Go Back

2 Maũndũ ma Matukũ ma Tene Chapter 10

• 1. Nake Rehoboamu agĩgĩthiĩ Shekemu; nĩ gũkorũo Aisiraeli othe nĩmaathiĩte kũu Shekemu, makamũtue mũthamaki.
• 2. Na gũgĩkinya atĩrĩ, atĩ hĩndĩ ĩrĩa Jeroboamu, mũrũ wa Nebati, aaiguire ũhoro ũcio, (tondũ aarĩ Misiri, kũrĩa orĩire eherere Suleimani, mũthamaki,) Jeroboamu ũcio agĩkĩhũndũka akiuma kũu Misiri.
• 3. Nao andũ magĩkĩrekania agetwo; nake Jeroboamu o na Isiraeli othe magĩthiĩ, makĩarĩria Rehoboamu, makĩmwĩra ũũ:
• 4. Atĩrĩrĩ, watho ũrĩa thoguo aratwathaga naguo nĩũratũritũhĩire mũno; tondũ ũcio tũhũthahũthĩrie wĩra ũcio ũrarĩ hinya wa thoguo, o wĩra ũcio wake ũratariĩ ta mũtĩ wa ngingo mũritũ atwĩkĩrĩte, na nĩtũrĩgũtungatagĩra.
• 5. Nake agĩkĩmera atĩrĩ, Nĩmũgacoka kũrĩ niĩ mĩthenya ĩtatũ yathira. Nao andũ acio magĩgĩĩthiĩra.
• 6. Nake Rehoboamu, mũthamaki, agĩcira na athuri arĩa maarĩaga kĩrĩra na ithe, Suleimani, ihinda rĩrĩa aarĩ muoyo, akĩmoria atĩrĩ, Nĩ kĩrĩra kĩrĩkũ mũkũ’he nĩguo njokerie andũ acio ũhoro?
• 7. Nao magĩkĩmwarĩria, makĩmwĩra atĩrĩ, Ũngĩgĩtuga andũ acio ũmakenie, na ũmaarĩrie ndeto njega, nĩmegũtuĩka ndungata ciaku tene na tene.
• 8. No rĩrĩ, nĩaatigire kĩrĩra gĩa athuri acio kĩu maamũheete, agĩcira na aanake arĩa maarĩ a riika rĩake, o arĩa maathiaga thiritũ nake,
• 9. akĩmoria atĩrĩ, Ha ũhoro wa andũ acio maarĩtie na niĩ makanjĩra ũũ: Tũhũthahũthĩrie wĩra ũcio wa hinya ũratariĩ ta mũtĩ wa ngingo thoguo aatwĩkĩrĩte-rĩ, inyuĩ nĩ kĩrĩra kĩrĩkũ mũkũ’he nĩguo ndĩmacokerie ũhoro?
• 10. Nao aanake acio a riika rĩake magĩkĩaria nake makĩmwĩra atĩrĩ, Andũ acio maakwarĩirie, makiuga ũũ: Watho ũrĩa thoguo aratwathaga naguo nĩũratũritũhĩire mũno ta arĩ mũtĩ wa ngingo mũritũ, no wee tũhũthahũthĩrie, aria nao ũmere atĩrĩ, Kĩara gĩakwa kĩa mũira nĩ gĩtungu gũkĩra kĩero kĩa baba.
• 11. Na rĩrĩ, kuona atĩ baba aramwĩkĩrĩte mũtĩ wa ngingo mũritũ-rĩ, niĩ nĩ kũritũhia ngũmũritũhĩria mũtĩ ũcio wa ngingo; baba aramũhũraga na iboko, no rĩrĩ, niĩ ndĩrĩmũrũmithagia ing’aurũ.
• 12. Nake Jeroboamu, na andũ acio othe, magĩgĩcoka he Rehoboamu mũthenya wa gatatũ, o ta ũrĩa mũthamaki oigĩte gwĩkwo rĩrĩa oigire atĩrĩ, Nĩmũgacoka kũrĩ niĩ mĩthenya ĩtatũ yathira.
• 13. Nake mũthamaki agĩcokeria andũ acio ũhoro ehĩte mũno; mũthamaki ũcio ti Rehoboamu agĩtiga kĩrĩra gĩa athuri agĩkĩrega,
• 14. akĩarĩria andũ acio athingatĩte kĩrĩra kĩa aanake, akiuga atĩrĩ, Watho ũrĩa baba aramwathaga nĩũramũritũhĩire ta arĩ mũtĩ wa ngingo mũritũ; no rĩrĩ, niĩ nĩ kũritũhia ngũũritũhia makĩria; ningĩ baba aramũhũraga na iboko, no niĩ ndĩrĩmũrũmithagia ing’aurũ.
• 15. Ũguo nĩguo mũthamaki aaregire kũigua andũ acio; nĩ gũkorũo ũndũ ũcio warehithĩtio nĩ Ngai, nĩ getha Jehova atũme ũhoro wake ũrĩa aakinyĩirie Jeroboamu wa Nebati na kanua ka Ahija, Mũshiloni, ũikare ũrũmĩte.
• 16. Na rĩrĩ, hĩndĩ ĩrĩa Aisiraeli othe monire atĩ mũthamaki ndanamaigua-rĩ, andũ acio magĩgĩcokeria mũthamaki makĩmwĩra atĩrĩ, Nĩ igai rĩrĩkũ twĩ narĩo he Daudi? Ningĩ-rĩ, hatirĩ kĩndũ tũgaĩte mũrũ wa Jesii; wĩthiĩrei o mũndũ hema-inĩ yake, inyuĩ Aisiraeli aya! Rĩu-rĩ, Daudi, kĩĩroragĩre nyũmba yaku wee mwene. Tondũ ũcio Aisiraeli othe makĩharaganĩria hema-inĩ ciao.
• 17. No rĩrĩ, ha ũhoro wa ciana cia Isiraeli iria ciatũũrĩte matũũra ma Juda-rĩ, Rehoboamu agĩtuĩka mũthamaki wacio.
• 18. Na rĩrĩ, hĩndĩ ĩrĩa mũthamaki ti Rehoboamu aarekirie Hadoramu, mũnene wa andũ a kĩaro-rĩ, ciana cia Isiraeli ikĩmũhũra na mahiga nyuguto o nginya agĩkua. Nake Rehoboamu ũcio mũthamaki agĩkĩhiũna akahaice ngari yake ya ita, orĩre Jerusalemu.
• 19. Ũguo nĩguo Aisiraeli mokĩrĩire nyũmba ya Daudi, makĩrega gũcoka gwathwo nĩyo o na ũmũthĩ.

Home