Go Back

1 Athamaki Chapter 1

• 1. NA RĨRĨ, mũthamaki Daudi agĩgĩkũra, agĩtindikanga mĩaka ma; nao andũ magĩkĩmũhumbĩra na nguo, no ndaigana kũigua ũrugarĩ.
• 2. Tondũ ũcio ndungata ciake igĩkĩmwĩra atĩrĩ, Mũthamaki ũyũ, mwathi witũ, reka hamathwo mũirĩtu gathirange, mwĩthĩ, arekwo arũgamage mbere yaku, wee mũthamaki witũ, akũmenyagĩrĩre; na akomage gĩthũri-inĩ gĩaku, nĩguo wee, mũthamaki ũyũ, mwathi witũ, ũiguage ũrugarĩ.
• 3. Magĩkĩmatha mũirĩtu mũthaka kũndũ guothe bũrũri wa Isiraeli, makĩona Abishagi, Mũshunami, makĩmũtwarĩra mũthamaki.
• 4. Mũirĩtu ũcio aakĩrĩ mũthaka mũno; nake agĩtuĩka mũmenyereri mũthamaki, agakĩmũtungatagĩra; no mũthamaki ndaigana kuonana nake.
• 5. Hĩndĩ ĩo Adonija, mũrũ wa Hagithu, agĩgĩĩtũũgĩria, akiuga atĩrĩ, Nĩ niĩ ngũtuĩka mũthamaki; nake agĩgĩĩthondekera ngari cia ita, o na akĩgĩa na andũ a gũthiaga mahaicĩte mbarathi, ningĩ agĩthondeka ũhoro wa atĩ andũ mĩrongo ĩtano mathiage mbere yake mateng’erete.
• 6. Nake ithe o na mbere ya hĩndĩ ĩo ndarĩ aamũrakaria na ũndũ wa kũmũũria, Wĩkĩte ũna na ũna nĩkĩ? O na ningĩ aarĩ mũndũ mũthaka mũno; na nĩwe waciarĩtwo thutha wa Abisalomu.
• 7. Nake agĩgĩciranĩra na Joabu wa Zeruia na Abiatharu mũthĩnjĩri-Ngai, nao makĩrũmĩrĩra Adonija makĩmũteithia.
• 8. No rĩrĩ, Zadoku mũthĩnjĩri-Ngai, na Benaia wa Jehoiada, na Nathani mũnabii, na Shimei, na Rei, na njamba iria irĩ hinya cia Daudi, matiarĩ rũmwe na Adonija.
• 9. Nake Adonija agĩthĩnjĩra ndũrũme na ndegwa o na nyamũ noru ihiga-inĩ rĩa Zohelethu, rĩrĩa rĩrĩ hakuhĩ na Eni-rogeli; agĩgĩĩta ariũ a ithe othe, naguo ũguo nĩ ta kuuga ariũ a mũthamaki, o na andũ othe a Juda, ndungata cia mũthamaki;
• 10. no rĩrĩ, Nathani mũnabii, na Benaia, o na njamba icio, na Suleimani, mũrũ wa ithe, ndaigana kũmeta.
• 11. Hĩndĩ ĩo Nathani agĩkĩaria na Bathi-sheba, nyina wa Suleimani, akĩmũũria atĩrĩ, Kaĩ ũtaiguĩte atĩ Adonija, mũrũ wa Hagithu, nĩaitĩkĩte gũthamaka, na Daudi, mwathi witũ, ndoĩ ũhoro ũcio?
• 12. Tondũ ũcio ndagũthaitha ũũke, na wĩtĩkĩre ngũhe kĩrĩra, nĩguo wĩhonokie muoyo waku, o na wa mũrũguo Suleimani.
• 13. Ũkĩra ũthiĩ ũtonye he mũthamaki Daudi, ũmũũrie ũũ: Atĩrĩrĩ, mũthamaki ũyũ, mwathi wakwa, githĩ ndwehĩtire ũkĩnjĩra, niĩ ndungata yaku ya mũndũ-wa-nja, ũũ: Ti-itherũ Suleimani, mũrũguo, nĩwe ũgathamaka thutha wakwa, na nĩwe ũgaikarĩra gĩtĩ gĩakwa gĩa ũthamaki? Kaĩ Adonija aagĩthamaka nĩkĩ?
