Go Back

2 Samueli Chapter 7

• 1. Na gũgĩkinya atĩrĩ, atĩ hĩndĩ ĩrĩa mũthamaki Daudi aatũũrire nyũmba yake, o nake Jehova agĩkorũo atũmĩte ahurũke agatiga gũũkĩrĩrũo nĩ thũ ciake iria ciamũrigicĩirie na mĩena yothe-rĩ,
• 2. agĩkĩĩra Nathani, ũrĩa mũnabii, atĩrĩ, Ta rora wone atĩ rĩu niĩ ndũũraga nyũmba yakĩtwo na mĩtarakwa, no rĩrĩ, ithandũkũ rĩa Ngai rĩtũũraga o matama-inĩ marĩa ma kũrĩhumbĩra.
• 3. Nake Nathani agĩkĩĩra mũthamaki atĩrĩ, Thiĩ, ũgeke ũndũ o wothe ũrĩa wĩ ngoro-inĩ yaku; nĩ gũkorũo Jehova arĩ hamwe nawe.
• 4. Na gũgĩkinya atĩrĩ, atĩ ũtukũ o ro ũcio, ndũmĩrĩri ya Jehova ĩgĩkinyĩrĩra Nathani, akĩĩrũo atĩrĩ,
• 5. Thiĩ ũkere ndungata yakwa Daudi atĩrĩ, Jehova oiga ũũ: Atĩrĩrĩ, anga nĩ wega ũnjakĩre nyũmba nĩguo ndĩmĩtũũre,
• 6. kuona atĩ ndirĩ ndaikara nyũmba kuuma mũthenya ũrĩa ndaambatirie ciana cia Isiraeli, ciume Misiri, o na ũmũthĩ, nĩ gũtũũra ndũire ’thiaga ndĩ hema-inĩ, o na gĩikaro-inĩ?
• 7. Atĩrĩrĩ, kũndũ kũrĩa guothe ndanathiĩ na ciana cia Isiraeli ciothe-rĩ, ndĩ ndaaria kiugo o na kĩmwe hihi na mũtiirĩrĩri o na ũmwe wa mĩhĩrĩga ya ciana cia Isiraeli ĩrĩa ndaathire ĩrĩithagie andũ akwa Isiraeli, ngĩũria ũũ: Nĩ kĩ kĩanagiria mũnjakĩre nyũmba ya mĩtarakwa?
• 8. Na rĩu tondũ ũcio nĩ wega ũkere Daudi ndungata yakwa atĩrĩ, Jehova Mũnene wa Ita, oiga ũũ: Atĩrĩrĩ, ndakũrutire ciugũ-inĩ cia mbũri ũtige gũcirũmĩrĩra, nĩ getha ũtuĩke mũnene wa gwathaga andũ akwa Isiraeli;
• 9. na nĩnjikarĩte hamwe nawe kũndũ kũrĩa guothe wanathiĩ, na nĩ’ninĩte thũ ciaku ciothe, ikehera mbere yaku; na nĩngatũma ũgĩe igweta mũno o ta andũ a gũkũ thĩ arĩa marĩ igweta mũno.
• 10. Nao andũ akwa Isiraeli nĩngũmathurĩra handũ ndĩmahande ho, nĩ getha matũũrage handũ hao kĩũmbe, na matigacoka gũthamio rĩngĩ o na rĩ; o na kana ciana iria njaganu icoke kũmanyarira o na atĩa, o ta ũrĩa ciekaga tene,
• 11. o na ta ũrĩa gwatariĩ kuuma mũthenya ũrĩa ndaathanire ngiuga atĩ atiirĩrĩri-bũrũri matuĩke a gũtiirĩrĩra andũ akwa Isiraeli. Na nĩngũkũhurũkia, ũtige kũnyarirũo nĩ thũ ciaku ciothe. O na ningĩ Jehova egũkwĩra atĩrĩ, atĩ Jehova nĩakahanda nyũmba yaku.
• 12. Na rĩrĩ, hĩndĩ ĩrĩa matukũ maku makahingio nawe ũkome hamwe na mathoguo, nĩngahanda mũndũ wa mbeũ yaku ĩrĩa ĩgoka thutha waku, yumĩte mũthimo waku; o naguo ũthamaki wake nĩngatũma ũikare ũrũmĩte mũno.
• 13. Mũndũ ũcio nĩwe ũgaakĩra rĩĩtwa rĩakwa nyũmba, na nĩngatũma gĩtĩ gĩa ũthamaki wake gĩtũũre kĩrũmĩte mũno tene na tene.
• 14. Na nĩ niĩ ngatuĩka ithe, nake atuĩke mũrũ wakwa; na angĩkehia-rĩ, ngamũhũraga na rũthanju ta rũrĩa andũ a gũkũ thĩ mahũragwo naruo, o na mahũra ta marĩa ciana cia andũ a gũkũ thĩ ihũragwo.
• 15. No rĩrĩ, tha ciakwa itikamũthengera ta ũrĩa ndacithengirie harĩ Saulu, o ũcio ndeheririe mbere yaku.
• 16. Naruo rũciaro rũaku, o na ũthamaki waku, nĩũkona ihandĩtwo igatũũra irũmĩte mũno, tene na tene; o naguo ũhoro waku wa gũikarĩra gĩtĩ-gĩa-ũthamaki nĩũkahandwo ũtũũre ũrũmĩte wega tene na tene.
• 17. Na rĩrĩ, o ta ũrĩa ũhoro ũcio wothe watariĩ, o na ta ũrĩa ũhoro wothe wa kĩoneki kĩa Nathani gĩa ũtukũ watariĩ, ũguo noguo Nathani aaririe akĩĩra Daudi.
• 18. Hĩndĩ ĩo mũthamaki Daudi agĩtonya nyũmba thĩinĩ, agĩikara thĩ mbere ya Jehova, nake akiuga ũũ: Atĩrĩrĩ, Mwathani Ngai, niĩ ndĩ ũ, o nayo nyũmba yakwa nĩ ndũũ, atĩ nĩkĩo ũnginyĩtie o haha ndĩ?
• 19. Na rĩrĩ, Mwathani Ngai, ũndũ ũcio ũwonete na maitho maku ta ũrĩ mũnyinyi, ũgagĩcoka kwaria ũhoro wa nyũmba yakwa niĩ ndungata yaku, wa ihinda iraya rĩrĩa rĩgoka thutha-inĩ o na ningĩ wee, Mwathani Ngai, ũndũ ũcio naguo nĩũwarĩtie o ta ũrĩa ũhoro wa andũ a gũkũ thĩ ũtariĩ!
• 20. Niĩ na niĩ Daudi-rĩ, nĩ ũndũ ũngĩ ũrĩkũ hihi ingĩgĩcoka gũkwĩra makĩria? Nĩ ũndũ-rