kũrũmĩrĩrũo, o na maathani makwa marĩa ndĩmũigĩire mbere yanyu, mũthiĩ mũgatungatĩre ngai ingĩ, mũciinamĩrĩre mũcihoe;
• 20. hĩndĩ ĩo nĩngamunyanĩria andũ aku na mĩri yao ndĩmarute bũrũri wakwa ũyũ ndĩmaheete; o nayo nyũmba ĩno nyamũrĩte ngamĩtheria nĩguo ĩĩtanio na rĩĩtwa rĩakwa-rĩ, nĩngamĩte, ndige gũcoka kũmĩona, ndũme ĩtuĩke ya kuunagwo thimo, o na ta ũndũ wa kũnyararũo nĩ ndũrĩrĩ ciothe.
• 21. Nayo nyũmba ĩno ndaya mũno na igũrũ ũũ-rĩ, mũhĩtũki o wothe ũrĩa ũkahĩtũkagĩra hakuhĩ nayo nĩ kũmaka akamaka, oige atĩrĩ, Nĩ kĩ gĩgĩtũmĩte Jehova eke bũrũri ũyũ, o na nyũmba ĩno, maũndũ ta maya?
• 22. Nao andũ nĩmagacokia, moige atĩrĩ, Nĩ ũndũ nĩmaatiganire na Jehova, Ngai wa maithe mao, ũrĩa wamarutire bũrũri wa Misiri, na makĩgwatana na ngai ingĩ, na magĩciinamĩrĩra magĩcitungatĩra; ũndũ ũcio nĩguo watũmire amacokererie ũũru ũyũ wothe.

Home