Go Back

2 Athamaki Chapter 16

• 1. Na rĩrĩ, mwaka wa ikũmi na mũgwanja ĩrĩa Peka, mũrũ wa Remalia, aakorirũo athamakĩte, nĩguo Ahazu, mũrũ wa Jothamu mũthamaki wa Juda, aambĩrĩirie gũthamaka.
• 2. Nake Ahazu aarĩ wa mĩaka mĩrongo ĩĩrĩ hĩndĩ ĩrĩa aambĩrĩirie gũthamaka; agĩthamaka mĩaka ikũmi na ĩtandatũ kũu Jerusalemu; na ndaigana gwĩka maũndũ marĩa monagwo marĩ mega nĩ Jehova Ngai wake, ta ithe Daudi.
• 3. No rĩrĩ, aarũmĩrĩire mĩthiĩre ya athamaki a Isiraeli; o na makĩria akĩhĩtũkithĩria mũrũwe mwaki-inĩ, o ta ũrĩa maũndũ marĩa me thahu mekagwo nĩ ndũrĩrĩ maatariĩ, o ndũrĩrĩ icio Jehova aaingatire biũ ciehere mbere ya ciana cia Isiraeli.
• 4. Nake nĩaarutagĩra magongona matĩri-inĩ ma kũndũ gũtũũgĩru o na irĩma-inĩ, o na agacinagĩra ũbumba kuo, o na mũtĩ-inĩ ũrĩa wothe mũruru.
• 5. Hĩndĩ ĩo Rezini mũthamaki wa Suriata, na Peka wa Remalia mũthamaki wa Isiraeli, makĩambata magĩthiĩ Jerusalemu kũhũrana ita; nao makĩrigicĩria Ahazu itũũra-inĩ rĩake; no nĩmaaremirũo nĩ kũmũtoria.
• 6. Ningĩ matukũ-inĩ macio Rezini, mũthamaki wa Suriata, agĩcokithia itũũra rĩa Elathu ũthamaki-inĩ wa Suriata, agĩkĩingata Ayahudi moime Elathu; nao Asuriata magĩthiĩ Elathu, magĩtũũra kuo, nao matũire kuo o na ũmũthĩ.
• 7. Tondũ ũcio Ahazu agĩkĩrekia andũ mathiĩ gwĩ Tigilathu-pileseru, mũthamaki wa Ashuri, makamwĩre ũũ: Niĩ ndĩ ndungata yaku, na ndĩ mũrũguo; ambata ũũke ũ’honokie ũndute moko-inĩ ma mũthamaki wa Suriata, o na moko-inĩ ma mũthamaki wa Isiraeli, aya maarahũkĩte manjũkĩrĩre.
• 8. Nake Ahazu agĩkĩoya betha o na thahabu ciothe iria cionekire nyũmba ya Jehova thĩinĩ, o na mũthithũ-inĩ wa indo cia bata iria ciaigĩtwo nyũmba ya mũthamaki, agĩcitwarithĩria mũthamaki wa Ashuri, ituĩke ihaki.
• 9. Nake mũthamaki ũcio wa Ashuri agĩkĩmũigua, agĩcoka akĩambata, agĩthiĩ kũhũrana na itũũra rĩa Dameski, akĩrĩtunyana; o nao andũ arĩo akĩmagwata mĩgwate, akĩmatwara Kiri, o na akĩũraga Rezini.
• 10. Nake Ahazu, ũcio mũthamaki, agĩthiĩ Dameski agatũnge Tigilathu-pileseru, mũthamaki wa Ashuri; nakuo kũu agĩkĩona kĩgongona kĩrĩa kĩarĩ Dameski; nake mũthamaki ũcio, ti Ahazu, agĩtwarithĩria Urija, mũthĩnjĩri-Ngai, mũhianĩre wa kĩgongona kĩu, o na mũthondekere wakĩo, o ta ũrĩa mwakĩre wakĩo wothe wahaanaga.
