Go Back

1 Athamaki Chapter 18

• 1. Na gũgĩkinya atĩrĩ, atĩ matukũ maingĩ maathira, ndũmĩrĩri ya Jehova ĩgĩkinyĩrĩra Elija, mwaka wa ĩtatũ, akĩĩrũo atĩrĩ, Thiĩ, ũkeyonanie harĩ Ahabu; na thutha wa ũguo nĩngoiria mbura thĩ.
• 2. Elija agĩgĩthiĩ kwĩonania he Ahabu; nayo ng’aragu ĩgĩkorũo ĩĩhĩte mũno kũu Samaria hĩndĩ ĩo.
• 3. Nake Ahabu agĩgĩĩta Obadia, mũrori wa maũndũ mothe ma nyũmba yake. (Nake Obadia ũcio aarĩ mũndũ wĩtigĩrĩte Jehova mũno;
• 4. nĩ ũndũ nĩgwakinyĩte atĩrĩ, atĩ hĩndĩ ĩrĩa Jezebeli oragaga anabii a Jehova amanine biũ-rĩ, Obadia ũcio nĩoire anabii igana rĩmwe, akĩmahitha mĩrongo ĩtano ĩtano ngurunga-inĩ, akamaheaga irio, o na maĩ.)
• 5. Nake Ahabu agĩkĩĩra Obadia atĩrĩ, Thiĩ ũgere bũrũri wothe, ũkinye ithima-inĩ ciothe cia maĩ, o na tũrũũĩ-inĩ tuothe; na hihi no gũkorũo nĩtũkuona nyeki tũhonokie mbarathi, o na nyũmbũ, itigakue, nĩguo tũtikorũo nĩ nyamũ ciitũ ciothe.
• 6. Tondũ ũcio magĩkĩgayana bũrũri ũcio o erĩ, o mũndũ aũhungure mwena wake; Ahabu agĩkĩgera mwena ũmwe e wiki, o nake Obadia akĩgera mwena ũrĩa ũngĩ arĩ o wiki.
• 7. Na rĩrĩa Obadia aarĩ njĩra agĩthiĩ, agĩtũngwo nĩ Elija; akĩmũmenya, akĩĩgũithia agĩturumithia ũthiũ thĩ, akiuga atĩrĩ, Ĩnĩwe mwathi wakwa Elija?
• 8. Nake akĩmũcokeria athĩrĩ, Ĩĩ, nĩ niĩ; gĩthiĩ ũkere mwathi waku ũũ: Atĩrĩrĩ, Elija e gũkũ.
• 9. Nake agĩkiuga atĩrĩ, Kaĩ njĩhĩtie wĩhia ũrĩkũ atĩ nĩkĩo ũkwenda kũ’neana, niĩ ndungata yaku, moko-inĩ ma Ahabu, anjũrage?
• 10. O ta ũrĩa Jehova Ngai waku atũũraga muoyo-rĩ, gũtirĩ rũrĩrĩ o na rũmwe, kana ũthamaki, mwathi wakwa atarekanĩtie ũgacario kuo; na hĩndĩ ĩrĩa moiga atĩ, Ndarĩ gũkũ, akehĩtithia andũ a ũthamaki ũcio, kana rũrĩrĩ rũu, moige na ma atĩ matikuonete.
• 11. Na rĩu wee nawe ũkuuga atĩrĩ, Thiĩ ũkere mwathi waku, Elija e gũkũ!
• 12. Na nĩgũgakinya atĩrĩ, atĩ ndathiĩ o ũguo njehere harĩ wee, Roho wa Jehova egũcoka akuoe, agũtware kũndũ itoĩ; na tondũ ũcio hĩndĩ ĩrĩa ngathiĩ njĩre Ahabu ũhoro ũcio, nake acoke akwage-rĩ, no kũũraga akanjũraga; no rĩrĩ, niĩ, ndungata yaku, ndũire ndĩĩtigĩrĩte Jehova gwata ndĩ o mũnyinyi.
