Go Back

2 Maũndũ ma Matukũ ma Tene Chapter 25

• 1. Na rĩrĩ, Amazia aarĩ wa mĩaka mĩrongo ĩĩrĩ na ĩtano rĩrĩa aambĩrĩirie gũthamaka, agĩthamaka mĩaka mĩrongo ĩĩrĩ na kenda Jerusalemu; nake nyina etagwo Jehoadani wa kũu Jerusalemu.
• 2. Nake agĩgĩĩka mũndũ marĩa monagwo maagĩrĩire nĩ Jehova, no ndaamekire agwatĩirie na ngoro yake yothe.
• 3. Na gũgĩkinya atĩrĩ, atĩ hĩndĩ ĩrĩa ũthamaki wake wehandire wega-rĩ, akĩũraga ndungata ciake iria cioragĩte ithe, mũthamaki.
• 4. No rĩrĩ, ciana ciacio ndaigana gũciũraga, no makĩria ekire o ta ũrĩa kwandĩkĩtwo ibuku-inĩ rĩa watho wa Musa, o ta ũrĩa gwathanĩtwo nĩ Jehova, akiuga atĩrĩ, Maithe ma ciana matikanakue nĩ ũndũ wa ciana, o na kana ciana ikue nĩ ũndũ wa maithe; no rĩrĩ, o mũndũ arĩkuaga nĩ ũndũ wa mehia make we mwene.
• 5. O na ningĩ Amazia agĩcokanĩrĩria Ajuda othe hamwe, naguo ũguo nĩ ta kuuga Ajuda othe o na Abenjamini, akĩmaarania o ta ũrĩa nyũmba cia maithe mao ciatariĩ, magĩgĩtuĩka a kũroragwo nĩ anene a andũ ngiri, o na a andũ igana; nake akĩmatara arutĩtie arĩa maakinyĩtie mĩaka mĩrongo ĩĩrĩ na magakĩria hau, agĩkĩona atĩ kwarĩ andũ ngiri magana matatũ arĩa athure na arĩa maahotaga kuumagara mathiĩ ita-inĩ, o na makahota gũthukia itimũ na ngo.
• 6. O na ningĩ akĩandĩka andũ njamba irĩ hinya ngiri igana rĩmwe moimĩte kũu Isiraeli, akĩmahe taranda igana cia betha ituĩke mũcara wao.
• 7. No rĩrĩ, hagĩgĩthiĩ mũndũ wa Ngai harĩ we, akĩmwĩra ũũ: Atĩrĩrĩ, mũthamaki ũyũ, tiga kũreka mbũtũ cia ita cia Isiraeli itwarane nawe; nĩ ũndũ Jehova ndarĩ hamwe na Isiraeli, o ciana icio ciothe cia Efiraimu.
• 8. Na rĩrĩ, ũngĩkorũo nĩũgũthiĩ-rĩ, ĩka maũndũ ma ũcamba, wĩĩkĩre hinya ũhũrane mbaara; tondũ waaga gwĩka ũguo, Ngai nĩegũkũgũithia mbere ya thũ ciaku; nĩ ũndũ Ngai e na hinya wa gũteithania, o na wa kũgũithania.
• 9. Nake Amazia agĩkĩũria mũndũ ũcio wa Ngai atĩrĩ, Taranda icio igana ndĩkĩheete mbũtũ ĩo ya ita ya Isiraeli-rĩ, tũgũgĩciĩka atĩa? Nake mũndũ ũcio wa Ngai akĩmũcokeria atĩrĩ, Jehova aahota gũkũhe nyingĩ gũkĩra icio.
• 10. Hĩndĩ ĩo Amazia agĩkĩamũrania mbũtũ ĩo yoimĩte Efiraimu na ĩrĩa ĩngĩ, nĩguo ĩinũke, na tondũ ũcio, andũ acio magĩgĩcinwo nĩ marakara mũno nĩ ũndũ wa Juda, nao makĩhũndũka makĩinũka marakarĩte mũno mũno.
• 11. Nake Amazia agĩkĩĩũmĩrĩria, agĩtongoria andũ ake, agĩkinya Gĩtuamba gĩa Cumbĩ, akĩhũra andũ ngiri ikũmi a ciana cia Seiru akĩmoraga.
• 12. Ningĩ ciana icio cia Juda ikĩgwata andũ angĩ ngiri ikũmi mĩgwate ikĩmatwara o igũrũ gacũmbĩrĩ ka rũaro rũa ihiga, ikĩmakurumania na thĩ moimĩte hau igũrũ rĩa rũaro rũu rũa ihiga, nao othe makĩhehenjeka.
• 13. No rĩrĩ, mbũtũ ya ita ĩrĩa yahũndũrirũo nĩ Amazia ndĩgatwarane nake ita-inĩ-rĩ, ĩgĩtharĩka matũũra ma Juda, kuuma Samaria o nginya Bethi-horoni, ĩgĩkĩũraga andũ ngiri ithatũ amo, na ĩgĩtaha indo nyingĩ.
• 14. Na gũgĩkinya atĩrĩ, atĩ thutha wa Amazia oima kũũraga Aedomu-rĩ, agĩcoka agĩũka na ngai cia ciana cia Seiru, agĩcihanda ituĩke ciake, na agĩciinamĩrĩra acihoe, o na agĩcicinĩra ũbumba.
