Go Back

2 Maũndũ ma Matukũ ma Tene Chapter 32

• 1. Na rĩrĩ, maũndũ macio maathira, o macio ekire e mwĩhokeku-rĩ, Senakeribu, mũthamaki wa Ashuri, agĩgĩũka agĩtonya Juda, akĩamba hema ciake ahũrane na matũũra marĩa mairigĩtwo, acirĩire kũmahoota matuĩke make.
• 2. Na rĩrĩ, Hezekia ona atĩ Senakeribu nĩ mũũku, na atĩ acirĩire kũhũrana na Jerusalemu-rĩ,
• 3. agĩciranĩra na anene ake, o na andũ ake arĩa maarĩ njamba, atĩ mathike maĩ ma ithima iria ciarĩ na kũu nja ya itũũra; nao magĩkĩmũteithia gũcithika.
• 4. Tondũ ũcio hagĩkĩũngana andũ aingĩ mũno, nao magĩthika ithima icio ciothe, o na karũũĩ karĩa gaathereragĩra kũu bũrũri ũcio gatagatĩ, makiugaga atĩrĩ, Kaĩ athamaki a Ashuri megũgĩũka gũkũ mone maĩ maingĩ ũũ nĩ ũndũ kĩ?
• 5. Nake akĩĩũmĩrĩria, agĩaka rũthingo ruothe rũrĩa rũatharũkĩte, akĩrũambatia na igũrũ rũkĩiganana na mĩthiringo ĩrĩa ya nyũmba ndaya na igũrũ, o na agĩaka rũthingo rũngĩ na kũu nja, nakuo kũu Milo, itũũra-inĩ rĩa Daudi, agĩgwĩkĩra hinya mũno, o na agĩturithia indo cia mbaara, o na ngo nyingĩ mũno.
• 6. Nao anene a ita akĩmatua arori a andũ, akĩmonganithĩria handũ harĩ kawerũ kĩhingo-inĩ gĩa itũũra, nake akĩmaarĩria na ũhoreri, akĩmera atĩrĩ,
• 7. Gĩai na hinya, na mũũmĩrĩrie; menyai mwĩtigĩre, o na kana mũmake nĩ ũndũ wa mũthamaki wa Ashuri, o na kana ũndũ wa kĩrĩndĩ gĩothe kĩrĩa kĩĩ hamwe nake; nĩ gũkorũo ũrĩa wĩ hamwe na ithuĩ nĩ mũnene mũno gũkĩra arĩa me hamwe nake;
• 8. Senakeribu ũcio-rĩ, nĩ hinya wa andũ ehokete; no rĩrĩ, Jehova Ngai witũ nĩwe wĩ hamwe na ithuĩ atũteithie, na atũhũranĩre mbaara. Nao andũ acio magĩgĩikara mehokete ndeto icio ciaaririo nĩ Hezekia, mũthamaki wa Juda.
• 9. Na rĩrĩ, thutha wa maũndũ macio Senakeribu, mũthamaki wa Ashuri, akĩrekia ndungata ciake Jerusalemu, (nake agĩkorũo aikarĩte ang’etheire Lakishi e hamwe na njamba ciake ciothe cia ita,) akĩrekania he Hezekia, mũthamaki wa Juda, o na harĩ Ajuda othe arĩa maarĩ kũu Jerusalemu, akĩmera atĩrĩ,
• 10. Senakeribu, mũthamaki wa Ashuri, ekũũria atĩrĩ, Nĩ kĩ mwĩhokete hihi, tondũ mũikarĩte o kũu itũũra-inĩ rĩu rĩa Jerusalemu thĩinĩ o nginya hĩndĩ ĩrĩa ndĩrĩrĩrigicĩria ndĩrĩtunyane?
• 11. Githĩ Hezekia rĩrĩa ekuuga atĩ, Jehova Ngai witũ nĩegũtũhonokia atũrute moko-inĩ ma mũthamaki wa Ashuri, ti kũhenereria ekũmũhenereria mũrekererio ng’aragu ĩmũũrage, o na nyota?
