Go Back

2 Maũndũ ma Matukũ ma Tene Chapter 29

• 1. Na rĩrĩ, Hezekia aambĩrĩirie gũthamaka e wa mĩaka mĩrongo ĩĩrĩ na ĩtano; agĩthamaka mĩaka mĩrongo ĩĩrĩ na kenda kũu Jerusalemu; nake nyina etagwo Abija, mwarĩ wa Zekaria.
• 2. Nake agĩgĩĩka maũndũ marĩa monagwo marĩ mega nĩ Jehova, o ta ũrĩa maũndũ mothe marĩa ithe Daudi ekĩte maatariĩ.
• 3. Naguo mwaka wa mbere ũrĩa aakorirũo athamakĩte, o mweri wa mbere, akĩhingũra mĩrango ya nyũmba ya Jehova, akĩmĩcokereria harĩa yathũkangĩte.
• 4. Nake akĩrehithie athĩnjĩri-Ngai o na Alawii hau, akĩmonganĩria handũ haariĩ haarĩ mwena wa irathĩro,
• 5. agĩkĩmera atĩrĩ, Ta njiguai, inyuĩ Alawii aya; rĩu thiĩi mwĩamũre, o nayo nyũmba ya Jehova, Ngai wa maithe manyu, mũmĩamũre mũmĩtherie, na mũrute na nja gĩko kĩrĩa kĩũru kĩrĩ handũ hau haamũre.
• 6. Nĩ ũndũ maithe maitũ nĩmaagararire watho wa Jehova Ngai witũ, magĩĩka maũndũ marĩa monagwo marĩ moru nĩwe, na nĩmamũtigĩte makamũhutatĩria mothiũ mao, magatiga kũrũmbũiya gĩikaro kĩa Jehova, magakĩhutatĩra;
• 7. o na ningĩ makahinga mĩrango ya gĩthaku, o na makahoria matawa, o na makarega gũcina ũbumba, kana kũrutĩra Ngai wa Isiraeli mahaki ma njino handũ harĩa haamũre.
• 8. Na tondũ ũcio matũkũya ma Jehova magĩkora Juda na Jerusalemu, na nĩaamarekereirie akamaneana manyarirũo, na matuĩke ta ũndũ wa kũgegania, o na wa gũtũma andũ moige Hĩ-ĩ-ĩ! o ta ũũ mũreyonera na maitho manyu.
• 9. Nĩ ũndũ-rĩ, aa baba nĩ kũgũa magũĩte moragĩtwo na hiũ cia njora, o nao ariũ aitũ na airĩtu, o na atumia aitũ, nĩ gũtahwo matahĩtwo nĩ ũndũ wa maũndũ macio.
• 10. Na rĩu ndĩĩcirĩtie na ngoro yakwa atĩ nĩtũkũrĩkanĩra na Jehova, Ngai wa Isiraeli, nĩ getha atũthengerie marakara macio make manene.
• 11. Atĩrĩrĩ, ariũ akwa, tigai thieya; nĩ gũkorũo Jehova nĩamũthurĩte inyuĩ nĩ getha mũrũgamage mbere yake mũmũtungatagĩre, mũtuĩke amũtungatĩri, na mũmũcinagĩre ũbumba.
• 12. Hĩndĩ ĩo Alawii magĩkĩarahũka; nao nĩ Mahathu wa Amasai, na Joeli wa Azaria, thĩinĩ wa ariũ a Akohathu; ningĩ thĩinĩ wa ariũ a Merari nĩ Kishu wa Abadi, na Azaria wa Jehaleleli; o na thĩinĩ wa Agerishoni nĩ Joa wa Zima, na Edeni wa Joa;
• 13. ningĩ thĩinĩ wa ariũ a Elizafani nĩ Shimuri na Jeueli; o na thĩinĩ wa ariũ a Asafu nĩ Zekaria na Matania;
• 14. ningĩ thĩinĩ wa ariũ a Hemani nĩ Jehueli na Shimei; o na thĩinĩ wa ariũ a Jeduthuni nĩ Shemaia na Uzieli.
• 15. Nao magĩkĩũngania ariũ a ithe wao, makĩĩamũra magĩĩtheria, magĩtonya nyũmba ya Jehova, o ta ũrĩa maathĩtwo nĩ mũthamaki na ũndũ wa ũhoro wa Jehova, nĩguo matherie nyũmba ĩo ya Jehova.
