Go Back

2 Athamaki Chapter 21

• 1. Na rĩrĩ, Manase aarĩ wa mĩaka ikũmi na ĩĩrĩ hĩndĩ ĩrĩa aambĩrĩirie gũthamaka, agĩthamaka mĩaka mĩrongo ĩtano na ĩtano kũu Jerusalemu; nake nyina etagwo Hefiziba.
• 2. Nake agĩgĩĩka maũndũ marĩa monagwo marĩ moru nĩ Jehova, o ta ũrĩa maũndũ marĩa me thahu ma ndũrĩrĩ maatariĩ, o ndũrĩrĩ icio Jehova aaingatire agĩcieheria mbere ya ciana cia Isiraeli.
• 3. Nĩ ũndũ nĩaacokire gwaka matĩri ma kũndũ gũtũũgĩru marĩa ithe, Hezekia, aatharĩtie; o na agĩakithia igongona cia kũhoerũo Baali, o na agĩthondekithia Ashera, o ta ũrĩa Ahabu mũthamaki wa Isiraeli ekire; o na akĩinamĩrĩra mbũtũ yothe ya igũrũ, akĩmĩhoya.
• 4. Ningĩ agĩakithia igongona kũu nyũmba ya Jehova thĩinĩ, o nyũmba ĩo Jehova oigĩte ũhoro wayo atĩrĩ, Kũu Jerusalemu nĩkuo ngatũũria rĩĩtwa rĩakwa.
• 5. Agĩgĩakithĩria mbũtũ yothe ya igũrũ igongona o kũu nja cierĩ cia nyũmba ya Jehova.
• 6. Ningĩ akĩhĩtũkithĩria mũrũwe mwaki-inĩ, na agĩtũũra aragũragia, o na agatuĩragia nyoni yake, o na agathiaga kũrĩ andũ arĩa marĩ na maroho maragũraga, o na arogi; nake agĩkĩrĩrĩria gwĩka maũndũ marĩa monagwo marĩ moru nĩ Jehova agĩkĩmũthirĩkia nĩguo arakare.
• 7. Nayo Ashera ĩrĩa aathondekete, akĩmĩiga nyũmba ya Jehova thĩinĩ, o nyũmba ĩo aaheete Daudi o na Suleimani mũrũwe ũhoro wayo, akoiga atĩrĩ, Nyũmba-inĩ ĩno thĩinĩ, o na gũkũ Jerusalemu, itũũra rĩrĩ ’thurĩte mĩhĩrĩga-inĩ yothe ya Isiraeli, nĩkuo ngũtũũria rĩĩtwa rĩakwa tene na tene;
• 8. na ndikareka magũrũ ma Isiraeli macoke kũũrũra o na hanini moimĩte bũrũri ũrĩa ndaheire maithe mao, mangĩkorũo nĩmarĩĩkaga o ũndũ ũyũ, atĩ mamenyagĩrĩre gwĩka o ta ũrĩa maũndũ mothe marĩa ndamaathire matariĩ, o na mekage maũndũ mothe ma watho ũrĩa ndungata yakwa Musa yamaathire mekage.
• 9. No rĩrĩ, matiigana kũigua; nake Manase akĩmathinĩkĩrĩria meke maũndũ moru gũkĩra marĩa mekagwo nĩ ndũrĩrĩ iria Jehova aaninire ciehere mbere ya ciana cia Isiraeli.
• 10. Nake Jehova agĩkĩaria na kanua ka ndungata ciake cia anabii, akiuga atĩrĩ,
• 11. Tondũ Manase, mũthamaki wa Juda, nĩekĩte maũndũ macio me thahu, o na ageka maũndũ ma waganu gũkĩra marĩa mothe maanekwo nĩ Aamori, o acio maarĩ gũkũ mbere yake, o na agatũma andũ a Juda o nao mehie na ũndũ wa mĩhianano yake ya kũhoyũo;
• 12. tondũ ũcio Jehova, Ngai wa Isiraeli, oigĩte ũũ: Atĩrĩrĩ, nĩngũrehithĩrie Jerusalemu o na Juda ũũru ũrĩa ũgatũma mũndũ o wothe ũrĩa ũkaũigua ararakwo nĩ matũ make merĩ.
