Go Back

2 Athamaki Chapter 23

• 1. Nake mũthamaki agĩkĩrekania, nao andũ makĩmũũnganĩria athuri othe a Juda o na a Jerusalemu.
• 2. Nake mũthamaki akĩambata, agĩkinya nyũmba ya Jehova, me na andũ othe a Juda, o na andũ othe arĩa maatũũraga Jerusalemu, o na athĩnjĩri-Ngai, o na anabii, o na andũ arĩa angĩ othe, arĩa anyinyi, o na arĩa anene; nake akĩmathomera ciugo ciothe cia ibuku rĩu rĩa kĩrĩkanĩro, o rĩu rĩonirũo kũu nyũmba ya Jehova thĩinĩ, makĩĩiguĩra na matũ mao.
• 3. Nake mũthamaki akĩrũgama gĩtugĩ-inĩ, akĩrĩkanĩra kĩrĩkanĩro na Jehova, arĩ hau mbere yake, gĩa atĩ nĩarĩmũrũmagĩrĩra, na amenyagĩrĩre maathani make o na maũira make, o na irĩra cia watho wake wa kũrũmĩrĩrũo, na ngoro yake yothe, o na muoyo wake wothe, o na ekage maũndũ ma kĩrĩkanĩro kĩu marĩa maandĩkĩtwo ibuku-inĩ rĩu; nao andũ othe makĩĩĩkĩra ho kĩrĩkanĩro-inĩ kĩu.
• 4. Nake mũthamaki agĩatha Hilikia, mũthĩnjĩri-Ngai ũrĩa mũnene, o na athĩnjĩri-Ngai arĩa angĩ anyinyanyinyi, o na aikaria mũrango wa hekarũ, akĩmera marute kũu hekarũ-inĩ ya Jehova indo ciothe iria ciathondekeirũo Baali, o na iria ciathondekeirũo Ashera o na mbũtũ yothe ya igũrũ matu-inĩ, nake agĩcicinĩra mĩgũnda-inĩ ya Kidironi, na kũu mbarĩ ĩrĩa ĩngĩ ya Jerusalemu, naguo mũhu wacio agĩũtwarithia Beth-eli.
• 5. Ningĩ athĩnjĩri-ngai cia mĩhianano arĩa maatuĩtwo nĩ athamaki a Juda a gũcinagĩra ũbumba matĩri-inĩ ma kũndũ gũtũũgĩru, akĩmahinga gũcoka gwĩka ũndũ o na ũmwe matũũrainĩ ma Juda, o na kũndũ kũrĩa gwathiũrũrũkĩirie Jerusalemu, me hamwe na arĩa a gũcinagĩra Baali ũbumba, o na riũa, na mweri, na njata iria nene, o na mbũtũ yothe ya igũrũ.
• 6. Nayo Ashera ĩrĩa yarĩ kũu nyũmba ya Jehova thĩinĩ, akĩmĩtwarithia na kũu gĩthaka-inĩ mbarĩ ĩrĩa ĩngĩ ya Jerusalemu, akĩmĩkinyia karũũĩ ga Kidironi, akĩmĩcinĩra o ro kũu karũũĩ-inĩ kau ga Kidironi, agĩcoka akĩmĩhũrahũra ĩgĩtuĩka mũtutu; naguo mũtutu wayo akĩũikia mbĩrĩra-inĩ cia andũ arĩa matarĩ igweta.
• 7. O nacio nyũmba cia ũmaraya wa arũme na arũme agĩcitharia, o icio ciarĩ thĩinĩ wa nyũmba ya Jehova, harĩa andũ-a-nja maatumagĩra matama ma gũcunjurio ma Ashera.
• 8. Nake agĩkĩruta athĩnjĩri-ngai othe matũũra-inĩ ma Juda; o namo matĩri ma kũndũ gũtũũgĩru marĩa athĩnjĩri-ngai maacinagĩra ũbumba akĩmathũkia, akĩmagwatia thahu kuuma Geba nginya o Biri-shiba; o na agĩtharia matĩri marĩa maarĩ mĩrango-inĩ ya itonyero rĩa kĩhingo kĩa Joshua, mũnene wa itũũra, o matĩri macio maarĩ mwena wa ũmotho mũndũ agĩtonya itũũra-inĩ thĩinĩ.