• 13. Kaĩ wee, mwathi wakwa, ũtaakĩheirũo ũhoro wa ũrĩa ndekire hĩndĩ ĩrĩa Jezebeli oragaga anabii a Jehova, ũrĩa ndahithire andũ igana rĩmwe a anabii acio a Jehova, o mĩrongo ĩtano ĩtano, ngurunga-inĩ, na ngamaheaga irio o na maĩ?
• 14. Na rĩu wee nawe ũkũnjĩra ũũ: Thiĩ ũkere mwathi waku atĩrĩ, Elija e gũkũ! Na nĩ kũũraga akanjũraga.
• 15. Nake Elija agĩkiuga atĩrĩ, o ta ũrĩa Jehova, Mũnene wa Ita, atũũraga muoyo, o we ũrĩa niĩ ndũgamaga mbere yake-rĩ, ti-itherũ ndirĩ hingo itekũmwĩonithia o ro ũmũthĩ.
• 16. Tondũ ũcio Obadia agĩgĩthiĩ gũtũnga Ahabu, akĩmũhe ũhoro ũcio; nake Ahabu agĩthiĩ gũtũnga Elija.
• 17. Na gũgĩkinya atĩrĩ, atĩ hĩndĩ ĩrĩa Ahabu onire Elija-rĩ, akĩmũũria atĩrĩ, Ĩ mũnyariri ũyũ wa andũ a Isiraeli nĩwe ũyũ?
• 18. Nake agĩcokia atĩrĩ, Niĩ ndinyarirĩte Isiraeli; no nĩwe ũmanyarirĩte, mwĩ na nyũmba ya thoguo, nĩ ũndũ wa gũtigana na maathani ma Jehova, mũkarũmĩrĩra Mabaali.
• 19. Na rĩu rekania ũnyũnganithĩrie Aisiraeli othe, moke harĩ niĩ o kũu kĩrĩma-inĩ gĩa Karimeli, me hamwe na anabii arĩa a Baali magana mana ma mĩrongo ĩtano, anabii a Ashera magana mana, o acio marĩagĩra irio metha-inĩ ya Jezebeli.
• 20. Tondũ ũcio Ahabu akĩrekania he ciana ciothe cia Isiraeli, akĩũnganithia anabii mathiĩ kĩrĩma-inĩ kĩu gĩa Karimeli.
• 21. Nake Elija agĩgĩthengerera harĩ andũ acio othe, akĩmoria atĩrĩ, Nĩ nginya hĩndĩ ĩ mũgũtũũra mũhindĩte mũgĩthanganĩria njĩra igĩrĩ? Kũngĩkorũo mũgũtua atĩ Jehova nĩwe Ngai-rĩ, kĩmũrũmagĩrĩrei; kana hihi mũngĩkorũo mũgũtua atĩ Baali nĩwe Ngai-rĩ, ĩ mũkĩmũrũmagĩrĩre we. Nao magĩgĩkira ki na matimũcokerie ũndũ o na ũmwe.
• 22. Elija agĩkĩĩra andũ acio atĩrĩ, Niĩ, o niĩ nyiki, no niĩ ndigĩtwo ndĩ mũnabii wa Jehova; no anabii a Baali nĩ magana mana ma mĩrongo ĩtano.
• 23. Tondũ ũcio nĩtũheo ndegwa igĩrĩ; nao marekwo methurĩre ndegwa ĩmwe, mamĩtinangie icunjĩ, mamĩigĩrĩre ngũ igũrũ, na matigekĩre mwaki na thĩ; niĩ na niĩ njoke ’thĩnje ndegwa ĩo ĩngĩ ndĩmĩthondeke, ndĩmĩigĩrĩre ngũ igũrũ, no ndigekĩre mwaki na thĩ.
• 24. Thutha wa ũguo inyuĩ mũkaĩre rĩĩtwa rĩa ngai yanyu, na niĩ ngaĩre rĩĩtwa rĩa Jehova; na rĩrĩ, Ngai ũrĩa ũrĩcokia ũhoro na ũndũ wa kũrehe mwaki-rĩ, ũcio agĩtuĩke nĩwe Ngai. Nao andũ othe magĩgĩcokia makiuga atĩrĩ, Ũhoro ũcio waario nĩ mwega.
