Go Back

1 Athamaki Chapter 21

• 1. Na rĩrĩ, thutha wa maũndũ macio gũgĩkinya atĩrĩ, atĩ Nabothu, Mũjezireeli, agĩkorũo arĩ na mũgũnda wa mĩthabibu warĩ kũu Jezireeli, gũkuhĩ na nyũmba ya Ahabu, mũthamaki wa Samaria.
• 2. Nake Ahabu agĩkĩaria na Nabothu, akĩmwĩra atĩrĩ, ’He mũgũnda waku wa mĩthabibu, ndĩũtue mũgũnda wa mboga, nĩ ũndũ nĩũkuhanĩrĩirie na nyũmba yakwa; na niĩ nĩngũkũhe mũgũnda ũngĩ wa mĩthabibu mwega gũkĩra ũcio waku ithenya rĩaguo; kana hihi ũngĩona arĩ wega-rĩ, ndakũhe mbia, o ta ũrĩa thogora waguo ũigana.
• 3. Nake Nabothu akĩĩra Ahabu atĩrĩ, Jehova aro’thũũra ingĩkũhe ũgai ũrĩa aa baba maagaire, atĩ ũtuĩke waku.
• 4. Nake Ahabu agĩkĩinũka gwake mũciĩ e na kĩeha mũno, na aiguĩte ũũru, nĩ ũndũ wa ũhoro ũcio erirũo nĩ Nabothu, Mũjezireeli; nĩ ũndũ oigire atĩrĩ, Ndingĩkũhe ũgai ũrĩa mababa maagaire. Nake agĩgĩĩkomia gĩtanda-inĩ gĩake, arorete rũgito, akĩrega kũrĩa irio.
• 5. No rĩrĩ, Jezebeli, mũka, agĩthiĩ harĩ we akĩmũũria atĩrĩ, Nĩ kĩ gĩgĩtũmĩte ũigue ũũru ũũ na ngoro yaku, ũkarega kũrĩa irio?
• 6. Nake akĩmũcokeria atĩrĩ, Nĩ ũndũ nĩ kwaria njarĩtie na Nabothu, Mũjezireeli, ngamwĩra atĩrĩ, ’He mũgũnda waku wa mĩthabibu na niĩ ngũhe mbia; kana ũngĩona arĩ wega, ngũhe mũgũnda ũngĩ wa mĩthabibu ithenya rĩaguo; nake aanjokeria atĩrĩ, Ndingĩkũhe mũgũnda wakwa wa mĩthabibu.
• 7. Nake Jezebeli, mũka, agĩkĩmwĩra atĩrĩ, Na githĩ tiwe mwene ũthamaki wa Isiraeli? Gĩũkĩre ũrĩe irio, na ngoro yaku ĩkene; mũgũnda ũcio wa mĩthabibu wa Nabothu, Mũjezireeli-rĩ, nĩ niĩ ngũkũhe.
• 8. Tondũ ũcio Jezebeli akĩandĩka marũa, akĩmekĩra rĩĩtwa rĩa Ahabu, akĩmacinĩrĩra rũũri rũake igũrũ, namo marũa macio akĩmatwarithĩria athuri o na anene arĩa maatũũranĩtie na Nabothu itũũra-inĩ rĩao.
• 9. Namo marũa-inĩ macio akĩandĩka atĩrĩ, Hunjanĩriai ũhoro wa atĩ andũ mehinge kũrĩa irio; nake Nabothu mũmũtue ta arĩ mũnene thĩinĩ wa andũ;
• 10. mũcoke mũige andũ erĩ, arĩa aaganu mũno, mbere yake, nao marekwo matuĩke aira a kũmũthitaka, moige atĩrĩ, Nĩũrumĩte Ngai, o na mũthamaki witũ. Mũcoke mũmũnyite, mũmũtware na kũu nja ya itũũra, mũmũhũre na mahiga nyuguto, akue.
• 11. Nao andũ a itũũra rĩao, naguo ũguo nĩ ta kuuga athuri o na anene arĩa maatũũranĩtie nake itũũra-inĩ rĩu, magĩĩka o ta ũrĩa Jezebeli aarekanĩtie akamera meke, o ta ũguo marũa maandĩkĩtwo, macio aamatwarithĩirie.
• 12. Magĩkĩhunjanĩria ũhoro atĩ andũ mehinge kũrĩa irio, nake Nabothu, makĩmũtua ta arĩ mũnene thĩinĩ wa andũ.
• 13. Ningĩ andũ acio maathurĩtwo aaganu mũno magĩgĩtonya ho, magĩikara thĩ mbere yake; nao andũ acio aaganu magĩtuĩka aira a kũmũthitaka, magĩgĩthitaka Nabothu mbere ya andũ acio, makiuga atĩrĩ, Nabothu nĩarumĩte Ngai, o na mũthamaki witũ. Agĩkĩnyitwo, akiumio na kũu nja ya itũũra, nake akĩhũrũo na mahiga nyuguto, agĩgĩkua.