• 14. Na atĩrĩrĩ, hĩndĩ ĩrĩa ũrĩkorũo o kũu ũkĩaria na mũthamaki, niĩ o na niĩ njoke ndonye kuo thutha waku, ngathĩrĩrie ũhoro waku ũcio ũkũmwĩra.
• 15. Bathi-sheba agĩgĩtonya he mũthamaki kanyũmba thĩinĩ; nake mũthamaki aarĩ mũkũrũ mũno, na aatungatagĩrũo nĩ Abishagi, Mũshunami.
• 16. Nake Bathi-sheba agĩkĩinamĩrĩra mũthamaki amwĩnyihĩrie. Mũthamaki agĩkĩmũũria atĩrĩ, Ũkwenda atĩa?
• 17. Nake akĩmwĩra atĩrĩ, Mwathi wakwa, nĩ mwĩhĩtwa wehĩtire ũkoniĩ Jehova Ngai waku, ũkĩnjĩra niĩ ndungata yaku ya mũndũ-wa-nja ũũ: Ti-itherũ Suleimani, mũrũguo, nĩwe ũgathamaka thutha wakwa, na nĩwe ũgaikarĩra gĩtĩ gĩakwa gĩa ũthamaki.
• 18. Na atĩrĩrĩ, rĩu nĩ Adonija ũgĩitĩkĩte gũthamaka, nawe mũthamaki ũyũ, mwathi wakwa, ndũmenyete ũhoro ũcio;
• 19. na rĩu nĩathĩnjithĩtie ndegwa, o na nyamũ iria noru, na ndũrũme, nyingĩ mũno, na nĩetĩte ariũ othe a mũthamaki, na Abiatharu mũthĩnjĩri-Ngai, na Joabu mũnene wa mbũtũ cia ita; no Suleimani ndungata yaku ndamwĩtĩte.
• 20. Nawe rĩu, mũthamaki ũyũ, mwathi wakwa, nĩwe ũcũthĩrĩirio nĩ andũ othe a Isiraeli ũmere mũndũ ũrĩa ũgũikarĩra gĩtĩ gĩaku gĩa ũthamaki thutha waku, wee mũthamaki ũyũ, mwathi wakwa.
• 21. Ũngĩaga gwĩka ũguo-rĩ, nĩgũgakinya atĩrĩ, atĩ hĩndĩ ĩrĩa wee mũthamaki ũyũ, mwathi wakwa, ũgakoma hamwe na mathoguo, niĩ na mũrũ wakwa Suleimani, nĩtũkonwo tũrĩ ehia.
• 22. Na atĩrĩrĩ, hĩndĩ ĩrĩa aaragia na mũthamaki o ro ũguo, Nathani mũnabii agĩgĩtonya kuo.
• 23. Nao andũ magĩkĩhe mũthamaki ũhoro makiuga ũũ: Nathani mũnabii ũyũ. Nake aatonya harĩ mũthamaki, akĩinamĩrĩra mũthamaki, agĩturumithia ũthiũ thĩ.
• 24. Nake Nathani agĩkĩũria ũũ: Atĩrĩrĩ, mũthamaki ũyũ, mwathi wakwa, nĩwe uugĩte ũũ: Adonija nĩwe ũgathamaka thutha wakwa, na nĩwe ũgaikarĩra gĩtĩ gĩakwa gĩa ũthamaki?
• 25. Nĩ ũndũ-rĩ, ũmũthĩ nĩ mũikũrũku, na nĩathĩnjithĩtie ndegwa, o na nyamũ noru, o na ndũrũme, nyingĩ mũno, na nĩetĩte ariũ a mũthamaki othe, na anene a mbũtũ cia ita, o na Abiatharu mũthĩnjĩri-Ngai; na atĩrĩrĩ, rĩu nĩ kũrĩa mararĩa na makanyua maikarĩte mbere yake, makiugaga atĩrĩ, Ngai arotũũria Adonija, mũthamaki witũ!
• 26. No rĩrĩ, niĩ, o niĩ ndungata yaku, na Zadoku mũthĩnjĩri-Ngai, na Benaia wa Jehoiada, na Suleimani ndungata yaku, ndatwĩtĩte.
• 27. Kaĩ ũndũ ũcio ũgĩĩkĩtwo nĩwe, wee mũthamaki ũyũ, mwathi wakwa, na ũkaaga gũtuonia ithuĩ, ndungata ciaku, mũndũ ũrĩa ũngĩikarĩra gĩtĩ gĩaku gĩa ũthamaki thutha waku, mũthamaki ũyũ, mwathi wakwa?
