Go Back

2 Athamaki Chapter 13

• 1. Na rĩrĩ, mwaka wa mĩrongo ĩĩrĩ na ĩtatũ ĩrĩa Joashu, mũrũ wa Ahazia, mũthamaki wa Juda, aakorirũo athamakĩte, nĩguo Jehoahazu, mũrũ wa Jehu, aambĩrĩirie gũthamakĩra Isiraeli, o kũu Samaria, agĩgĩthamaka mĩaka mũgwanja.
• 2. Nake agĩĩka maũndũ marĩa monagwo marĩ moru nĩ Jehova, akĩrũmĩrĩra mehia ma Jeroboamu wa Nebati, marĩa ehirie na agĩtũma Aisiraeli o nao mehie nĩ ũndũ wamo maũndũ macio-rĩ, ndaigana gũtigana namo o na hanini.
• 3. Nake Jehova agĩgĩcinwo nĩ marakara nĩ ũndũ wa Aisiraeli, agĩtũũra amarekagĩrĩria akamaneana moko-inĩ ma Hazaeli, mũthamaki wa Suriata, o na ma Beni-hadadi, mũrũ wa Hazaeli, matukũ maingĩ.
• 4. Nake Jehoahazu agĩthaitha Jehova amũteithie, nake Jehova akĩmũigua; nĩ gũkorũo nĩonire ũrĩa Aisiraeli maahinyĩrĩirio, o ũrĩa mũthamaki wa Suriata aamahinyĩrĩirie.
• 5. (Nake Jehova akĩhe andũ a Isiraeli mũhonokia, na tondũ ũcio magĩtiga gwathwo nĩ Asuriata; nacio ciana cia Isiraeli igĩgĩcoka gũtũũra o mũndũ hema-inĩ yake, o ta tene.
• 6. No rĩrĩ, o na gwatuĩka nĩ ũguo, itiigana gũtigana na mehia ma nyũmba ya Jeroboamu, marĩa aatũmire Aisiraeli o nao mehie nĩ ũndũ wamo; no nĩmaatũũrire mamarũmĩrĩire; o na ningĩ kũu Samaria gũgĩtũũra kũrĩ o Ashera.)
• 7. Jehoahazu ndaatigĩirio andũ a ita tiga o mĩrongo ĩtano arĩa maathiaga mahaicĩte mbarathi, na ngiri ikũmi arĩa maathiaga na magũrũ, o hamwe na ngari cia ita ikũmi; nĩ ũndũ mũthamaki wa Suriata nĩaamaninĩte o kũmanina biũ, akamatua o ta mũũngũ wa kĩhuhĩro-inĩ.
• 8. Na rĩrĩ, ciĩko iria ingĩ cia Jehoahazu, o na maũndũ mothe marĩa ekire, o na hinya ũrĩa aarĩ naguo-rĩ, anga matiandĩkĩtwo ibuku-inĩ rĩa maũndũ ma ihinda rĩa athamaki a Isiraeli?
• 9. Nake Jehoahazu agĩgĩkoma hamwe na maithe; nao andũ makĩmũthika kũu Samaria; nake Joashu, mũrũwe, agĩthamaka ithenya rĩake.
• 10. Na rĩrĩ, mwaka wa mĩrongo ĩtatũ na mũgwanja ĩrĩa Joashu mũthamaki wa Juda aakorirũo athamakĩte, nĩguo Jehoashu, mũrũ wa Jehoahazu, aambĩrĩirie gũthamakĩra Isiraeli kũu Samaria, agĩthamaka mĩaka ikũmi na ĩtandatũ.
• 11. Nake agĩgĩĩka maũndũ marĩa monagwo marĩ moru nĩ Jehova; na ndaigana gũtigana na mehia mothe ma Jeroboamu wa Nebati, marĩa ehirie na agĩtũma Aisiraeli o nao mehie nĩ ũndũ wamo; no nĩaamarũmĩrĩire.
• 12. Na rĩrĩ, ciĩko iria ingĩ cia Joashu, o na maũndũ mothe marĩa ekire, o na hinya ũrĩa aahũranire naguo na Amazia mũthamaki wa Juda-rĩ, anga matiandĩkĩtwo ibuku-inĩ rĩa maũndũ ma ihinda rĩa athamaki a Isiraeli?
