Go Back

2 Maũndũ ma Matukũ ma Tene Chapter 36

• 1. Hĩndĩ ĩo andũ a bũrũri ũcio magĩkĩoya Jehoahazu, mũrũ wa Josia, makĩmũtua mũthamaki wao ithenya rĩa ithe kũu Jerusalemu.
• 2. Nake Jehoahazu aarĩ wa mĩaka mĩrongo ĩĩrĩ na ĩtatũ hĩndĩ ĩrĩa aambĩrĩirie gũthamaka, agĩthamaka mĩeri ĩtatũ kũu Jerusalemu.
• 3. Nake mũthamaki wa Misiri agĩkĩmũtunya ũthamaki wake kũu Jerusalemu, agĩcoka akĩhothithia andũ a bũrũri ũcio mũhothi wa taranda igana cia betha, o na taranda ĩmwe ya thahabu na hinya.
• 4. Ningĩ mũthamaki ũcio wa Misiri agĩtua Eliakimu, mũrũ wa ithe na Jehoahazu, mũthamaki, athamake Juda na Jerusalemu, na akĩmũgarũrĩra rĩĩtwa, akĩmũtua Jehoiakimu. Nake Neko akĩnyita Jehoahazu, mũrũ wa ithe, akĩmũtwara Misiri.
• 5. Nake Jehoiakimu aarĩ wa mĩaka mĩrongo ĩĩrĩ na ĩtano hĩndĩ ĩrĩa aambĩrĩirie gũthamaka; agĩthamaka mĩaka ikũmi na ũmwe kũu Jerusalemu; nake agĩĩka maũndũ marĩa monagwo marĩ moru nĩ Jehova Ngai wake.
• 6. Nake Nebukadinezaru, mũthamaki wa Babuloni, agĩkĩambata akahũrane nake, akĩmuoha na bĩngũ atwarũo Babuloni.
• 7. O na ningĩ Nebukadinezaru agĩkuua indo imwe cia nyũmba ya Jehova, agĩthiĩ nacio Babuloni, agĩciiga nyũmba yake thĩinĩ, kũu Babuloni.
• 8. Na rĩrĩ, ciĩko iria ingĩ cia Jehoiakimu, o na maũndũ ma thahu marĩa ekire, o na maũndũ marĩa mangĩ onirũo namo, atĩrĩrĩ, nĩmaandĩkĩtwo ibuku-inĩ rĩa athamaki a Isiraeli na Juda; nake Jehoiakini, mũrũwe, agĩthamaka ithenya rĩake.
• 9. Nake Jehoiakini aarĩ wa mĩaka ĩnana hĩndĩ ĩrĩa aambĩrĩirie gũthamaka, agĩthamaka mĩeri ĩtatũ na matukũ ikũmi kũu Jerusalemu; nake agĩĩka maũndũ marĩa monagwo marĩ moru nĩ Jehova.
• 10. Na mwaka ũyũ ũngĩ ũgĩũka kwambĩrĩrio-rĩ, Nebukadinezaru, ũcio mũthamaki, akĩrekania, akĩmũtwarithia Babuloni, e hamwe na indo iria njega mũno cia nyũmba ya Jehova, agĩgĩtua Zedekia, mũrũ wa ithe, mũthamaki, athamake kũu Juda na Jerusalemu.
• 11. Na rĩrĩ, Zedekia aarĩ wa mĩaka mĩrongo ĩĩrĩ na ũmwe hĩndĩ ĩrĩa aambĩrĩirie gũthamaka, agĩthamaka mĩaka ikũmi na ũmwe Jerusalemu;
• 12. nake agĩĩka maũndũ marĩa monagwo marĩ moru nĩ Jehova Ngai wake; na ndaigana kwĩnyihĩria Jeremia, ũrĩa mũnabii, rĩrĩa aamũheaga ũhoro wa ndũmĩrĩri ya Jehova.
• 13. O na nĩngĩ akĩrema mũthamaki Nebukadinezaru, akĩrega gũcoka gwathwo nĩwe o na harĩa aamwĩhĩtithĩtie akĩgwetaga Ngai; no rĩrĩ, nĩomirie kĩongo, o na akĩũmia ngoro yake, akĩrega gũcokerera Jehova, Ngai wa Isiraeli.
