Go Back

1 Athamaki Chapter 7

• 1. Ningĩ Suleimani aaninire mĩaka ikũmi na ĩtatũ agĩaka nyũmba yake we mwene, agĩkĩrĩkia nyũmba ĩo yake yothe.
• 2. O na ningĩ agĩaka nyũmba ĩĩtagwo nyũmba ya kĩrĩti kĩa Lebanoni; nakuo kũraiha kwayo ĩkĩgiĩ kwarĩ mĩkono igana rĩmwe, o nakuo kwarama kwayo kwarĩ mĩkono mĩrongo ĩtano, o nakuo kũraiha na igũrũ kwayo kwarĩ mĩkono mĩrongo ĩtatũ, nayo thĩinĩ yarĩ na mĩhari ĩna ya itugĩ cia mĩtarakwa, na gũkagĩa mĩtĩ mĩtungu mĩraya ya mĩtarakwa ĩigĩrĩirũo igũrũ rĩa itugĩ icio.
• 3. Nayo nyũmba ĩo ĩkahumbwo igũrũ na mbaũ cia mĩtarakwa, o kũu kwarĩ mĩtĩ ĩo mĩtungu mĩraya mĩrongo ĩna na ĩtano, o ĩo yarĩ igũrũ rĩa itugĩ icio cia mĩtarakwa; nacio itugĩ icio ciahandĩtwo ikũmi na ithano o mũhari ũmwe.
• 4. Na rĩrĩ, nĩkwarĩ mĩhari ĩtatũ ya ndirica cia gũtonyeria ũtheri, igĩgĩkorũo iringanĩte ithatũ ithatũ.
• 5. Nayo mĩrango yothe o na hingĩro ciayo ciathondeketwo irĩ thikwea; nacio ndirica icio cia gũtonyeria ũtheri igĩkorũo iringanĩte ithatũ ithatũ.
• 6. Ningĩ agĩthondekithia gĩthaku kĩayo na itugĩ; nakuo kũraiha gwakĩo gĩkĩgiĩ kwarĩ mĩkono mĩrongo ĩtano, nakuo kwarama gwakĩo kwarĩ mĩkono mĩrongo ĩtatũ, na gũkagĩa gĩthaku kĩngĩ mbere ya itugĩ icio, o na itugĩ ingĩ hamwe na mĩtĩ mĩtungu mbere yacio.
• 7. Ningĩ agĩthondekithia gĩthaku gĩa kũigagwo gĩtĩ kĩa ũnene kĩrĩa angĩgaikarĩra agĩcira, naguo ũguo nĩ ta kuuga gĩthaku gĩa gũtuithanagĩria cira; nakĩo gĩkĩhumbwo tuuco tuothe na mbaũ cia mĩtarakwa.
• 8. Nayo nyũmba yake ĩrĩa angĩgatũũra akĩmĩaka mwena wa na thĩinĩ wa nja ĩo ĩngĩ yarĩ gĩthaku, mbere ya gĩthaku kĩu, na ĩkĩrutĩrũo wĩra wa mũthemba o ro ũmwe nakĩo. O na ningĩ agĩakĩra mwarĩ wa Firauni nyũmba, (o ũcio Suleimani aahikĩtie,) nayo nyũmba ĩo ĩgĩgĩakwo ĩtariĩ o ta gĩthaku kĩu.
• 9. Nyũmba icio ciothe ciaakĩtwo na mahiga me goro kuuma o gĩtina-inĩ nginya mahiga-inĩ ma igũrũ; naguo ũguo nĩ ta kuuga mahiga maicũhie o ta ũrĩa mũthimĩre wamo watariĩ, na magaatũrũo na mĩthumeno kũndũ guothe thĩinĩ o na na nja; naguo mwena wa na nja ũguo noguo wekĩtwo, o nginya nja ĩrĩa nene.
• 10. Nacio itina cia nyũmba icio ciothe ciarĩ cia mahiga me goro mũno, manene mũno, ma mĩkono ikũmi, na ma mĩkono ĩnana magĩthimwo.
• 11. Ningĩ igũrũ rĩa itina cia nyũmba icio gwakĩtwo na mahiga me goro mũno, naguo ũguo nĩ ta kuuga mahiga maicũhie o ta ũrĩa mũthimĩre wamo watariĩ, o na mbaũ cia mĩtarakwa.