• 9. No rĩrĩ, athĩnjĩri-ngai acio a kũu matĩri-inĩ matiaambataga kĩgongona-inĩ kĩa Jehova kũu Jerusalemu; no rĩrĩ, mĩgate ĩrĩa ĩtarĩ mĩimbie nimaamĩrĩaga me thĩinĩ wa ariũ a ithe wao.
• 10. Ningĩ agĩthũkia Tofeti, kũu gĩtuamba-inĩ gĩa ciana cia Hinomu, agĩkũgwatia thahu nĩ getha gũtikanacoke kũgĩa mũndũ o na ũmwe ũkũhĩtũkithĩria mũrũwe, o na kana mwarĩ, mwaki-inĩ nĩguo aheo Moleku.
• 11. O na ningĩ akĩeheria mbarathi iria ciaamũrĩirũo riũa nĩ athamaki a Juda, ikaigwo itonyero-inĩ rĩa nyũmba ya Jehova, kanyũmba-inĩ ka Nathani-meleku, mũrori wa indo cia mũciĩ, karĩa kaarĩ mwena-inĩ wa nyũmba ya Jehova; nacio ngari cia ita iria ciaamũrĩirũo riũa, agĩcicina na mwaki.
• 12. Nacio igongona iria ciaakĩtwo igũrũ rĩa kanyũmba ka Ahazu, karĩa kaarĩ igũrũ rĩa karĩa kangĩ, o icio athamaki a Juda maathondekete, o na igongona iria Manase aakĩte hau nja cierĩ cia nyũmba ya Jehova, Josia ũcio mũthamaki agĩcitharia, o na agĩciharũrũkia thĩ, agĩcithengia ho; naguo mũhu wacio akĩũikia karũũĩ ga Kidironi.
• 13. Namo matĩri ma kũndũ gũtũũgĩru marĩa maarĩ o hau mbere ya Jerusalemu, mwena wa ũrĩo wa kĩrĩma gĩa kũninanĩrũo, marĩa Suleimani mũthamaki wa Isiraeli aakĩire Ashitorethu ngai ya Azidoni ĩrĩa ĩrĩ thahu, o na Kemoshu ngai ya Amoabi ĩrĩa ĩrĩ thahu, o na Milikomu ngai ya Aamoni ĩrĩa ĩrĩ thahu-rĩ, mũthamaki ũcio akĩmathũkia akĩmagwatia thahu.
• 14. O nacio itugĩ cia kũhoyũo agĩciunanga tũcunjĩ, o namo Maashera akĩmatemenga, nakuo kũndũ kũu ciarĩ agĩkũiyũria mahĩndĩ ma andũ.
• 15. O na ningĩ kĩgongona kĩrĩa kĩarĩ Beth-eli, itĩri-inĩ rĩa kũndũ gũtũũgĩru rĩrĩa Jeroboamu wa Nebati, ũrĩa watũmire Isiraeli mehie, aakĩte-rĩ, kĩgongona kĩu hamwe na itĩri rĩakĩo, agĩciunanga, agĩcigũithia thĩ cieri; o narĩo itĩri akĩrĩcina, akĩrĩhũrahũra rĩgĩtuĩka mũtutu; o nayo Ashera yarĩo akĩmĩcina.
• 16. Nake Josia rĩrĩa ehũgũraga, akĩona mbĩrĩra iria ciarĩ hau kĩrĩma-inĩ agĩkĩrekania, akĩrutithia mahĩndĩ marĩa maarĩ mbĩrĩra-inĩ icio, akĩmacinĩra kĩgongona-inĩ igũrũ, agĩgĩthũkia agĩkĩgwatia thahu o ta ũrĩa ũhoro wa Jehova watariĩ ũrĩa mũndũ wa Ngai aahunjanĩirie, o we ũrĩa wahunjanĩirie ũhoro wa maũndũ macio.