• 16. Nao athĩnjĩri-Ngai magĩtonya handũ harĩa he thĩinĩ mũno ha nyũmba ya Jehova, nĩguo makahatherie, na makĩruta na nja indo iria monire irĩ gĩko kũu hekarũ-inĩ ya Jehova magĩciiga nja ya nyũmba ĩo ya Jehova. Nao Alawii magĩcikuua, magĩcitwara na kũu karũũĩ-inĩ ga Kidironi.
• 17. Naguo mũthenya wa mbere wa mweri wa mbere nĩguo maambĩrĩirie wĩra ũcio wa gũtheria nyũmba ĩo, ningĩ mũthenya wa ĩnana wa mweri ũcio magĩkinya gĩthaku-inĩ kĩa Jehova; magĩkĩnina mĩthenya ĩnana makĩamũra nyũmba ĩo ya Jehova mamĩtherie; naguo mũthenya wa ikũmi na ĩtandatũ wa mweri ũcio wa mbere makĩrĩkia wĩra ũcio.
• 18. Thutha wa ũguo magĩtonya he mũthamaki, Hezekia, o kũu nyũmba ya mũthamaki thĩinĩ, makĩmwĩra atĩrĩ, Nĩtwatheria nyũmba ya Jehova, o na kĩgongona kĩa mahaki ma njino, o na indo ciakĩo ciothe, o na metha ya mĩgate ĩrĩa ĩigagwo mbere ya Jehova, na indo ciayo ciothe.
• 19. O nacio indo ciothe iria Ahazu, mũthamaki, aateire rĩrĩa aathamakaga, hĩndĩ ĩo aagararire watho-rĩ, nĩtwacihaarĩria, na twaciamũra twacitheria; na atĩrĩrĩ, rĩu irĩ mbere ya kĩgongona kĩa Jehova.
• 20. Hĩndĩ ĩo Hezekia, ũcio mũthamaki, agĩkĩroka gũũkĩra rũcinĩ tene, akĩũnganithia anene a itũũra, nao makĩambata magĩkinya nyũmba ya Jehova.
• 21. Thutha wa ũguo magĩtwara ndegwa mũgwanja, na ndũrũme mũgwanja, o na tũtũrũme mũgwanja, o na thenge mũgwanja, ituĩke igongona rĩa mehia rĩkoniĩ ũthamaki, na rĩkoniĩ handũ harĩa haamũre, o na rĩkoniĩ Juda. Nake agĩgĩatha athĩnjĩri-Ngai, ariũ a Haruni, macithĩnjĩre kĩgongona-inĩ kĩa Jehova.
• 22. Magĩgĩthĩnja ndegwa icio, nao athĩnjĩri-Ngai makĩoya thakame, makĩmĩminjaminjĩria kĩgongona; ningĩ magĩthĩnja ndũrũme icio, makĩminjaminja thakame yacio kĩgongona-inĩ igũrũ; o na ningĩ magĩthĩnja tũtũrũme tũu, makĩminjaminja thakame yatuo o kĩgongona-inĩ kĩu igũrũ.
• 23. Nacio thenge magĩcitwaratwarithia hakuhĩ, o hau mbere ya mũthamaki o na kĩrĩndĩ-inĩ kĩu, ituĩke igongona rĩa mehia; nao magĩciigĩrĩra moko;
• 24. nao athĩnjĩri-Ngai magĩcithĩnja, makĩrutĩra igongona rĩa mehia na thakame yacio hau kĩgongona igũrũ, nĩ getha mahoroherie Aisiraeli othe; tondũ mũthamaki aathanĩte atĩ Aisiraeli othe marutĩrũo ihaki rĩa njino, o na igongona rĩa mehia.
• 25. Nake agĩkĩiga Alawii kũu nyũmba ya Jehova me na thani iria ihũrithanagio ikagamba, o na inanda cia kĩnubi, o na inanda iria nene cia mũgeto, o ta ũrĩa gwaathanĩtwo nĩ Daudi, na Gadi, mũndũ ũrĩa wonagĩra mũthamaki maũndũ, o na Nathani ũrĩa mũnabii; nĩ ũndũ Jehova nĩwe waathanĩte ũrĩa gũgwĩkwo akera anabii ake.