• 12. Nayo nja ĩo nene kũrigicĩria mĩena yothe, yairigĩtwo na mĩhari ĩtatũ ya mahiga maicũhie, o na mũhari ũmwe wa mbaũ ndungu cia mĩtarakwa, ĩkahaana o ta nja ĩrĩa ya thĩinĩ ya nyũmba ya Jehova, o na gĩthaku kĩa nyũmba ĩo.
• 13. Ningĩ Suleimani mũthamaki akĩrekania kwĩ Hiramu, akĩmũgĩrithia Turo.
• 14. Nake aakĩrĩ mũrũ wa mũtumia wa ndigwa wa mũhĩrĩga wa Nafitali, na ithe aarĩ mũndũ wa kũu Turo, mũturi wa icango; nake aakĩrĩ mũũgĩ mũno, o na akamenya maũndũ, na akohĩgĩrĩra ũthondeki wa indo cia mĩthemba yothe ya gĩcango. Nake agĩgĩkinya he Suleimani, mũthamaki, akĩmũrutĩra wĩra wake wothe.
• 15. Nĩ ũndũ nĩaathondekire itugĩ iria igĩrĩ cia icango, cia mĩkono ikũmi na ĩnana kĩmwe kĩmwe nacio cierĩ igĩthĩmwo-rĩ, ciarigicĩirio rũrigi, rũgĩtuĩka rũa mĩkono ikũmi na ĩĩrĩ.
• 16. Agĩthondeka ciongo igĩrĩ irĩ mũnduru cia gĩcango gĩtweketio, cia kũigĩrĩrũo itugĩ-inĩ icio o kũu igũrũ; nakĩo kĩongo kĩmwe gĩacio kĩarĩ kĩa mĩkono ĩtano kũraiha na igũrũ, o nakĩo kĩrĩa kĩngĩ kĩarĩ kĩa mĩkono ĩtano kũraiha na igũrũ o ro ũguo.
• 17. Ningĩ hakĩgĩa inyamũ itumanĩtio ta rũgara, na mĩhĩndo mĩceke ĩgathĩkanĩtio ta irengeri, cia gwĩkĩrũo ciongo-inĩ cia itugĩ-inĩ icio igũrũ mũgwanja igĩĩkĩrũo kĩongo-inĩ kĩmwe, na ingĩ mũgwanja igĩĩkĩrũo kĩongo-inĩ kĩu kĩngĩ.
• 18. Ũguo nĩguo aathondekire itugĩ icio; ningĩ hakĩgĩa mĩhari ĩĩrĩ ya makomamanga ĩrigicĩirie mũnyamũ ũmwe wa ĩo ĩtumanĩtio ta rũgara, nĩguo ĩhumbe kĩongo kĩu gĩa gĩcango kĩarĩ gĩtugĩ-inĩ igũrũ, naguo ũguo noguo ekire kĩongo-inĩ kĩu kĩngĩ gĩa gĩcango.
• 19. Nacio ciongo icio ciarĩ igũrũ rĩa itugĩ icio cia gĩthaku-inĩ-rĩ, ciagemetio na mũhianĩre wa mahũa matariĩ ta itoka, nacio ciarĩ cia mĩkono ĩna.
• 20. O na ningĩ itugĩ-inĩ icio cierĩ igũrũ, kwarĩ ciongo ciacithiũrũrũkĩrie, ciakuhanĩrĩirie na handũ harĩa itugĩ itunguhĩire o hau hakuhĩ na kĩnyamũ kĩu gĩtumanĩtio ta rũgara; namo makomamanga maarĩ magana merĩ mekĩrĩtwo mĩhari mĩhari ciongo-inĩ icio cierĩ, o kũu igũrũ ĩcithiũrũrũkĩirie.
• 21. Agĩkĩhanda itugĩ icio gĩthaku-inĩ kĩa hekarũ; nakĩo gĩtugĩ kĩa mwena wa ũrĩo aakĩhanda, agĩgĩtua Jakini; o nakĩo gĩtugĩ kĩa mwena wa ũmotho, aakĩhanda-rĩ, agĩgĩtua Boazu.
• 22. Nakuo itugĩ-inĩ icio igũrũ kwarĩ mũhianĩre wa mahũa matariĩ ta itoka ũguo nĩguo wĩra wa gũthondeka itugĩ icio warĩkirio.