• 14. O na ningĩ atĩrĩ, anene othe a athĩnjĩri-Ngai, o na andũ arĩa angĩ, nĩmaagararire watho wa Jehova mũno nĩ ũndũ wa gwĩka maũndũ me thahu ma ndũrĩrĩ iria itoĩ Ngai; nao magĩkĩgwatia nyũmba ya Jehova ĩrĩa aamũrĩte kũu Jerusalemu thahu.
• 15. Nake Jehova, Ngai wa maithe mao, akĩmatwarithĩria ũhoro na andũ ake arĩa aarekagia na kĩyo, o marũmanĩria; nĩ ũndũ nĩaaiguagĩra andũ ake tha, o na handũ ha ũtũũro wake;
• 16. no rĩrĩ, nĩmaathekereire andũ acio maarekagio nĩ Ngai, o na makĩmena ndeto iria aamatwarithagĩria nao, o na makĩnyarara anabii ake, magĩgĩtũma matũkũya ma Jehova maarahũke makore andũ ake, o nginya hakĩaga kĩhonia.
• 17. Tondũ ũcio agĩkĩmatwarithĩria mũthamaki wa Akalidei, nake akĩũragĩra aanake ao na hiũ cia njora kũu nyũmba ĩo maatuĩte handũ harĩa haamũre, na ndaigana kũiguĩra mwanake o na kana mũirĩtu tha, o na kana mũndũ mũkũrũ, o na kana ũrĩa ũkũrĩte akahocerera; othe Ngai nĩaamarekereirie akĩmaneana moko-inĩ make.
• 18. O nacio indo ciothe cia nyũmba ya Ngai, iria nene o na iria nyinyi, o na iria cia mĩthithũ-inĩ ya nyũmba ya Jehova, na mĩthithũ-inĩ ya mũthamaki, na ya anene ake; indo icio ciothe-rĩ, nĩaacitwarithirie Babuloni.
• 19. Nao magĩgĩcina nyũmba ya Ngai, o naruo rũthingo rũa Jerusalemu makĩrũtharia, o nacio nyũmba ciakuo ciothe cia ũnene magĩcicina na mwaki, o na makĩananga indo iria ciothe njega ciakuo.
• 20. Nao andũ arĩa maahonokire kũũragwo na hiũ cia njora, akĩmatwarithia Babuloni, magĩtuĩka ndungata ciake we mwene, o na cia ariũ ake, o nginya hĩndĩ ĩrĩa gwacokire gũthamakwo nĩ ũthamaki wa Perisia;
• 21. nĩ getha ũhoro wa Jehova ũrĩa waaririo na kanua ka Jeremia ũhingio, naguo ũguo nĩ ta kuuga o nginya hĩndĩ ĩrĩa bũrũri ũcio wahingirie thabatũ ciaguo; nĩ gũkorũo hĩndĩ ĩrĩa yothe wakorirũo wagĩte andũ, nĩguo watũire ũhurũkĩte ta kwĩ thabatũ, o nginya mĩaka mĩrongo mũgwanja ĩkĩhinga.
• 22. Na rĩrĩ, mwaka wa mbere ũrĩa Kurusu, mũthamaki wa Perisia, aakorirũo athamakĩte-rĩ, Jehova akĩarahũra roho wa Kurusu, ũcio mũthamaki wa Perisia, nĩ getha ũhoro wa Jehova ũrĩa waaririo nĩ Jeremia ũhingio, agĩgĩtũma ahunjanĩrie ũhoro mabũrũri mothe marĩa aathamakaga, o na awandĩke, oige ũũ:
• 23. Atĩrĩrĩ, Kurusu, mũthamaki wa Perisia, oiga ũũ: Jehova, Ngai wa igũrũ, nĩa’heete mabũrũri mothe ma gũkũ thĩ, ndĩmaathage; na nĩanjathĩte ngamwakĩre nyũmba Jerusalemu, itũũra rĩa Juda. Tondũ ũcio, mũndũ o wothe wa andũ ake ũrĩa wĩ thĩinĩ wanyu-rĩ, Jehova Ngai wake aroikara hamwe nake, nake nĩaambate athiĩ kuo.

Home