• 13. Narĩo Jerusalemu nĩngarĩtambũrũkĩria rũkwaro rũa gũthima rũrĩa ndathimire Samaria naruo, o na kagera ga gũthima nako karĩa ndathimire nyũmba ya Ahabu nako; na nĩngahuura Jerusalemu, o na ndĩrĩng’aũranie, o ta ũrĩa mũndũ ahuuraga thani akamĩkurumania.
• 14. O namo matigari ma andũ arĩa maarĩ akwa ndĩmate biũ, ndĩmaneane moko-inĩ ma thũ ciao, nao matuĩke o ta nyamũ ĩrĩa ĩguĩmĩtwo, o na andũ atahe nĩ thũ ciao ciothe;
• 15. nĩ ũndũ nĩmekĩte maũndũ marĩa monagwo marĩ moru nĩ niĩ, na magatũũra ma’thirĩkagia nĩguo ndakare, o gwata mũthenya ũrĩa maithe mao moimagarire makiuma Misiri, o nginya mũthenya ũyũ wa ũmũthĩ.
• 16. Ningĩ Manase nĩaakĩrĩrĩirie mũno gũita thakame ĩrĩa ĩtarĩ na ũũru o nginya akĩmĩiyũria Jerusalemu, kuuma gĩturi kĩmwe o nginya kĩrĩa kĩngĩ; naguo wĩhia ũcio agakĩwonganĩrĩria na wa ũrĩa aatũmire andũ a Juda o nao mehie nĩ ũndũ waguo, nĩ ũndũ wa gwĩka maũndũ marĩa monagwo marĩ moru nĩ Jehova.
• 17. Na rĩrĩ, ciĩko iria ingĩ cia Manase, o na maũndũ marĩa mothe ekire, o na mehia marĩa ehirie-rĩ, anga matiandĩkĩtwo ibuku-inĩ rĩa maũndũ ma ihinda rĩa athamaki a Juda?
• 18. Nake Manase agĩkoma hamwe na maithe, agĩthikwo mũgũnda-inĩ wa nyũmba yake we mwene o kũu mũgũnda wa Uza; nake Amoni, mũrũwe, agĩthamaka ithenya rĩake.
• 19. Na rĩrĩ, Amoni aarĩ wa mĩaka mĩrongo ĩĩrĩ na ĩĩrĩ hĩndĩ ĩrĩa aambĩrĩirie gũthamaka; agĩthamaka mĩaka ĩĩrĩ Jerusalemu; nake nyina etagwo Meshulemethu, mwarĩ wa Hazuru wa Jotiba.
• 20. Nake agĩgĩĩka maũndũ marĩa monagwo marĩ moru nĩ Jehova, o ta ũrĩa ithe Manase ekire.
• 21. Agĩthiĩ na mĩthiĩre ĩrĩa yothe ithe aathiaga nayo, na agĩtungatĩra mĩhianano ya kũhoyũo ĩrĩa ithe aatungatagĩra, o na akĩmĩinamĩrĩra akĩmĩhoya;
• 22. agĩgĩtigana na Jehova, Ngai wa maithe, na ndaigana kũrũmĩrĩra Jehova.
• 23. Nacio ndungata cia Amoni ikĩmũgĩĩra ndundu imũũkĩrĩre, igĩkĩũragĩra mũthamaki ũcio o kũu nyũmba yake thĩinĩ.
• 24. No andũ a bũrũri ũcio magĩkĩũraga andũ othe arĩa maagĩĩrĩire mũthamaki ũcio, ti Amoni, ndundu ya kũmũũkĩrĩra, nao magĩtua Josia, mũrũwe, mũthamaki ithenya rĩake.
• 25. Na rĩrĩ, ciĩko iria ingĩ cia Amoni, o iria ekire-rĩ, anga itiandĩkĩtwo ibuku-inĩ rĩa maũndũ ma ihinda rĩa athamaki a Juda?
• 26. Nake agĩthikwo mbĩrĩra-inĩ yake, o mũgũnda-inĩ wa Uza; nake mũrũwe, Josia, agĩthamaka ithenya rĩake.

Home