• 26. Nao Alawii acio magĩkĩrũgama me na inanda cia Daudi cia kũina nacio, o nao athĩnjĩri-Ngai makĩrũgama manyitĩte tũrumbeta.
• 27. Nake Hezekia agĩathana atĩ ihaki rĩa njino rĩrutĩrũo kĩgongona-inĩ igũrũ. Na rĩrĩ, ihaki rĩa njino rĩakĩgwata kũrutwo, o nacio nyĩmbo cia kũinĩra Jehova ikĩgwata kũinwo, o na gũkĩhuhwo tũrumbeta o na gũkĩhũrũo inanda icio cia Daudi, mũthamaki wa Isiraeli.
• 28. Nakĩo kĩrĩndĩ gĩothe gikiinamĩrĩra gĩkĩhoya Ngai, nao aini makĩina, o nao ahuhi tũrumbeta magĩtũgambia gũkĩrũmanĩria gwĩkwo ũguo o nginya hĩndĩ ĩrĩa ihaki rĩu rĩa njino rĩarĩkirie kũrutwo.
• 29. Na rĩrĩ, maarĩkia kũruta ihaki rĩu rĩa njino, mũthamaki o na andũ othe arĩa maarĩ hamwe nake magĩkĩinamĩrĩra makĩhoya Ngai.
• 30. O na ningĩ makĩria, Hezekia, ũcio mũthamaki, o na anene, magĩatha Alawii maine nyĩmbo cia kũgooca Jehova na ciugo cia Daudi, o na cia Asafu ũrĩa muoni maũndũ. Nao magĩkĩina nyĩmbo icio cia kũmũgooca makenete, ningĩ makĩinamĩrĩria mĩtwe yao makĩhoya Ngai.
• 31. Hĩndĩ ĩo Hezekia agĩgĩcokia akiuga atĩrĩ, Kuona atĩ rĩu nĩmwĩamũrĩire Jehova mũgetheria-rĩ, thengererai hakuhĩ mũrehe indo cia kũrutwo, na cia magongona ma kũgatha Jehova, mũcitware nyũmba yake thĩinĩ. Nakĩo kĩrĩndĩ kĩu gĩgĩtwara indo ciakĩo cia kũrutwo na cia magongona ma gũcokia ngatho; nao andũ othe arĩa maarĩ na ngoro ikwĩendera ũndũ ũcio magĩtwara indo cia mahaki ma njino.
• 32. Naguo mũigana wa indo cia mahaki ma njino iria ciatwarirũo nĩ kĩrĩndĩ kĩu warĩ ndegwa mĩrongo mũgwanja, na ndũrũme igana, na tũtũrũme magana merĩ; icio ciothe-rĩ, ciarutirũo ituĩke cia ihaki rĩa njino rĩa gũcinĩrũo Jehova.
• 33. Nacio indo iria ciaamũrĩirũo Jehova ciarĩ ndegwa magana matandatũ, na mbũri ngiri ithatũ.
• 34. No rĩrĩ, athĩnjĩri-Ngai maarĩ anyinyi mũno, na tondũ ũcio matiigana kũhota gũthĩnja nyamũ icio ciothe cia mahaki ma njino; no nĩmaateithirio nĩ ariũ a ithe wao, o acio Alawii, o nginya hĩndĩ ĩrĩa wĩra ũcio warĩkirio, o nao athĩnjĩri-Ngai magĩkorũo meamũrĩte magetheria; nĩ gũkorũo Alawii nĩo maarĩ na kĩyo gĩa kwĩamũra metherie gũkĩra athĩnjĩri-Ngai.
• 35. O na ningĩ indo cia mahaki ma njino ciarĩ nyingĩ mũno, ii hamwe na maguta ma magongona ma ũiguano, o na ma indo iria irutagwo cia kũnyuwo, o icio irutagwo ikoniĩ mahaki mothe ma njino, ihaki o ihaki. Ũguo nĩguo ũhoro wa gũtungatĩra Jehova nyũmba-inĩ yake wathondekekire wega.
• 36. Nake Hezekia agĩkena me hamwe na andũ ake othe nĩ ũndũ wa maũndũ macio Ngai aamahaarĩirie; nĩ gũkorũo ũndũ ũcio wekirũo na mbũkĩrĩra.

Home