• 12. Hezekia o ro ũcio-rĩ, githĩ tiwe weheririe matĩri make ma kũndũ gũtũũgĩru o na igongona ciake, agĩatha Juda na Jerusalemu, akĩmera ũũ: Mũrĩinamagĩrĩra o mbere ya kĩgongona kĩmwe mũkĩhoya Ngai, na mũcinagĩre ũbumba o igũrũ rĩakĩo?
• 13. Kaĩ mũtoĩ ũrĩa niĩ mwene, o na aa baba, twaneka andũ othe a mabũrũri marĩa mangĩ? Kwĩ hĩndĩ ngai cia ndũrĩrĩ iria nyene mabũrũri macio irĩ ciahota kũmahonokia, ikĩmaruta moko-inĩ makwa na njĩra o na ĩrĩkũ?
• 14. Nĩ ngai ĩrĩkũ, thĩinĩ wa ngai ciothe cia ndũrĩrĩ iria aa baba maaninire biũ, ĩrĩ yahota kũhonokia andũ ayo ĩkĩmaruta moko-inĩ makwa, atĩ nĩkĩo mũgwĩciria atĩ Ngai wanyu aahota kũmũhonokia, amũrute moko-inĩ makwa?
• 15. Tondũ ũcio menyai mũreke Hezekia amũhenie, kana amũgucĩrĩrie mwĩtĩkĩre ũndũ ũcio, o na kana mũmwĩtĩkie; nĩ ũndũ-rĩ, gũtirĩ ngai ya rũrĩrĩ o na rũrĩkũ, o na kana ya ũthamaki o na ũrĩkũ, ĩrĩ yahota kũhonokia andũ ayo ĩkĩmaruta moko-inĩ makwa, o na moko-inĩ ma aa baba; kaĩ Ngai wanyu arĩ we ũrĩkĩhota kũmũhonokia amũrute moko-inĩ makwa atĩa?
• 16. Nacio ndungata ciake igĩkĩrĩrĩria kwaria ndeto cia gũcambia Jehova Ngai, o na Hezekia ndungata yake.
• 17. Ningĩ akĩandĩka marũa ma kũmenereria Jehova, Ngai wa Isiraeli, o na kũmũcambia, akiuga atĩrĩ, O ta ũrĩa ngai cia ndũrĩrĩ cia mabũrũri marĩa mangĩ itaahonokirie andũ a cio, imarute moko-inĩ makwa-rĩ, ũguo noguo Ngai wa Hezekia arĩaga kũhonokia andũ ake, amarute moko-inĩ makwa.
• 18. Nao andũ acio makĩanĩrĩra na mũgambo mũnene makĩarĩria andũ a Jerusalemu arĩa maarĩ rũthingo-inĩ igũrũ na mwarĩrie wa Ayahudi, nĩguo mamamakie, na mamanyarire, nĩ getha matunyane itũũra rĩu.
• 19. Nao magĩkĩaria ũhoro wa Ngai wa Jerusalemu, makamũgerekania na ngai iria ingĩ cia ndũrĩrĩ cia gũkũ thĩ, o iria ithondekagwo na moko ma andũ.
• 20. Nake Hezekia, ũcio mũthamaki, o na Isaia, mũnabii, mũrũ wa Amozu, makĩhoya Ngai nĩ ũndũ wa ũhoro ũcio, magĩkaĩra Ũrĩa wĩ igũrũ.
• 21. Nake Jehova agĩkĩrekia mũraika, akĩnina njamba iria irĩ hinya ciothe, o na atongoria na anene a ita, kũu kĩraaro-inĩ kĩa mũthamaki wa Ashuri. Na tondũ ũcio Senakeribu agĩcoka bũrũri wake atukĩte gĩthiithi nĩ thoni. Na hĩndĩ ĩrĩa aatonyire nyũmba ya ngai yake, andũ amwe arĩa moimĩte mũthimo wake kĩũmbe makĩmũũragĩra kuo na rũhiũ rũa njora.
• 22. Ũguo nĩguo Jehova aahonokirie Hezekia, o na andũ arĩa maatũũraga Jerusalemu, akĩmaruta moko-inĩ ma Senakeribu, mũthamaki wa Ashuri, o na akĩmaruta moko-inĩ ma thũ iria ingĩ ciao ciothe, nake agĩkĩmagitĩra na ndwere ciothe.