• 23. Ningĩ agĩthondeka itangi rĩrĩa rĩĩtagwo karia ga gĩcango gĩtweketio, rĩa mĩkono ikũmi mwena ũmwe o nginya mwena ũrĩa ũngĩ, narĩo rĩarĩ gĩthiũrũrĩ; ningĩ kũraiha na igũrũ kwarĩo kuuma o gĩtina-inĩ-rĩ, kwarĩ mĩkono ĩtano; narĩo rĩathimwo gĩthiũrũrĩ kĩarĩo-rĩ, rĩarigicĩirio rũrigi rũa mĩkono mĩrongo ĩtatũ.
• 24. Na mũhurahuro wa mũthia-inĩ warĩo hanini kũrigicĩria, nĩ mĩhianano ya maage rĩekĩrĩtwo ĩkarĩthiũrũrũkĩria, o ikũmi mũkono-inĩ ũmwe, nayo nĩ kũrigicĩria yarigicĩirie karia kau na ndwere ciothe; nayo mĩhianano ĩo ya maage yekĩrĩtwo mĩhari ĩĩrĩ, namo maatwekanĩirio nako rĩrĩa gaatwekirio.
• 25. Nako karia kau kaaigĩrĩirũo igũrũ rĩa mĩhianano ya ndegwa ikũmi na igĩrĩ, ithatũ ciacio ikarora mwena wa gathigathini, na ithatũ ikarora mwena wa ithũĩro, nacio ithatũ ikarora mwena wa gũthini, o nacio iria ingĩ ithatũ ikarora mwena wa irathĩro; nako karia kau gagakĩigĩrĩrũo igũrũ rĩacio, nacio ciĩga ciacio ciothe cia na thutha ciarorete na kũu thĩinĩ.
• 26. Naguo ũtungu wa gĩcango gĩako waiganaine na rũhĩ kwarama; nayo mĩthia-inĩ yako yathondeketwo o ta mĩthia ya gĩkombe, ĩĩyunĩte o ta mĩthia ya itoka; nako kaaiganagĩra maĩ ma mbathi ngiri igĩrĩ.
• 27. Ningĩ agĩthondeka inyamũ ikũmi cia gĩcango itariĩ ta ngari, nakĩo kĩnyamũ kĩmwe kĩarĩ kĩa mĩkono ĩna kũraiha gĩkĩgiĩ; o na kwarama gwakĩo kwarĩ mĩkono ĩna o ro ũguo; na kũraiha na igũrũ gwakĩo kwarĩ mĩkono ĩtatũ.
• 28. Nakuo gũthondekwo kwa inyamũ icio gwatariĩ ũũ: nĩ gwĩkĩrũo ciekĩrĩtwo ithuma; o na ningĩ kwarĩ thanju njeke ciekĩrĩtwo gatagatĩ-inĩ ga ithuma icio;
• 29. ningĩ kwarĩ mĩhianano ya mĩrũthi, na ya ndegwa, o na ya makerubi, makurure ithuma-inĩ icio ciarĩ gatagatĩ-inĩ ga thanju icio na ningĩ hau igũrũ rĩa thanju icio nĩho haarĩ kĩgũrũ gĩa gũikarĩrũo nĩ kĩnyũngũ ningĩ mwena wa mũhuro wa mĩhianano ĩo ya mĩrũthi na ya ndegwa, gũkagĩa mĩhĩndo mĩceke yagathĩkanĩtio ĩcunjurĩte.
• 30. Nakĩo kĩnyamũ kĩmwe gĩa icio ciahaanaga ta ngari kĩarĩ na magũrũ mana ma gĩcango ta ma ngari, o nayo mĩtĩ yamo ya kũmarathĩkania yarĩ ya gĩcango; ningĩ mĩthia-inĩ ĩna ya mĩtĩ ĩo kwarĩ mĩtĩ ya gĩcango ya kũmĩnyitĩrĩra; ningĩ mũhuro wa kĩnyũngũ haathondeketwo moko ma kũmĩnyitĩrĩra, namo maanyitithanĩtio nayo o itwekerio-inĩ rĩayo; namo maarĩ na mĩhĩndo mĩceke mĩena-inĩ yamo o kĩmwe kĩmwe.
