Go Back

2 Athamaki Chapter 1

• 1. NA RĨRĨ, Ahabu aarĩkia gũkua, Amoabi magĩũkĩrĩra Isiraeli, makĩmarema.
• 2. Nake Ahazia akĩgũa thĩ oimĩte ndirica-inĩ ya kanyũmba gake ka igũrũ o kũu Samaria, akĩrũara; agĩkĩrekia andũ, akĩmera atĩrĩ, Thiĩi mũkanduĩrĩrie ũhoro he Baali-zebubu, ngai ya Ekironi, mũmĩũrie kana nĩngũhona ndũari ĩno.
• 3. No mũraika wa Jehova agĩkĩĩra Elija, Mũtishibi, atĩrĩ, Ũkĩra, ũgacemanie na arekio acio a mũthamaki wa Samaria, ũmorie atĩrĩ, Nĩ Ngai gũtarĩ thĩinĩ wa Isiraeli, atĩ nĩkĩo mũgũthiĩ gũtuĩria ũhoro he Baali-zebubu, ngai ya Ekironi?
• 4. Tondũ ũcio rĩu Jehova oiga ũũ: Ndũngiuma ũrĩrĩ ũcio ũhaicĩte; no ti-itherũ nĩũgũkua. Nake Elija agĩĩthiĩra.
• 5. Nao arekio acio magĩgĩcoka he mũthamaki; nake akĩmoria atĩrĩ, Kaĩ mwakĩhũndũka nĩ ũndũ kĩ?
• 6. Magĩkĩmwĩra ũũ: Nĩ mũndũ ũũkire aacemania na ithuĩ, aatwĩra atĩrĩ, Hũndũkai mũcoke he mũthamaki ũcio ũmũrekirie, mũmwĩre atĩrĩ, Jehova oiga ũũ: Nĩ Ngai gũtarĩ thĩinĩ wa Isiraeli atĩ nĩkĩo ũkũrekia andũ magatuĩrie ũhoro he Baali-zebubu, ngai ya Ekironi? Tondũ ũcio ndũngiuma ũrĩrĩ ũcio ũhaicĩte; no ti-itherũ nĩũgũkua.
• 7. Nake agĩkĩmoria atĩrĩ, Mũndũ ũcio ũcemanirie na inyuĩ, aamũhe ũhoro ũcio-rĩ, egũtariĩ atĩa?
• 8. Makĩmũcokeria atĩrĩ, Nĩ mũndũ ũkwĩhumbĩte gĩthii, na akeoha mũkwa njohero. Nake agĩkiuga atĩrĩ, Ũcio nĩ Elija, Mũtishibi.
• 9. Hĩndĩ ĩo mũthamaki agĩkĩmũrekeria mũnene wa athigari mĩrongo ĩtano, e na athigari ake mĩrongo ĩtano, nake akĩambata agĩkinya harĩ we; na atĩrĩrĩ, aakorirũo aikarĩte o gacũmbĩrĩ ga kĩrĩma. Nake agĩkĩmwarĩria, akĩmwĩra ũũ: Atĩrĩrĩ, wee mũndũ ũyũ wa Ngai, mũthamaki witũ oiga atĩrĩ, Ikũrũka.
• 10. Nake Elija agĩcokia akĩĩra mũnene ũcio wa athigari mĩrongo ĩtano atĩrĩ, Ingĩkorũo ndĩ mũndũ wa Ngai-rĩ, mwaki nĩũikũrũke uume igũrũ, ũkũninanĩrie na mĩrongo ĩo yaku ĩtano. Hagĩgĩikũrũka mwaki uumĩte igũrũ, ũkĩmũninanĩria na mĩrongo ĩo yake ĩtano.
• 11. Ningĩ mũthamaki akĩmũrekeria mũnene ũngĩ wa athigari mĩrongo ĩtano na mĩrongo yake ĩtano. Nake mũnene ũcio akĩmwĩra atĩrĩ, Wee mũndũ ũyũ wa Ngai, mũthamaki witũ oiga atĩrĩ, Ikũrũka narua.
• 12. Nake Elija akĩmũcokeria akĩmwĩra atĩrĩ, Ingĩkorũo ndĩ mũndũ wa Ngai-rĩ, mwaki nĩũikũrũke uume igũrũ, ũkũninanĩrie na mĩrongo ĩo yaku ĩtano. Naguo mwaki wa Ngai ũgĩikũrũka uumĩte igũrũ, ũkĩmũninanĩri na mĩrongo ĩo yake ĩtano.
• 13. Ningĩ akĩrekia mũnene ũngĩ wa gatatũ wa athigari mĩrongo ĩtano, na mĩrongo yake ĩtano. Nake mũnene ũcio wa athigari mĩrongo ĩtano wa gatatũ akĩambata, agĩthiĩ akĩmũturĩria ndu, akĩmũthaitha, akĩmwĩra ũũ: Atĩrĩrĩ, wee mũndũ ũyũ wa Ngai, ndagũthaitha, ũreke muoyo wakwa, o na mĩoyo ya ndungata ici ciaku mĩrongo ĩtano, yonwo ta ĩrĩ kĩndũ kĩĩ bata mũno nĩwe.
• 14. Nĩnjũĩ atĩ nĩharokĩte mwaki uumĩte igũrũ, ũranina anene acio erĩ a athigari mĩrongo ĩtano hamwe na athigari ao mĩrongo ĩtano ĩtano; no rĩrĩ, reka muoyo wakwa wonwo ta ũrĩ kĩndũ kĩĩ bata mũno nĩwe.
• 15. Nake mũraika wa Jehova agĩkĩĩra Elija atĩrĩ, Ikũrũka ũtwarane nake; na ndũkamwĩtigĩre. Nake agĩgĩũkĩra, agĩikũrũka agĩtwarana nake, magĩgĩkinya he mũthamaki.
• 16. Nake Elija akĩmwĩra atĩrĩ, Jehova cigĩte ũũ: Tondũ ũtũmĩte andũ magatuĩrie ũhoro he Baali-zebubu, ngai ya Ekironi-rĩ, nĩ Ngai gũtarĩ thĩinĩ wa Isiraeli wa gũtuĩria ũhoro harĩ we? Tondũ wa ũguo wĩkĩte, ndũkoima ũrĩrĩ ũcio ũhaicĩte; no ti-itherũ nĩũgũkua.
• 17. Nake agĩgĩkua o ta ũrĩa uuge wa Jehova watariĩ ũcio warĩtio nĩ Elija. Nake Jehoramu, mũrũ wa ithe, akĩambĩrĩria gũthamaka ithenya rĩake o mwaka wa ĩĩrĩ ĩrĩa Jehoramu, mũrũ wa Jehoshafatu, aakorirũo athamakĩire Juda nĩ ũndũ Ahazia ndaarĩ na mwana wa kahĩĩ.
• 18. Na rĩrĩ, ciĩko iria ingĩ cia Ahazia-rĩ, anga itiandĩkĩtwo ibuku-inĩ rĩa maũndũ ma ihinda rĩa athamaki a Isiraeli?

Home