• 25. Elija agĩkĩĩra anabii acio a Baali atĩrĩ, Wĩthurĩrei ndegwa ĩmwe, mwambe mũmĩthĩnje mũmĩthondeke, nĩ ũndũ inyuĩ mũrĩ aingĩ; thutha wa ũguo mũkaĩre rĩĩtwa rĩa ngai yanyu, no menyai mwĩkĩre mwaki na thĩ.
• 26. Nao magĩkĩnyita ndegwa ĩrĩa maaheetwo, makĩmĩthĩnja, makĩmĩthondeka, magĩgĩkaĩra rĩĩtwa rĩa Baali kuuma o rũcinĩ nginya o mĩaraho, makiugaga ũũ: Atĩrĩrĩ, Baali, tũigue. No hatiigana kũiguwo mũgambo, kana mũcokia wa ũhoro ũcio. Nao magĩkĩina makĩrũũgarũũgaga kĩgongona-inĩ kĩu gĩathondeketwo magĩthiũrũrũkĩirie.
• 27. Na gũgĩkinya atĩrĩ, atĩ mĩaraho yakinya, Elija akĩmanyũrũria akiuga atĩrĩ, Anĩrĩrai na mĩgambo mĩnene mũno; nĩ ũndũ-rĩ, kaĩ Baali atakĩrĩ ngai? Hihi e na maũndũ areciria, kana agacendũka, kana agathiĩ rũgendo, kana hihi agakoma na no mũhaka aarahũrũo toro.
• 28. Magĩkĩanĩrĩra na mĩgambo mĩnene mũno, magĩĩtemengaga na hiũ, na tũtimũ, ta ũrĩa mũtugo wao watariĩ, o nginya makĩnyũrũrũkĩrũo mũno nĩ thakame.
• 29. Na gũgĩtuĩka atĩrĩ, atĩ o na mĩaraho yahĩtũka magĩikara o ro ũguo makĩhoyaga ngai yao, o nginya ihinda rĩrĩa magongona ma hwaĩ-inĩ marutagwo; no rĩrĩ, gũtiigana kũiguwo mũgambo, kana mũcokia ũhoro o na ũrĩkũ, o na kana mũrũmbũiya waguo.
• 30. Hĩndĩ ĩo Elija agĩkĩĩra andũ othe arĩa maarĩ ho atĩrĩ, Okokai mũnguhĩhĩrie; nao andũ acio othe magĩthiathia makĩmũkuhĩhĩria. Agĩgĩthondeka kĩgongona kĩa Jehova kĩrĩa kĩagũithĩtio thĩ.
• 31. Nake Elija akĩoya mahiga ikũmi na merĩ, o ta ũrĩa mĩhĩrĩga ya ariũ a Jakubu ũrĩa wakinyĩrĩirũo nĩ ũhoro wa Jehova yaiganaga, o we ũrĩa werirũo ũũ: Atĩrĩrĩ, rĩĩtwa rĩrĩa ũrĩĩtagwo nĩ Isiraeli.
• 32. Nake Elija agĩgĩaka kĩgongona gĩa kũgoocithia rĩĩtwa rĩa Jehova na mahiga macio, ningĩ akĩenja mũtaro ũngĩiganĩra ibaba igĩrĩ nene cia mbeũ cia kũhandwo, ũkĩrigicĩria kĩgongona kĩu.
• 33. Agĩkĩara ngũ wega, nayo ndegwa ĩo akĩmĩtinangia icunjĩ, agĩciigĩrĩra ngũ igũrũ. Agĩcoka akiuga atĩrĩ, Iyũriai ndigithũ inya maĩ, mũmaitĩrĩrie ihaki rĩrĩ rĩa njino, o na ngũ igũrũ.
• 34. Ningĩ akiuga atĩrĩ, Ĩkai o ro ũguo ihinda rĩa kerĩ, nao magĩgĩĩka o ro ũguo ihinda rĩa kerĩ. Ningĩ agĩcoka akiuga atĩrĩ, Ĩkai o ro ũguo ihinda rĩngĩ rĩa gatatũ; nao magĩgĩĩka o ro ũguo ihinda rĩa gatatũ.