• 15. Tondũ ũcio Jehova agĩgĩcinwo nĩ marakara nĩ ũndũ wa Amazia, akĩmũrekeria mũmbii, akĩmũũria atĩrĩ, Nĩ kĩ gĩatũma ũrongorie ngai cia ndũrĩrĩ, o icio ciaagire kũhonokia andũ a cio imarute moko-inĩ maku?
• 16. Na gũgĩkinya atĩrĩ, atĩ o hĩndĩ ĩo maaragia, mũthamaki akĩmũũria atĩrĩ, Hĩ! Nĩ gũtua tũgĩgũtuĩte mũhei mũthamaki kĩrĩra? Kira; ũkwenda kwĩhũrithia nĩkĩ? Nake mũnabii ũcio agĩtiga ũhoro ũcio akiuga atĩrĩ, Nĩnjũĩ atĩ Ngai nĩacirĩire gũkũũraga, nĩ ũndũ nĩwĩkĩte ũndũ ũcio, na nĩwarega kũigua kĩrĩra gĩakwa.
• 17. Hĩndĩ ĩo Amazia, mũthamaki wa Juda, agĩkĩhoya kĩrĩra, agĩcoka akĩrekania kũrĩ Joashu, mũrũ wa Jehoahazu wa Jehu, mũthamaki wa Isiraeli, akĩmwĩra atĩrĩ, Ũka tuonanie ng’aara.
• 18. Nake Joashu, mũthamaki wa Isiraeli, agĩkĩrekania he Amazia, mũthamaki wa Juda, akĩmwĩra atĩrĩ, Kwĩ hĩndĩ mahiũ ma nyeki-inĩ marĩa maarĩ Lebanoni maarekanirie he mũtarakwa ũrĩa wĩ Lebanoni, makĩwĩra atĩrĩ, He mũrũ wakwa mwarĩguo amũhikie atuĩke mũka; na hĩndĩ o ĩo nyamũ ya gĩthaka ĩrĩa yarĩ kũu Lebanoni ĩkĩhĩtũka, ĩkĩrangĩrĩria mahiũ macio ma nyeki-inĩ.
• 19. Atĩrĩrĩ, wee ũreĩra na ngoro atĩ nĩũhũrĩte Edomu; nayo ngoro yaku ĩgatũma wĩtĩe; ndũgĩikare o gwaku mũciĩ; ũgũkĩenda gũcoka gwĩthũĩrĩra thambo nĩ ũndũ kĩ, wĩninithie wee mwene, mwĩ na andũ a Juda?
• 20. No rĩrĩ, Amazia ndaigana kũigua; nĩ gũkorũo ũndũ ũcio woimĩte kwĩ Ngai, nĩ getha amarekererie amaneane moko-inĩ ma thũ ciao, nĩ ũndũ wa kũrongoria ngai cia Edomu.
• 21. Tondũ ũcio Joashu, mũthamaki wa Isiraeli, agĩkĩambata; nake we mwene na Amazia, mũthamaki wa Juda, makĩonanĩria ng’aara kũu Bethi-shemeshu, itũũra rĩa Juda.
• 22. Nao Juda magĩgĩtorio nĩ Isiraeli nao mũndũ o mũndũ makĩũrĩra hema-inĩ ciao.
• 23. Nake Joashu, mũthamaki wa Isiraeli, akĩnyitĩra Amazia mũthamaki wa Juda, mũrũ wa Joashu wa Jehoahazu, o kũu Bethi-shemeshu, akĩmũtwara Jerusalemu, agĩcoka agĩtharia rũirigo rũa mahiga rũa Jerusalemu kuuma kĩhingo-inĩ kĩa Efiraimu, nginya o kĩhingo gĩa koine-inĩ, handũ ha mĩkono magana mana.
• 24. Nake agĩgĩthiĩ na thahabu yothe, o na betha, o na indo ciothe iria cionekire kũu nyũmba ya Ngai thĩinĩ, hamwe na mũndũ ũrĩa wetagwo Obedi-edomu, o na indo cia kũndũ kũrĩa kwaigagwo mũthithũ wa indo cia bata nyũmba ya mũthamaki, o na akĩnyita andũ a gũgakũũrũo thutha-inĩ, agĩgĩcoka Samaria.
• 25. Nake Amazia, mũrũ wa Joashu, mũthamaki wa Juda, agĩgĩtũũra muoyo mĩaka ĩngĩ ikũmi na ĩtano thutha wa hĩndĩ ĩrĩa Joashu, mũrũ wa Jehoahazu, mũthamaki wa Isiraeli, aakuire.
• 26. Na rĩrĩ, ciĩko iria ingĩ cia Amazia, cia mbere o na cia kũrigĩrĩria-rĩ, anga itiandĩkĩtwo ibuku-inĩ rĩa athamaki a Juda na Isiraeli?
• 27. Na rĩrĩ, kuuma ihinda rĩrĩa Amazia aagarũrũkire agĩtiga kũrũmĩrĩra Jehova-rĩ, andũ nĩmaagwatire kũgĩa ndundu ya kũmũũkĩrĩra kũu Jerusalemu, nake agĩkĩũrĩra Lakishi; no rĩrĩ, nĩmaarekirie andũ mamũrũmĩrĩre o kũu Lakishi, makĩmũũragĩra kuo.
• 28. Thutha wa ũguo makĩmũcokia aigĩrĩirũo mbarathi igũrũ, makĩmũthika o kũu itũũra rĩa Juda hamwe na maithe.

Home