Go Back

2 Athamaki Chapter 12

• 1. Na rĩrĩ, mwaka wa mũgwanja ĩrĩa Jehu aakorirũo athamakĩte-rĩ, nĩguo Jehoashu aambĩrĩirie gũthamaka; agĩgĩthamaka mĩaka mĩrongo ĩna kũu Jerusalemu; nake nyina etagwo Zibia, wa kũu Biri-shiba.
• 2. Nake Jehoashu agĩĩka maũndũ marĩa monagwo marĩ mega nĩ Jehova ihinda rĩrĩa rĩothe Jehoiada, mũthĩnjĩri-Ngai, aamũtaaraga.
• 3. No rĩrĩ, matĩri ma kũndũ gũtũũgĩra matiigana kweherio; andũ no maatũire marutagĩra magongona matĩri-inĩ macio, o na magacinagĩra ũbumba kuo.
• 4. Nake Jehoashu agĩkĩĩra athĩnjĩri-Ngai atĩrĩ, Mbia ciothe cia indo iria ciamũrĩtwo iria itwaragwo nyũmba ya Jehova, ingĩkorũo nĩ mbia cia andũ arĩa mahĩtũkaga magĩtarũo mũndũ o mũndũ, o na kana mbia cia andũ o ta ũrĩa mũndũ o mũndũ atuĩrĩirũo arute, o na kana mbia iria ciothe mũndũ akoragwo eyendeire kũruta na ngoro yake cia gũtwarũo nyũmba ya Jehova, icio ciothe-rĩ,
• 5. athĩnjĩri-Ngai nĩmacioe mathiĩ nacio, o mũndũ oe iria anengeretwo nĩ mũndũ ũrĩa moyaine nake; nao mathondeke nyũmba kũndũ kũrĩa gũtharũkĩte, o handũ harĩa hothe hangĩkorũo harĩ hatharũku.
• 6. No rĩrĩ, gũgĩtuĩka atĩ mwaka wa mĩrongo ĩĩrĩ na ĩtatũ ĩrĩa Jehoashu aakorirũo athamakĩte, athĩnjĩri-Ngai acio magĩkorũo matarĩ maathondeka nyũmba ĩo kũndũ kũrĩa gwatharũkĩte.
• 7. Hĩndĩ ĩo mũthamaki Jehoashu agĩĩta Jehoiada mũthĩnjĩri-Ngai, o na athĩnjĩri-Ngai arĩa angĩ, akĩmera atĩrĩ, Nĩ kĩ kĩanagiria mũthondeke nyũmba ĩno ya Jehova kũrĩa gũtharũkĩte? Rĩu tigai kuoya mbia ingĩ mũnengeretwo nĩ andũ arĩa mũũyaine nao; no rĩrĩ, cinenganĩrei nĩguo irutwo cia gũthondeka nyũmba ĩo kũndũ kũrĩa gũtharũkĩte.
• 8. Nao athĩnjĩri-Ngai magĩĩtĩkĩra gũtiga gũcoka kũhothithia mbia ingĩ harĩ andũ acio arĩ o, o na magĩtiga gũthondekithia nyũmba ĩo kũrĩa gũtharũkĩte o ene.
• 9. No rĩrĩ, Jehoiada mũthĩnjĩri-Ngai akĩoya ithandũkũ, akĩrĩtũra ihoro hengero-inĩ yarĩo, akĩrĩiga mwena-inĩ wa kĩgongona, o mwena wa ũrĩo mũndũ agĩtonya nyũmba ya Jehova; nao athĩnjĩri-Ngai arĩa maaikaragia mũrango wa nyũmba magĩcoka gũikia ho mbia ciothe iria ciatwaragwo nyũmba ya Jehova.
• 10. Na gũgĩtuĩka atĩrĩ, atĩ o hĩndĩ ĩrĩa kwonwo atĩ he mbia nyingĩ ithandũkũ-inĩ-rĩ, mwandĩki-marũa wa mũthamaki o na mũthĩnjĩri-Ngai ũrĩa mũnene magathiĩ kuo, nao magacioha ciothe, magacoka magatara mbia icio mona nyũmba ya Jehova.