• 31. Nakuo kwarama na igũrũ gwa kanua ga kĩnyũngũ kĩu gũgĩthimwo gatagatĩ ga gĩthiũrũrĩ kĩu gĩa gĩcango kĩmĩrigicĩirie-rĩ, kwarĩ mũkono ũmwe; naguo mũromo wakĩo warĩ gĩthiũrũrĩ ũiganĩte o ta ũrĩa kĩgũrũ kĩu kĩaigĩrĩirũo ho gĩatariĩ, ũgagĩtuĩka wa mũkono ũmwe na nuthu ũgĩthimwo; na ningĩ hau kanua-inĩ kayo nĩhaakururĩtwo mĩhianano, ningĩ ithuma ciakĩo ciathondeketwo irĩ thikwea, itiarĩ gĩthiũrũrĩ.
• 32. Namo magũrũ macio mana ta ma ngari maarĩ mũhuro wa ithuma icio cia mĩena-inĩ; o nayo mĩtĩ ya kũnyitithania magũrũ macio yarĩ gĩtina-inĩ; nakuo kũraiha na igũrũ gwa kũgũrũ kũmwe kũmwe gũgĩthimwo kwarĩ mũkono ũmwe na nuthu.
• 33. Nakuo gũthondekwo kwa magũrũ macio gwatariĩ o ta ũrĩa kũgũrũ kwa ngari ya ita gũthondekagwo; nayo mĩtĩ yamo ya kũmanyitithania, o na mĩtĩ ĩrĩa mĩhace ya gĩthiũrũrĩ, o na mĩtĩ ya kũnyitithania mĩtĩ ĩo na mũtĩ wa gatagatĩ, o naguo mũtĩ ũcio wa gatagatĩ ki guo mwene, ĩo yothe yathondeketwo na gĩcango gĩtweketio.
• 34. Na rĩrĩ, o kũu tuune-inĩ tũna twa ngari icio kwarĩ mĩtĩ ĩngĩ ya gĩcango ĩna ya kũmĩnyitĩrĩra; nayo mĩtĩ ĩo yatwekanĩirio na ngari icio.
• 35. Narĩo igũrũ rĩa ngari o ngari haarĩ handũ hathondeketwo gĩthiũrũrĩ, ha nuthu ya mũkono ũmwe hagĩthimwo kwambarara na igũrũ, nacio nyitĩro cia hau igũrũ, o na ithuma ciacio, ciatweketio o ũndũ ũmwe nayo.
• 36. Nayo mĩena-inĩ ya nyitĩro icio ciayo, o na ithuma-inĩ cia mĩena-inĩ yayo, agĩciacũhia mĩhianano ya makerubi, o na ya mĩrũthi, o na ya mĩtende, o ta ũrĩa ithenya rĩonekaga handũ o handũ; nayo mĩena-inĩ yothe hagĩthĩũrũrũkĩrio mĩhĩndo mĩceke yatumanĩtio.
• 37. O ũguo noguo aathondekire ngari icio ikũmi; nacio ciothe ciatwekirio o ũndũ ũmwe, o naguo mũthimĩre wacio warĩ o ũndũ ũmwe, o na mũhianĩre wacio warĩ ũndũ ũmwe.
• 38. Agĩcoka agĩthondeka inyũngũ ikũmi cia gĩcango nakĩo kĩnyũngũ o kĩmwe kĩmwe kĩaiyũragia mbathi mĩrongo ĩna; nacio inyũngũ icio o kĩmwe kĩmwe kĩarĩ kĩa mĩkono ĩna gĩgĩthimwo; nakĩo kĩnyũngũ kĩmwe kĩmwe gĩkĩigĩrĩrũo ngari-inĩ ĩmwe ya icio ikũmi ciathondeketwo.
• 39. Nacio ngari icio agĩciiga ũũ: ithano akĩiga mwena wa ũrĩo wa nyũmba, nacio iria ingĩ ithano agĩciiga mwena wa ũmotho wayo; nako karia kau agĩkaiga mwena wa ũrĩo wa nyũmba ĩo, o mwena wa irathĩro, karorete gũthini.