• 28. Hĩndĩ ĩo mũthamaki Daudi agĩgĩcokia akiuga atĩrĩ, Ta njĩtĩrai Bathi-sheba. Nake agĩgĩtonya he mũthamaki, akĩrũgama o hau mbere yake.
• 29. Nake mũthamaki agĩkĩĩhĩta, akiuga atĩrĩ, O ta ũrĩa Jehova atũũraga muoyo, o we ũcio wa’honokirie, akĩnduta mathĩna-inĩ makwa mothe-rĩ,
• 30. ti-itherũ o ta ũrĩa ndehĩtire hĩndĩ ĩo ngĩkwĩra na mwĩhĩtwa ũkoniĩ Jehova Ngai wa Isiraeli, ngiuga ũũ: Ti-itherũ Suleimani, mũrũguo, nĩwe ũgathamaka thutha wakwa, na nĩwe ũgaikarĩra gĩtĩ gĩakwa gĩa ũthamaki ithenya rĩakwa-rĩ, ti-itherũ ũndũ ũcio nĩngũwĩkithia ũmũthĩ.
• 31. Hĩndĩ ĩo Bathi-sheba akĩinamĩrĩra, agĩturumithia ũthiũ thĩ, agĩkumia mũthamaki, akiuga ũũ: Mwathi wakwa, mũthamaki Daudi, arotũũra tene na tene.
• 32. Mũthamaki Daudi agĩkiuga atĩrĩ, Ta njĩtĩra Zadoku mũthĩnjĩri-Ngai, na Nathani mũnabii, o na Benaia wa Jehoiada. Nao magĩkinya mbere ya mũthamaki.
• 33. Mũthamaki agĩkĩmera ũũ: Oyai ndungata ciakwa, niĩ mwathi wanyu, mũhaicithie Suleimani, mũrũ wakwa, nyũmbũ yakwa, mũmũikũrũkie Gihoni.
• 34. Na mwĩ kũu, Zadoku mũthĩnjĩri-Ngai na Nathani mũnabii mamũitĩrĩrie maguta atuĩke mũthamaki wa gũthamakĩra Isiraeli; mũcoke mũhuhe coro muuge atĩrĩ, Ngai arotũũria Suleimani, mũthamaki witũ!
• 35. Mũgĩcoke mwambate mũmuumĩte thutha, agĩũke aikarĩre gĩtĩ gĩakwa gĩa ũthamaki; nĩ ũndũ nĩwe ũgũtuĩka mũthamaki ithenya rĩakwa; na nĩwe nduĩte mũnene wa gwatha Isiraeli o na Juda.
• 36. Nake Benaia wa Jehoiada agĩcokeria mũthamaki, akiuga atĩrĩ, Amen; o nake Jehova Ngai waku, wee mũthamaki ũyũ, mwathi wakwa, nĩoige o ta ũguo.
• 37. O ta ũrĩa Jehova aikarĩte hamwe nawe, mũthamaki ũyũ, mwathi wakwa-rĩ, o ũguo taguo aroikara hamwe na Suleimani, o na atũme gĩtĩ gĩake gĩa ũthamaki kĩnenehe gũkĩra gĩaku, wee mwathi wakwa, mũthamaki Daudi.
• 38. Tondũ ũcio Zadoku mũthĩnjĩri-Ngai, na Nathani mũnabii, na Benaia wa Jehoiada, me na Akerethi na Apelethi, magĩikũrũka, makĩhaicithia Suleimani igũrũ rĩa nyũmbũ ya mũthamaki Daudi, makĩmũtwara Gihoni.
• 39. Nake Zadoku mũthĩnjĩri-Ngai akĩoya rũhĩa rũa gũitanĩrĩria maguta arũrutĩte Hema-inĩ ya Ngai, agĩitĩrĩria Suleimani maguta naruo. Thutha wa ũguo gũgĩkĩhuhwo coro, nao andũ othe magĩkiuga atĩrĩ, Ngai arotũũria Suleimani, mũthamaki witũ!
• 40. Nao andũ othe magĩkĩambata mamuumĩte thutha, makĩhuha mĩtũrirũ, na magĩkena gĩkeno kĩnene, gĩgĩtũma thĩ ĩrurume ta yatũkĩte nĩ ũndũ wa mĩgambo yao.
