Go Back

2 Maũndũ ma Matukũ ma Tene Chapter 19

• 1. Na rĩrĩ, Jehoshafatu, mũthamaki wa Juda, agĩkĩhũndũka akĩinũka gwake mũciĩ na thayũ o kũu Jerusalemu.
• 2. Nake Jehu wa Hanani, ũrĩa muoni maũndũ, akiumagara akamũtũnge, akĩũria Jehoshafatu, ũcio mũthamaki, atĩrĩ, Hĩ! Anga nĩwagĩrĩirũo nĩ gũteithia mũndũ mwaganu, o na kwenda andũ arĩa mathũũrĩte Jehova? Tondũ ũcio nĩũgũkorũo nĩ marakara ma Jehova.
• 3. No rĩrĩ, maũndũ-inĩ maku marĩa wĩkaga-rĩ, mamwe nĩmonagwo marĩ mega, nĩ ũndũ nĩũthengetie Maasherothu bũrũri ũyũ, ũgatũma ngoro yaku yende kũrongoria Ngai.
• 4. Nake Jehoshafatu agĩgĩtũũra Jerusalemu; agĩcoka akiumagara rĩngĩ agĩthiĩ kũrora andũ ake kuuma o Biri-shiba o nginya bũrũri ũrĩa wĩ irĩma nyingĩ wa Efiraimu, nake akĩmacokia he Jehova, Ngai wa maithe mao.
• 5. Nake akĩiga aciri kũndũ guothe bũrũri ũcio wake matũũra-inĩ mothe ma Juda marĩa maairigĩtwo, itũũra o itũũra,
• 6. agĩcoka akĩĩra aciri acio atĩrĩ, Wĩciragiei wega ũrĩa mũgwĩka; nĩ ũndũ mũtigũcira nĩ ũndũ wa mũndũ no nĩ ũndũ wa Jehova nake e hamwe na inyuĩ mũgĩtuanĩra cira.
• 7. Tondũ ũcio rĩu, tũũrai mwĩtigĩrĩte Jehova; wĩmenyererei mwĩkage ũguo, nĩ gũkorũo Jehova, Ngai witũ, ndarĩ ũndũ o na ũrĩkũ wa waganu, o na kana akarora ũrĩa mũndũ atariĩ, o na kana akahakĩka.
• 8. O na ningĩ Jehoshafatu akĩiga Alawii, o na athĩnjĩri-Ngai amwe, o na andũ amwe arĩa anene a nyũmba cia maithe ma andũ a Isiraeli, kũu Jerusalemu, nĩguo marutagĩre Jehova wĩra wa gũtuithanagia macira, o na maninage ngarari. Nao magĩgĩcoka Jerusalemu.
• 9. Nake akĩmataara, akiuga atĩrĩ, Maũndũ maya mũrĩĩkaga mwĩtigĩrĩte Jehova, na mũikare mũrĩ ehokeku, na mũrĩ na ngoro nginyanĩru.
• 10. Na rĩrĩ, o hĩndĩ ĩrĩa yothe mũrĩrehagĩrũo ũhoro wa ngarari uumĩte kũrĩ ariũ a ithe wanyu arĩa matũũrĩte matũũra-inĩ mao, ũkoniĩ thakame ĩitanĩtwo, o na kana ũtaũranĩri wa watho na maathani, kana wa irĩra cia watho wa kũrũmĩrĩrũo na matuĩro ma cira-rĩ, mataaragei, nĩ getha matikonwo marĩ ehia nĩ Jehova, na tondũ ũcio marakara make mamũkore inyuĩ, o na ariũ a thoguo; ĩkagai ũguo na mũtikonwo mũrĩ ehia.
• 11. Na atĩrĩrĩ, Amaria, mũthĩnjĩri-Ngai ũrĩa mũnene, nĩwe ũrĩmwathaga maũndũ-inĩ mothe ma Jehova; o nake Zebadia wa Ishumaeli, ũrĩa mwathi wa nyũmba ya Juda, nĩwe ũrĩmũroraga maũndũ-inĩ mothe marĩa makonainie na mũthamaki; o nao Alawii nĩo marĩrũmagia maũndũ manyu me ndungata cianyu. Ĩkagai maũndũ mũũmĩrĩirie, nake Jehova aroikara hamwe na arĩa ega.

Home