Go Back

2 Maũndũ ma Matukũ ma Tene Chapter 17

• 1. Nake Jehoshafatu, mũrũwe, agĩgĩthamaka ithenya rĩake, nake akĩĩĩkĩra hinya ndakahũrũo nĩ Isiraeli.
• 2. Namo matũũra mothe ma Juda marĩa maairigĩtwo akĩmaiga athigari a ita, o naguo bũrũri wa Juda akĩũiga athigari a kũũrangĩra, o na matũũra ma Efiraimu, marĩa ithe Asa aatunyanĩte.
• 3. Nake Jehova aarĩ hamwe na Jehoshafatu, nĩ ũndũ nĩaathiaga na mĩthiĩre ĩrĩa ithe Daudi aathiaga nayo rĩa mbere, na ndaigana kũrongoria Mabaali,
• 4. no aarongoragia Ngai wa ithe, o na agathiaga arũmĩrĩire maathani make, na ndaigana kũrũmĩrĩra maũndũ marĩa Aisiraeli mekaga.
• 5. Tondũ ũcio Jehova agĩgĩtũma ũthamaki ũrũme wega wĩ moko-inĩ make, nao andũ othe a Juda magagĩtwaragĩra Jehoshafatu iheo, nake akĩgĩa na ũtonga mũingĩ, o na agĩtĩĩka mũno.
• 6. Nayo ngoro yake ĩgĩtũma erirĩrie mũno kũrũmĩrĩra Jehova; o na agĩkĩrĩrĩria kweheria matĩri ma kũndũ gũtũũgĩru, o na Maashera kũu Juda.
• 7. O na ningĩ atĩrĩ, mwaka wa ĩtatũ ĩrĩa aakorirũo athamakĩte-rĩ, agĩkĩrekia anene ake, Beni-haili, na Obadia, na Zekaria, na Nethaneli, na Mikaia, makarute andũ maũndũ matũũra ma Juda,
• 8. me na Alawii amwe, nao nĩ Shemaia, na Nethania, na Zebadia, na Asaheli, na Shemiramothu, na Jehonathani, na Adonija, na Tobija, na Tobu-adonija, arĩa Alawii; o na Elishama, na Jehoramu, athĩnjĩri-Ngai.
• 9. Nao makĩruta andũ maũndũ kũu Juda, me na ibuku rĩa watho wa Jehova; magĩgĩcanga kũndũ guothe, matũũra mothe ma Juda, makĩrutaga andũ akuo maũndũ.
• 10. Nake Jehova agĩtũma andũ a mabũrũri mothe marĩa maarigicĩirie kũu Juda magwatwo nĩ guoya; na tondũ ũcio matiigana kũrutithia mbaara atĩ nĩguo mahũrane na Jehoshafatu.
• 11. Nao Afilisiti amwe magĩtwarĩra Jehoshafatu iheo, o na igoti rĩa betha o nao Aarabu makĩmũtwarĩra ndũru cia mbũri, ndũrũme ngiri mũgwanja na magana mũgwanja, na thenge ngiri mũgwanja na magana mũgwanja.
• 12. Nake Jehoshafatu agĩkĩrĩrĩria kũgĩa na hinya mũno; nakuo kũu Juda agĩgĩaka ihingo cia hinya, o na matũũra ma kũigwo indo;
• 13. nake akĩrutithia mawĩra maingĩ kũu matũũra-inĩ macio ma Juda, o na akĩgĩa andũ a ita arĩa maarĩ njamba irĩ hinya kũu Jerusalemu.
• 14. Na rĩrĩ, ũũ nĩguo maaiganaga magĩtarũo, o ta ũrĩa nyũmba cia maithe mao ciatariĩ thĩinĩ wa mũhĩrĩga wa Juda, andũ arĩa maarĩ anene a athigari ngiri-rĩ, mũnene wao aarĩ Adina, na aarĩ na athigari ngiri magana matatũ arĩa maarĩ njamba irĩ hinya;
• 15. nake ũrĩa warĩ thutha wake nĩ mũnene Jehohanani, nake aarĩ na athigari ngiri magana merĩ ma mĩrongo ĩnana;
• 16. nake ũrĩa warĩ thutha wa ũcio nĩ Amasia wa Zikiri, ũrĩa werutĩire Jehova na ũndũ wa kwĩendera; nake ũcio aarĩ na athigari ngiri magana merĩ arĩa maarĩ njamba irĩ hinya;
• 17. na thĩinĩ wa mũhĩrĩga wa Benjamini nĩ Eliada, mũndũ warĩ njamba ĩrĩ hinya, nake aarĩ na athigari ngiri magana merĩ arĩa maarũaga na mota na ngo;
• 18. nake ũrĩa warĩ thutha wake-rĩ, nĩ Jehozabadi, nake aarĩ na athigari ngiri igana rĩmwe na magana manana methagathagĩire ita.
• 19. Andũ acio-rĩ, nĩo maatungatagĩra mũthamaki, thengia andũ arĩa mũthamaki aaigĩte matũũra-inĩ marĩa maairigĩtwo kũu Juda guothe.

Home