• 23. Nao andũ aingĩ magĩgĩtwarĩra Jehova iheo o kũu Jerusalemu, o nacio indo cia goro magĩcitwarĩra Hezekia, mũthamaki wa Juda; na tondũ ũcio agĩtũũra atĩĩkĩte mũno nĩ andũ a ndũrĩrĩ ciothe gwata hĩndĩ ĩo.
• 24. Na rĩrĩ, matakũ-inĩ o ro macio Hezekia nĩaarũarire agĩtigaria hanini akue nake agĩkĩhoya Jehova; nake Jehova akĩaria nake, akĩmũhe kĩmenyithia.
• 25. No rĩrĩ, Hezekia ndaigana gũcokeria Ngai ngatho nĩ ũndũ wa ũndũ ũcio aamwĩkĩte wa kũmũguna; nĩ gũkorũo nĩetũũgĩririe na ngoro; na tondũ ũcio Jehova agĩkĩmũtũkũyanĩra, we mwene, o na Juda na Jerusalemu.
• 26. No rĩrĩ, Hezekia nĩaacokire kwĩnyihia, agĩtiga mwĩtĩo ũcio wa ngoro yake, we mwene, o na andũ arĩa maatũũraga Jerusalemu, na tondũ ũcio matũkũya macio ma Jehova makĩaga kũmakora matukũ-inĩ ma Hezekia.
• 27. Nake Hezekia aakĩrĩ na ũtonga mũingĩ mũno, o na agatĩĩka; agĩgĩĩthondekera kũndũ gwa kũigwo mũthithũ wa betha, na thahabu, na tũhiga twa goro, o na mahuti marĩa manungaga wega, na ngo, na mĩthemba yothe ya ando iria njega;
• 28. o na agĩakithia makũmbĩ ma gũitwo uumithio wa irio, na ndibei, o na maguta; ningĩ agĩakithia ciugũ cia mĩthemba yothe ya ũhiũ, o na icegũ cia mbũri.
• 29. O na ningĩ agĩĩthurĩra matũũra mamwe matuĩke make, o na akĩgĩa na ndũru nyingĩ mũno cia mbũri na ng’ombe; nĩ gũkorũo Ngai nĩaamũheete indo nyingĩ mũno.
• 30. Ningĩ Hezekia o ro ũcio nĩwe wahingĩrĩirie gĩthima kĩa rũgongo igũrũ kĩa maĩ ma Gihoni agĩtũma matherere makinye o mũhuro mwena wa ithũĩro wa itũũra rĩa Daudi. Nake Hezekia agĩgĩikara agaacĩire mawĩra-inĩ make mothe marĩa aarutaga.
• 31. No rĩrĩ, ha ũhoro ũkoniĩ andũ arĩa maareketio nĩ anene a Babuloni, o acio maareketio kũrĩ we magatuĩrie ũhoro wa maũndũ ma kũgegania marĩa mekĩtwo kũu bũrũri wake-rĩ, Ngai nĩaamwehereire nĩguo amũgerie, amenye maũndũ mothe marĩa marĩ ngoro-inĩ yake.
• 32. Na rĩrĩ, ciĩko iria ingĩ cia Hezekia, o na maũndũ mega marĩa ekire, atĩrĩrĩ, nĩ maandĩke ibuku-inĩ rĩa athamaki a Juda na Isiraeli, o hau haandĩkĩtwo mohoro marĩa mũnabii ti Isaia wa Amozu onirio na kĩoneki.
• 33. Nake Hezekia agĩkoma hamwe na maithe, nao andũ makĩmũthika ihaicĩro-inĩ rĩa mbĩrĩra-inĩ cia ariũ a Daudi; nao Ajuda othe, o na andũ othe arĩa maatũũraga Jerusalemu, magĩĩka maũndũ ma kuonania ũrĩa mamũtĩĩte hĩndĩ ĩo aakuire. Nake Manase, mũrũwe, agĩgĩthamaka ithenya rĩake.

Home