• 40. Ningĩ Hiramu agĩthondeka nyũngũ, na ihakũri, o na mbakũri. Nake Hiramu agĩkĩrĩkia wĩra ũcio wothe aarutagĩra mũthamaki Suleimani, wa gũthondeka indo cia nyũmba ya Jehova;
• 41. nacio indo icio nĩ itugĩ cierĩ, o na inyamũ igĩrĩ irĩ mũnduru cia ciongo iria ciarĩ itugĩ-inĩ icio igũrũ; o na mĩnyamũ ĩrĩa ĩĩrĩ yatumanĩtio ta rũgara ya kũhumba kũndũ kũu kwĩrĩ kwarĩ mũnduru gwa ciongo icio ciarĩ itugĩ-inĩ icio igũrũ;
• 42. o na makomamanga macio magana mana marĩa maarĩ mĩnyamũ-inĩ ĩĩrĩ ĩo yatumanĩtio ta rũgara; gũgĩkĩgĩa mĩhari ĩĩrĩ ya makomamanga yekĩrĩtwo kĩnyamũ-inĩ kĩmwe gĩa icio ciatumanĩtio ta rũgara, ya kũhumba kũndũ kũu kwĩrĩ kwĩ mũnduru gwa ciongo icio ciarĩ itugĩ-inĩ icio igũrũ;
• 43. o na ngari icio ikũmi, o na inyũngũ icio ikũmi ciaigĩrĩirũo ngari-inĩ icio igũrũ;
• 44. o na karia kau kamwe, o na mĩhianĩre ĩo ya ndegwa icio ikũmi na igĩrĩ ĩrĩa yarĩ mũhuro wa karia kau;
• 45. o na nyũngũ, o na ihakũri, o na mbakũri; nacio indo icio ciothe Hiramu aathondekeire mũthamaki Suleimani, cia nyũmba ya Jehova thĩinĩ-rĩ, ciarĩ cia gĩcango gĩthũĩtwo gĩkahenia mũno.
• 46. Na rĩrĩ, werũ-inĩ ũrĩa mwaraganu wa Jorodani nĩkuo mũthamaki aacitwekithĩirie agĩcithondekithia, o kũu gatagatĩ ga Sukothu na Zarethani, handũ harĩa harĩ rĩũmba.
• 47. Nake Suleimani ndathimithirie indo icio ciothe, nĩ ũndũ wa ũrĩa ciaingĩhĩte mũno; ratiri cia gĩcango kĩu-rĩ, itiigana gũtuĩrĩka imenyũo ũrĩa ciigana.
• 48. Nacio indo iria ingĩ ciothe cia kũigwo nyũmba ya Jehova, Suleimani agĩcithondekithia; nacio nĩ kĩgongona kĩrĩa gĩa thahabu, o nayo metha ya thahabu ya mĩgate ĩrĩa yaigagwo mbere ya Jehova;
• 49. nayo mĩtĩ ya kũigĩrĩrũo matawa, ĩtano ĩkĩigwo mwena wa ũrĩo, na ĩngĩ ĩtano ĩkĩigwo mwena wa ũmotho, nyumĩrĩra ya handũ harĩa hatheru mũno, nayo aamĩthondekithirie na thahabu ĩrĩa therie mũno; na mahũa, na matawa, o na mĩĩhato, aacithondekithirie na thahabu o ro ũguo;
• 50. nacio ikombe na tũmĩĩhato tũnini twa mũrarĩ wa ndambĩ, na mbakũri, na iciko, o na ngĩo cia mwaki, aacithondekithirie na thahabu ĩrĩa therie mũno; o na tũnyamũ twa kũnyitithania mĩrango na hingĩro ciayo, o tũu twa mĩrango ya nyũmba ĩo ya thĩinĩ, o ĩo theru mũno, o na twa mĩrango ya nyũmba ĩo nene, ĩo yatuĩtwo hekarũ, aatũthondekithirie na thahabu.
• 51. Ũguo nĩguo wĩra warĩkire, o ũcio mũthamaki Suleimani aarutithirie wa gũthondeka indo cia kũigwo nyũmba ya Jehova. Ningĩ Suleimani agĩtonyithia indo iria Daudi, ithe, aamũrĩire Jehova o kũu nyũmba ĩo thĩinĩ; o betha, na thahabu, o na indo iria ingĩ ciothe, nake agĩciiga kũndũ kũrĩa kwaigagwo mũthithũ wa indo cia bata cia nyũmba ya Jehova.

Home