Go Back

2 Samueli Chapter 8

• 1. Na gũgĩkinya atĩrĩ, atĩ thutha wa maũndũ macio, Daudi akĩhũra Afilisiti akĩmatoria biũ; agĩkĩmatunya itũũra rĩao rĩrĩa rĩohete marĩa mangĩ na hinya, agĩgĩathana kuo ithenya rĩao.
• 2. Ningĩ akĩhũra Amoabi, agĩcoka akĩmaara mĩhari makometio thĩ, nao andũ a mĩhari ĩĩrĩ akĩmathura a kũũragwo, na a mũhari ũmwe mũgima a gũtigwo muoyo. Nao Amoabi magĩgĩtuĩka ndungata cia Daudi, makamũrutagĩra igoti.
• 3. Ningĩ Daudi akĩhũra Hadadezeri, mũrũ wa Rehobu, mũthamaki wa Zoba, e ithiĩro rĩa gũcokithia bũrũri wake ũrĩa aatunyĩtwo gũkuhĩ na Rũũĩ rũa Farati.
• 4. Nake Daudi agĩkĩmũtunya andũ ngiri ĩmwe na magana mũgwanja arĩa mathiaga mahaicĩte mbarathi, na andũ arĩa metwaraga na magũrũ ngiri mĩrongo ĩĩrĩ; nacio mbarathi ciao ciothe cia ngari cia ita agĩcitemenga magũrũ agĩcithuithia; no rĩrĩ, nĩaatigirie imwe cia kũigana gũkururagia ngari cia ita igana rĩmwe.
• 5. Na rĩrĩ, hĩndĩ ĩrĩa Asuriata a Dameski maathiire gũteithia Hadadezeri, mũthamaki wa Zoba, Daudi akĩũraga Asuriata ngiri mĩrongo ĩĩrĩ na igĩrĩ thĩinĩ wao.
• 6. Thutha wa ũguo Daudi agĩkĩiga athigari a kũrangĩra kũndũ o kũndũ kũu Suriata ya Dameski; nao Asuriata magĩgĩtuĩka ndungata cia Daudi, makamũrutagĩra igoti. Nake Jehova agĩgĩtũma Daudi ahootane kũndũ guothe kũrĩa aathiaga.
• 7. Nake Daudi akĩoya ngo cia thahabu iria ndungata cia Hadadezeri ciarĩ nacio, agĩcitwara Jerusalemu.
• 8. Ningĩ mũthamaki, ti Daudi, akĩruta icango nyingĩ mũno Beta, na Bethorai, matũũra ma Hadadezeri.
• 9. Na hĩndĩ ĩrĩa Toi, mũthamaki wa Hamathu, aaiguire atĩ Daudi nĩaahũrĩte ita yothe ya Hadadezeri,
• 10. agĩkĩrekia Joramu, mũriũ, he mũthamaki Daudi, akamũgeithie, o na amũrathimithie, nĩ ũndũ wa ũrĩa aarũĩte na Hadadezeri, akamũhũra biũ; nĩ gũkorũo Hadadezeri na Toi nĩmaagĩaga na mbaara kaingĩ. Nake Joramu agĩthiĩ akuuĩte indo cia betha, o na cia thahabu, o na cia icango.
• 11. O nacio indo icio, Daudi agĩciamũrĩra Jehova, igĩgĩturanĩrũo na indo iria ingĩ cia betha, o na cia thahabu, iria aamũrĩire Jehova cia ndũrĩrĩ ciothe iria aahootete;
• 12. nacio indo icio cioimĩte Suriata, o na Moabi, o na gwa ciana cia Amoni, o na kwa Afilisiti, o na kwa Amaleki, o na indo-inĩ iria ciatahĩtwo Hadadezeri wa Rehobu, mũthamaki wa Zoba.
• 13. Nake Daudi agĩkĩgĩa igweta mũno hĩndĩ ĩrĩa oimire kũhũra Asuriata andũ ngiri ikũmi na inyanya o kũu Gĩtuamba gĩa Cumbĩ.
• 14. Ningĩ agĩkĩiga athigari a kũrangĩra kũu Edomu; nakuo kũu Edomu akĩiga athigari acio kũndũ guothe, nao Aedomu othe magĩgĩtuĩka ndungata cia Daudi. Nake Jehova agĩgĩtũma Daudi ahootane kũndũ guothe kũrĩa aathiaga.
• 15. Daudi agĩgĩthamaka bũrũri wothe wa Isiraeli, o na agatuithanagia andũ ake othe macira, namo macira macio akamatuithanagia na kĩhooto.
• 16. Nake Joabu wa Zeruia nĩwe warĩ mũnene wa mbũtũ cia ita; nake Jehoshafatu wa Ahiludu nĩwe warĩ mwandĩki maũndũ ma ihinda rĩu;
• 17. nake Zadoku wa Ahitubu, na Ahimeleku wa Abiatharu, nĩo maarĩ athĩnjĩri-Ngai; nake Seraia nĩwe warĩ mwandĩki marũa;
• 18. nake Benaia wa Jehoiada nĩwe warĩ mũrori wa Akerethi na Apelethi; nao ariũ a Daudi maarĩ athĩnjĩri-Ngai.

Home