• 11. Nao maarĩkia gũthima mbia icio, magacinengera aruti wĩra wakuo, o arĩa maarĩ arori a nyũmba ya Jehova; nao andũ acio magacinengera atharamara, o na abundi arĩa angĩ, o andũ arĩa maarutaga wĩra wa gũthondeka nyũmba ĩo ya Jehova,
• 12. o na aaki na mahiga, o na enji amo; o na magacinenganĩra cia kũgũra mbaũ, o na mihiga maicũhie ma gũthondeka kũndũ kũrĩa nyũmba ĩo ya Jehova yatharũkĩte, o na cia kũgũra indo iria ingĩ ciothe ciabatarainie cia gũthondeka nyũmba ĩo ĩgĩcokererio.
• 13. Na rĩrĩ, ha ũhoro wa mbia icio ciatwaragwo nyũmba ya Jehova-rĩ, itiigana kũrutĩrũo kĩndũ o na kĩmwe gĩa ikombe cia betha, o na kana tũmĩĩhato twa mũrarĩ wa ndambĩ, o na kana mbakũri, kana tũrumbeta, kana kĩndũ o na kĩ gĩa thahabu kana kĩa betha, nĩ ũndũ wa nyũmba ĩo ya Jehova;
• 14. nĩ ũndũ mbia icio cianengerirũo andũ arĩa maarutaga wĩra ũcio, nao magĩgĩcokereria nyũmba ya Jehova nacio.
• 15. O na ningĩ-rĩ, matiigana kũrĩkanĩra na andũ arĩa maanengerirũo mbia icio cia kũhe andũ a wĩra; nĩ ũndũ arutithia a wĩra nĩmehokekete.
• 16. Nacio mbia cia magongona ma ihĩtia, o na ma mehia-rĩ, itiatwaragwo nyũmba ya Jehova; icio ciarĩ cia athĩnjĩri-Ngai.
• 17. Hĩndĩ ĩo Hazaeli, mũthamaki wa Suriata, akĩambata agĩthiĩ Gathu, akĩhũrana narĩo, akĩrĩtunyana; agĩcoka akĩroria ũthiũ wake Jerusalemu nĩguo aambate kuo.
• 18. Nake Jehoashu, mũthamaki wa Juda, akĩoya indo ciothe iria ciamaũrĩtwo igatherio, o iria maithe, Jehoshafatu, na Jehoramu, na Ahazia, athamaki a Juda, maamũrĩte, ii hamwe na indo ciake we mwene iria ciaamũrĩtwo, o na thahabu yothe ĩrĩa yonekire kũndũ kũrĩa kwaigagwo mũthithũ wa indo irĩ bata kũu nyũmba ya Jehova, o na nyũmba ya mũthamaki, agĩcitwarithĩria mũthamaki wa Suriata; nake Hazaeli agĩgĩĩthiĩra, agĩtiga gũthiĩ Jerusalemu.
• 19. Na rĩrĩ, ciĩko iria ingĩ cia Joashu, o na maũndũ mothe marĩa ekire, anga matiandĩkĩtwo ibuku-inĩ rĩa maũndũ ma ihinda rĩa athamaki a Juda?
• 20. Nacio ndungata ciake igĩũkĩra, ikĩgĩa ndundu ya kũmũũkĩrĩra, ikĩũragĩra Joashu o kũu gũkuhĩ na nyũmba ya Milo, o njĩra-inĩ ĩrĩa ĩikũrũkĩte ĩgakinya Sila.
• 21. Nĩ Jozakaru wa Shimeathu na Jehozabadu wa Shomeru, ndungata ciake, maamũhũrire agĩkua; nao andũ makĩmũthika hamwe na maithe, o kũu itũũra rĩa Daudi; nake Amazia, mũrũwe, agĩthamaka ithenya rĩake.

Home