• 14. Thutha ũcio hagĩkĩrekanio he Jezebeli, akĩĩrũo atĩrĩ, Nabothu nĩahũrĩtwo na mahiga nyuguto, na nĩakuĩte.
• 15. Na gũgĩkinya atĩrĩ, atĩ Jezebeli aaigua atĩ Nabothu nĩahũrĩtwo na mahiga nyuguto, na atĩ nĩakuĩte-rĩ, agĩkĩĩra Ahabu atĩrĩ, Ũkĩra wĩgwatĩre mũgũnda wa mĩthabibu wa Nabothu, Mũjezireeli, o ũcio aaregire gũkwenderia na mbia, ũtuĩke waku; nĩ gũkorũo Nabothu ndarĩ muoyo, nĩakuĩte.
• 16. Na gũgĩkinya atĩrĩ, atĩ Ahabu aaigua atĩ Nabothu nĩakuĩte-rĩ, agĩgĩũkĩra nĩguo aikũrũke athiĩ mũgũnda wa mĩthabibu wa Nabothu, Mũjezireeli, akawĩgwatĩre ũtuĩke wake.
• 17. Na rĩrĩ, ndũmĩrĩri ya Jehova ĩgĩkinyĩrĩra Elija, Mũtishibi, akĩĩrũo atĩrĩ,
• 18. Ũkĩra ũikũrũke ũkore Ahabu, mũthamaki wa Isiraeli, ũrĩa ũtũũraga Samaria; atĩrĩrĩ, rĩu e mũgũnda wa mĩthabibu ũrĩa ũrarĩ wa Nabothu; aikũrũkĩte akawĩgwatĩre ũtuĩke wake.
• 19. Nawe ũkĩarie nake, ũmwĩre atĩrĩ, Jehova oigĩte ũũ: Githĩ nĩworagana, o na wegwatĩra kĩndũ kĩene? Ũkĩarie nake, ũmwĩre atĩrĩ, Jehova aakiuga ũũ: O handũ hau ngui iracũnĩire thakame ya Nabothu-rĩ, noho ngui igacũnĩra thakame yaku, o yaku we mwene.
• 20. Nake Ahabu agĩkĩũria Elija atĩrĩ, Hĩ! Wee thũ yakwa, anga ningĩ ũgũkĩngora? Nake agĩcokia atĩrĩ, Ĩĩ, nĩngũkorete, nĩ ũndũ nĩwĩtwarĩrĩire wĩki-inĩ wa maũndũ marĩa monagwo marĩ moru nĩ Jehova.
• 21. Atĩrĩrĩ, nĩngũkũrehithĩrie ũũru ũgũcokerere, njikare ta arĩ kũhaata ngũkũhaatithia ũthire biũ; na ’ninĩre Ahabu mwana o wothe wa kahĩĩ, ũrĩa ngombo, o na ũrĩa ũtarĩ ngombo, gũkũ Isiraeli;
• 22. nayo nyũmba yaku ndĩmĩtue o ta nyũmba ya Jeroboamu wa Nebati, o na ta nyũmba ya Baasha wa Ahija, nĩ ũndũ wa ũrĩa ũ’thirĩkĩtie ũkandakaria, na ũgatũma andũ a Isiraeli mehie.
• 23. O naho ha ũhoro wa Jezebeli-rĩ, Jehova agĩkĩaria, akiuga atĩrĩ, Ngui ikarĩĩra Jezebeli o hau rũirigo-inĩ rũa hinya rũa Jezireeli.
• 24. Na rĩrĩ, mũndũ wa Ahabu ũrĩa ũgakuĩra itũũra-inĩ-rĩ, akarĩĩka nĩ ngui; o nake ũrĩa ũgakuĩra gĩthaka-inĩ-rĩ, akarĩĩka nĩ nyamũ cia rĩera-inĩ.
• 25. (No ti-itherũ gũtiarĩ mũndũ ũngĩ o na ũmwe wetwarĩrĩire wĩki-inĩ wa maũndũ marĩa monagwo marĩ moru nĩ Jehova ta Ahabu, nĩ kũhatĩrĩrio nĩ Jezebeli, mũka.
• 26. Tondũ nĩekaga maũndũ me thahu mũno, nĩ ũndũ wa ũrĩa aarũmĩrĩire mĩhianano, o ta ũrĩa maũndũ mothe marĩa mekagwo nĩ Aamori maatariĩ, o acio Jehova aaingatire, akĩmeheria mbere ya ciana cia Isiraeli.)
• 27. Na gũgĩkinya atĩrĩ, atĩ Ahabu aaigua ciugo icio, agĩgĩtembũranga nguo ciake, akĩĩhumba nguo ya ikũnia mwĩrĩ, akĩĩhinga kũrĩa irio, agĩkomera tama wa ikũnia, na agathiaga ecekehetie.
• 28. Nakĩo kiugo kĩa Jehova gĩgĩkinyĩrĩra Elija, Mũtishibi, akĩĩrũo atĩrĩ,
• 29. Nĩũkuona ũrĩa Ahabu enyihĩtie mbere yakwa? Tondũ wa ũguo enyihĩtie mbere yakwa-rĩ, ndirehe ũũru ũcio matukũ-inĩ make; no matukũ-inĩ ma mũriũ, nĩguo ngarehere nyũmba yake ũũru ũcio.

Home