• 17. Agĩgĩcoka akĩũria atĩrĩ, Gĩtugĩ kĩrĩa ndĩrona nĩ gĩa kĩ? Nao andũ a itũũra rĩu makĩmwĩra atĩrĩ, Nĩ mbĩrĩra ya mũndũ ũcio wa Ngai woimire Juda, akĩhunjanĩria ũhoro wa maũndũ maya wee wĩkĩte ma kũhũranga kĩgongona gĩkĩ kĩa Beth-eli.
• 18. Nake akiuga atĩrĩ, Rekei aikare; mũndũ o na ũrĩkũ ndagathengie mahĩndĩ make. Tondũ ũcio magĩgĩtiga kũhutia mahĩndĩ macio make, o na mahĩndĩ ma mũnabii ũrĩa woimire Samaria.
• 19. Nacio nyũmba ciothe cia matĩri-inĩ marĩa maarĩ matũũra-inĩ ma Samaria, o macio athamaki a Isiraeli maakĩte magĩthirĩkia Jehova namo magĩtũma arakare, Josia akĩmeheria akĩmeka o ta ũrĩa maũndũ mothe maatariĩ marĩa ekĩte kũu Beth-eli.
• 20. Nao athĩnjĩri-ngai othe a matĩri-inĩ macio makuo, akĩmoragĩra igongona-inĩ igũrũ, agĩcoka agĩcinĩra mahĩndĩ ma andũ igũrũ rĩacio; thutha wa ũguo akĩhũndũka agĩcoka Jerusalemu.
• 21. Nake mũthamaki agĩatha andũ othe akĩmera atĩrĩ, Tabarĩrai ũrĩi wa gĩathĩ kĩa Bathaka ya Jehova Ngai wanyu, o ta ũrĩa kwandĩkĩtwo ibuku-inĩ rĩrĩ rĩa kĩrĩkanĩro.
• 22. Na ti-itherũ gũtirĩ kwarĩo Bathaka ĩngĩ ta ĩo, kuuma o matukũ-inĩ ma atiirĩrĩri-bũrũri arĩa maaciragĩra Isiraeli, o na; matukũ-inĩ mothe ma athamaki a Isiraeli, kana ma athamaki a Juda
• 23. naguo mwaka wa ikũmi na ĩnana ĩrĩa Josia ũcio mũthamaki aakorirũo athamakĩte, nĩguo Bathaka ĩo ya Jehova yarĩĩrĩirũo kũu Jerusalemu.
• 24. Ningĩ-rĩ, andũ arĩa maarĩ na maroho maragũraga, na arogi, o na mĩhianano ĩrĩa ĩhoyagwo ngai nayo, na mĩhianano ya ndũire, o na maũndũ marĩa mangĩ mothe me thahu mũno marĩa monagwo bũrũri wa Juda, o na Jerusalemu, macio mothe Josia nĩaamathengirie, nĩ getha watho ũrĩa waandĩkĩtwo ibuku-inĩ rĩrĩa Hilikia, mũthĩnjĩri-Ngai, onire nyũmba ya Jehova thĩinĩ, awĩkĩre hinya.
• 25. Na rĩrĩ, gũtiarĩ mũthamaki ũngĩ mbere yake watariĩ take gũcokerera Jehova na ngoro yake yothe, o na muoyo wake wothe, o na hinya wake wothe, o ta ũrĩa watho wothe wa Musa watariĩ; o na thutha wake gũtiigana kũgĩa ũngĩ ũtariĩ take.
• 26. No ningĩ-rĩ, Jehova ndaigana kũgarũrũka atigane na matũkũya ma wĩĩ wake, marĩa aakanĩtwo nĩmo ma kwenda kũhũra Juda nĩ ũndũ wa maũndũ mothe marĩa Manase aamũthirĩkirie namo, akĩmũrakaria.