• 41. Nake Adonija o na ageni othe arĩa maarĩ hamwe nake makĩigua kayũ kau o hĩndĩ ĩrĩa maakorirũo maanina kũrĩa. Na rĩrĩ, Joabu aaigua mũgambo wa coro ũcio, agĩkĩũria atĩrĩ, Ĩ inegene rĩrĩ rĩratũma itũũra rĩrurume nĩ rĩa kĩ?
• 42. Na ihinda o rĩu aaragia, Jonathani, mũrũ wa Abiatharu mũthĩnjĩri-Ngai, agĩũka; nake Adonija akiuga atĩrĩ, Tonya, nĩ ũndũ wĩ mũndũ mwĩhokeku, na nĩ ũhoro mwega warehe.
• 43. Nake Jonathani agĩcokia akĩĩra Adonija atĩrĩ, Ti-itherũ mũthamaki Daudi, mwathi witũ, nĩatuĩte Suleimani mũthamaki;
• 44. nake nĩareketie Zadoku mũthĩnjĩri-Ngai, na Nathani mũnabii, na Benaia wa Jehoiada, me na Akerethi, na Apelethi, nao nĩmamũhaicithĩtie igũrũ rĩa nyũmbũ ya mũthamaki;
• 45. ningĩ Zadoku mũthĩnjĩri-Ngai, na Nathani mũnabii, nĩmamũitĩrĩirie maguta atuĩke mũthamaki marĩ o kũu Gihoni; nao nĩmaambatĩte makoima kũu magĩkenaga mũno, o nginya itũũra rĩkaruruma. Rĩu nĩrĩo inegene rĩrĩa mũiguĩte.
• 46. O na ningĩ rĩu Suleimani nĩaikarĩire gĩtĩ kĩa ũnene gĩa ũthamaki.
• 47. Makĩria ningĩ ndungata cia mũthamaki nĩithiire kũrathimithia mũthamaki Daudi, mwathi witũ, ikiugaga atĩrĩ, Ngai waku aroagĩria rĩĩtwa rĩa Suleimani rĩkĩre rĩĩtwa rĩaku, o nakĩo gĩtĩ gĩake gĩa ũthamaki arokĩnenehia gĩkĩre gĩaku; nake mũthamaki agakĩinamĩrĩra arĩ o hau ũrĩrĩ igũrũ.
• 48. O na ningĩ mũthamaki oiga ũũ: Jehova Ngai wa Isiraeli arogathwo, o we ũrĩa ũheanĩte ũmũthĩ mũndũ wa gũikarĩra gĩtĩ gĩakwa gĩa ũthamaki, o na agatũma maitho makwa meyonere ũndũ ũcio.
• 49. Nao ageni othe a Adonija magĩkĩgwatwo nĩ guoya, magĩgĩũkĩra, makĩhurunjũka.
• 50. Nake Adonija agĩgĩĩtigĩra nĩ ũndũ wa Suleimani; agĩgĩũkĩra, agĩthiĩ, akĩĩnyitĩrĩra hĩa cia kĩgongona.
• 51. Naguo ũhoro ũcio ũkĩheo Suleimani, akĩĩrũo atĩrĩ, Hĩ! Adonija nĩaragwĩtigĩra, wee Suleimani mũthamaki witũ, nĩ gũkorũo enyitĩrĩire hĩa cia kĩgongona, akiugaga atĩrĩ, Mũthamaki Suleimani nĩaambe ehĩte, anjĩre atĩ ndenjũraga na rũhiũ, niĩ ndungata yake.
• 52. Nake Suleimani agĩkiuga atĩrĩ, Angĩkorũo nĩarĩĩonanagia atĩ nĩ mũndũ mwagĩrĩrũ-rĩ, hatirĩ rũcuĩrĩ o na rũmwe rũake rũngĩgũa thĩ; no rĩrĩ, angĩonwo e na waganu, nĩegũkua.
• 53. Tondũ ũcio mũthamaki Suleimani agĩkĩrekania, nao andũ makĩmũikũrũkia makĩmũruta kĩgongona-inĩ kĩu. Nake agĩgĩthiĩ akĩinamĩrĩra mũthamaki Suleimani, akĩmwĩnyihĩria; nake Suleimani akĩmwĩra atĩrĩ, Wĩinũkĩre.

Home