• 13. Nake Joashu agĩgĩkoma hamwe na maithe; nake Jeroboamu agĩikarĩra gĩtĩ gĩake kĩa ũnene; nake Joashu agĩthikwo kũu Samaria hamwe na athamaki a Isiraeli.
• 14. Na rĩrĩ, Elisha akĩrũara mũrimũ ũrĩa wagĩire kũmũũraga; nake Joashu, mũthamaki wa Isiraeli, agĩikũrũka agĩthiĩ harĩ we, akĩmũrĩrĩra, akiuga, Wũi baba, wũi baba-ĩ! Nĩwe ũrarĩ ngari cia Isiraeli o na andũ arĩa mathiaga mahaicĩte mbarathi ciakuo.
• 15. Nake Elisha akĩmwĩra atĩrĩ, Oya ũta o na mĩguĩ; nake agĩkĩoya ũta o na mĩguĩ.
• 16. Nake akĩĩra mũthamaki wa Isiraeli atĩrĩ, Rĩu nyita ũta na guoko; nake akĩũnyita. Nake Elisha akĩigĩrĩra moko make igũrũ rĩa moko ma mũthamaki.
• 17. Agĩcoka akĩmwĩra atĩrĩ, Hingũra ndirica ya mwena wa irathĩro; nake akĩmĩhĩngũra. Hĩndĩ ĩo Elisha akĩmwĩra atĩrĩ, Ikia mũguĩ; nake akĩũikia. Agĩcoka akiuga atĩrĩ, Ũcio nĩ mũguĩ wa Jehova wa gũtorania, naguo ũguo nĩ ta kuuga mũguĩ wa gũtoria bũrũri wa Suriata; nĩ ũndũ nĩũkahũra Asuriata o kũu Afeki, o nginya ũmanine biũ.
• 18. Agĩcoka akiuga atĩrĩ, Ta coka woe mĩguĩ ĩo, nake agĩkĩmĩoya. Hĩndĩ ĩo Elisha akĩĩra mũthamaki wa Isiraeli atĩrĩ, Ta mĩgũthithie thĩ, nake akĩmĩgũthithia thĩ gatatũ, agĩtiga.
• 19. Nake mũndũ ũcio wa Ngai agĩtũkũyana nĩ ũndũ wake, akiuga atĩrĩ, Ũkwagĩrĩirũo nĩ kũmĩgũthithia thĩ maita matano kana matandatũ; ũngĩeka ũguo-rĩ, ũngĩkahũra bũrũri ũcio wa Suriata o nginya ũũnine biũ; no rĩrĩ, rĩu ũkahũra Suriata o mahinda matatũ.
• 20. Nake Elisha agĩgĩkua, nao andũ makĩmũthika. Na rĩrĩ, mbũtũ cia ita cia Amoabi igĩtonya bũrũri ũcio wa Isiraeli mwaka ũyũ ũngĩ ũkĩambĩrĩrio.
• 21. Na gũgĩkinya atĩrĩ, atĩ hĩndĩ ĩrĩa andũ maathikaga mũndũ ũmwe mũkuũ-rĩ, makĩona mbũtũ ĩmwe yacio ĩgĩũka; mũndũ ũcio magĩkĩmũikia mbĩrĩra-inĩ ya Elisha; nake ũcio mũkuũ aahutia mahĩndĩ ma Elisha-rĩ, akĩriũka o rĩmwe, akĩrũgama na igũrũ.
• 22. Nake Hazaeli, mũthamaki wa Suriata, akĩhinyĩrĩria Isiraeli matukũ mothe ma Jehoahazu.
• 23. No rĩrĩ, Jehova nĩaatũmire makinyĩrũo nĩ wega wake, agĩkĩmaiguĩra tha, o na akĩmaconokera nĩ ũndũ wa kĩrĩkanĩro gĩake kĩrĩa aarĩkanĩire na Iburahimu na Isaaka na Jakubu, akĩrega kũmanina biũ, kana kũmaingata mehere mbere yake hĩndĩ ĩo.
• 24. Nake Hazaeli, mũthamaki wa Suriata, agĩgĩkua; nake Beni-hadadi, mũrũwe, agĩthamaka ithenya rĩake.
• 25. Na rĩrĩ, Jehoashu, mũrũ wa Jehoahazu, agĩcoka gũtunya Beni-hadadi, mũrũ wa Hazaeli, matũũra marĩa Hazaeli aatunyĩte ithe Jehoahazu na ũndũ wa kũrũa mbaara nake, akĩmacokithia gwĩ Isiraeli. Nake Joashu akĩmũhũrĩra mbaara-inĩ mahinda matatũ o akĩmũtoragia; namo matũũra macio ma Aisiraeli magĩcokithio harĩ o nĩwe.

Home