• 27. Ningĩ Jehova akiuga atĩrĩ, O nake Juda nĩngũmũthengia, ndige gũcoka kũmuona, o ta ũrĩa ndathengirie Isiraeli; o narĩo itũũra rĩrĩ ndathurire rĩtuĩke rĩakwa-rĩ, nĩngũrĩte biũ, narĩo nĩrĩo Jerusalemu, hamwe na nyũmba ĩrĩa ndaaririe ũhoro wayo, ngiuga atĩrĩ, Rĩĩtwa rĩakwa rĩrĩtũũraga kuo.
• 28. Na rĩrĩ, ciĩko iria ingĩ cia Josia, na maũndũ mothe marĩa ekire, anga matiandĩkĩtwo ibuku-inĩ rĩa maũndũ ma ihinda rĩa athamaki a Juda?
• 29. Na rĩrĩ, matukũ-inĩ make-rĩ, nĩguo Firauni-neko, mũthamaki wa Misiri, aambatire akahũranĩre na mũthamaki wa Ashuri, o kũu rũũĩ-inĩ rũa Farati; nake Josia, mũthamaki, agĩthiĩ kũhũrana nake; nake mũthamaki ũcio wa Misiri aamuona-rĩ, akĩmũũragithĩria o kũu Megido.
• 30. Nacio ndungata ciake ikĩmũkuua na ngari arĩ mũkuũ, ikĩmũruta Megido, ikĩmũtwara Jerusalemu ikĩmũthika mbĩrĩra-inĩ yake we mwene. Na andũ a bũrũri wake makĩoya Jehoahazu, mũrũ wa Josia, makĩmũitĩrĩria maguta, makĩmũtua mũthamaki ithenya rĩa ithe.
• 31. Na rĩrĩ, Jehoahazu aarĩ wa mĩaka mĩrongo ĩĩrĩ na ĩtatũ hĩndĩ ĩrĩa aambĩrĩirie gũthamaka; agĩgĩthamaka mĩeri ĩtatũ kũu Jerusalemu; nake nyina etagwo Hamutali, mwarĩ wa Jeremia wa Libina.
• 32. Nake agĩgĩĩka maũndũ marĩa monagwo marĩ moru nĩ Jehova, o ta ũrĩa maũndũ mothe maatariĩ marĩa maithe mekaga.
• 33. Nake Firauni-neko akĩmuohera na mĩnyororo o kũu Ribila, itũũra rĩa bũrũri wa Hamathu, nĩ getha ndagathamake Jerusalemu; ningĩ akĩrutithia andũ a bũrũri wake igoti rĩa taranda igana cia betha, o na taranda ĩmwe ya thahabu.
• 34. Nake Firauni-neko agĩtua Eliakimu, mũrũ wa Josia, mũthamaki ithenya rĩa ithe Josia, na akĩmũgarũrĩra rĩĩtwa, akĩmũtua Jehoiakimu; no Jehoahazu nĩaamweheririe; nake agĩgĩkinya Misiri, agĩkuĩra kuo.
• 35. Nake Jehoiakimu agakĩheaga Firauni betha na thahabu icio, no nĩ kũrutithia aarutithagia andũ a bũrũri wake igoti nĩ getha one mbia cia kũheaga Firauni, o ta ũrĩa aathĩtwo nĩwe; ũguo nĩguo aahothithagia andũ a bũrũri wake betha na thahabu, o mũndũ o ta ũrĩa atuĩrĩirũo igoti rĩake, nĩ getha iheagwo Firaunineko.
• 36. Na rĩrĩ, Jehoiakimu aarĩ wa mĩaka mĩrongo ĩĩrĩ na ĩtano hĩndĩ ĩrĩa aambĩrĩirie gũthamaka, agĩthamaka mĩaka ikũmi na ũmwe kũu Jerusalemu; nake nyina etagwo Zebida, mwarĩ wa Pedaia wa kũu Ruma.
• 37. Nake agĩgĩĩka maũndũ marĩa monagwo marĩ moru nĩ Jehova, o ta ũrĩa maũndũ mothe maatariĩ marĩa maithe mekaga.

Home