• 11. Nake Urija, ũcio mũthĩnjĩri-Ngai, agĩgĩaka kĩgongona o ta ũrĩa mũhianĩre wakĩo wothe watariĩ ũrĩa Ahazu, mũthamaki, aamũtwarithĩirie uumĩte Dameski; ũguo nĩguo Urija, mũthĩnjĩri-Ngai, aakire kĩgongona kĩu, mũira wa Ahazu mũthamaki ahũndũke oime Dameski.
• 12. Nake mũthamaki oima Dameski, agĩkĩona kĩgongona kĩu; nake mũthamaki ũcio agĩkuhĩhĩria, akĩrutĩra igongona igũrũ rĩakĩo.
• 13. Agĩcinĩra mahaki ma njino igũrũ rĩa kĩgongona kĩu, o na igongona rĩa mũtu; o na agĩitĩrĩria indo iria irutagwo cia kũnyuwo ciamo o na akĩminjaminjĩria thakame ya magongona make ma ũiguano.
• 14. Nakĩo kĩgongona gĩa gĩcango kĩrĩa kĩarĩ mbere ya Jehova, agĩkĩruta, agĩkĩeheria mwena wa na mbere wa nyũmba ya Jehova, agĩgĩthengia hau gatagatĩ-inĩ ga kĩgongona kĩu gĩake we mwene na nyũmba ya Jehova, agĩkĩiga mwena wa gathigathini wa kĩgongona kĩu gĩake.
• 15. Nake Ahazu, mũthamaki, agĩatha Urija ũcio mũthĩnjĩri-Ngai, akĩmwĩra atĩrĩ, Ihaki rĩa njino rĩa rũcinĩ-rĩ, nĩũkarĩcinagĩra igũrũ rĩa kĩgongora gĩkĩ kĩnene, hamwe na igongona rĩa mũtu rĩa hwaĩ-inĩ, o na ihaki rĩa njino rĩa mũthamaki hamwe na igongona rĩarĩo rĩa mũtu, o na ihaki rĩa njino rĩa andũ othe a bũrũri hamwe na igongona rĩarĩo rĩa mũtu, o na rĩa indo ciarĩo iria irutagwo cia kũnyuwo; o na ũminjaminjage thakame yothe ya ihaki rĩa njino igũrũ rĩakĩo, o na thakame yothe ya nyamũ iria ithĩnjagĩrũo ho cia igongona; na kĩgongona kĩu gĩa gĩcango-rĩ, gĩgũtuĩka gĩakwa nduĩragĩrie ũhoro he Ngai ho.
• 16. Ũguo nĩguo Urija, mũthĩnjĩri-Ngai, ekire, o ta ũrĩa maũndũ mothe maatariĩ marĩa Ahazu mũthamaki aamwathire eke.
• 17. Nake Ahazu mũthamaki akĩrenga ithuma cia inyamũ iria ciahaanaga ta ngari, o na akĩeheria inyũngũ igũrũ rĩacio; o narĩo itangi rĩrĩa rĩetagwo karia akĩrĩeheria igũrũ rĩa mĩhianano ya gĩcango ya ndegwa ĩrĩa yarĩ mũhuro wako, agĩcoka akĩrĩigĩrĩra igũrũ rĩa mahiga amaarĩte thĩ.
• 18. Nako gathaku karĩa gaathondeketwo nyũmba-inĩ ĩo gakoniĩ mũthenya wa thabatũ, agĩgathamia agĩkaiga mwena ũrĩa ũngĩ wa nyũmba ya Jehova hamwe na itonyero rĩa mũthamaki rĩrĩa rĩarĩ nja, nĩ ũndũ wa mũthamaki wa Ashuri.
• 19. Na rĩrĩ, ciĩko iria ingĩ cia Ahazu iria ekire-rĩ, anga itiandĩkĩtwo ibuku-inĩ rĩa maũndũ ma ihinda rĩa athamaki a Juda?
• 20. Nake Ahazu agĩkoma hamwe na maithe, agĩthikwo o hamwe na maithe kũu itũũra-inĩ rĩa Daudi; nake Hezekia, mũrũwe, agĩthamaka ithenya rĩake.

Home