• 35. Namo maĩ macio magĩthiĩ kĩgongona-inĩ kĩu mbarĩ ciothe; o naguo mũtaro ũcio akĩũiyũria maĩ.
• 36. Na gũgĩkinya atĩrĩ, atĩ ihinda rĩrĩa kũrutagwo igongona rĩa hwaĩĩnĩ, Elija, ũcio mũnabii, agĩthiathia hakuhĩ na kĩgongona kĩu, agĩkiuga ũũ: Wee Jehova, Ngai wa Iburahimu, na wa Isaaka, o na wa Isiraeli, ndagũthaitha ũmenyithanie ũmũthĩ atĩ wee nĩwe Ngai ũrĩa ũrĩ thĩinĩ wa Isiraeli, o na atĩ niĩ ndĩ ndungata yaku, na atĩ njĩkĩte maũndũ maya mothe na uuge waku.
• 37. Njigua, wee Jehova, njigua, nĩ getha andũ aya mamenye atĩ wee, Jehova, nĩwe Ngai, na atĩ nĩwe ũragarũra ngoro ciao igũcokerere.
• 38. Hĩndĩ ĩo mwaki wa Jehova ũgĩkĩgũa, ũgĩcina ihaki rĩu rĩa njino biũ, o na ngũ, o na mahiga, o na rũkũngũ; namo maĩ marĩa maarĩ mũtaro-inĩ, ũkĩmacũna biũ.
• 39. Na rĩrĩ, hĩndĩ ĩrĩa andũ othe arĩa maarĩ ho monire ũndũ ũcio, makĩgũa maturumithĩtie mothiũ thĩ; magĩkiuga atĩrĩ, Jehova, nĩwe Ngai; Jehova, nĩwe Ngai.
• 40. Nake Elija akĩmera, Nyitai anabii a Baali, na mũtikareke o na ũmwe wao ahonoke. Nao magĩkĩmanyita; nake Elija akĩmaikũrũkithia, akĩmatwara karũũĩ-inĩ ga Kishoni, akĩmoragĩra ho.
• 41. Thutha wa ũguo Elija agĩkĩĩra Ahabu atĩrĩ, Ambata ũthiĩ ũkarĩe na ũnyue, nĩ ũndũ he mũhũyũkanio wa mbura nene.
• 42. Tondũ ũcio Ahabu agĩkĩambata akarĩe o na anyue. Nake Elija agĩkĩambata o igũrũ gacũmbĩrĩ ga kĩrĩma kĩu gĩa Karimeli, akĩinamĩrĩra o thĩ, agĩĩkĩra ũthiũ wake gatagatĩ-inĩ ka maru.
• 43. Nake akĩĩra ndungata yake atĩrĩ, Ta ambata rĩu, ũcũthĩrĩrie iria-inĩ. Nake agĩkĩambata, agĩcũthĩrĩria, akiuga atĩrĩ, Hatirĩ kĩndũ. Nake Elija akiuga atĩrĩ, Thiĩ rĩngĩ o nginya ũhingie mathiĩ mũgwanja.
• 44. Na gũgĩkinya atĩrĩ, atĩ ithiĩ rĩa mũgwanja-rĩ, akiuga ũũ: Atĩrĩrĩ! Harĩ itu rĩkwambata na igũrũ riumĩte iria-inĩ, narĩo rĩnyihĩte o ta guoko kwa mũndũ. Nake Elija agĩkiuga atĩrĩ, Ambata, ũkere Ahabu ũũ: Thondekithia ngari yaku narua, ũgĩikũrũke, nĩ getha mbura ndĩgakũgirie ũthiĩ.
• 45. Na gũgĩkinya atĩrĩ, atĩ kahinda kanini gaathira, igũrũ rĩgĩthimba nĩ ũndũ wa matu hamwe na rũhuho, gũgĩkiura mbura nene mũno. Nake Ahabu agĩgĩthiĩ agĩkinya Jezireeli ahaicĩte ngari yake.
• 46. Nakuo guoko kwa Jehova gũkĩgĩa hamwe na Elija, agĩkĩĩhotora njohero, agĩteng’era e mbere ya Ahabu nginya o itonyero-inĩ rĩa Jezireeli.

Home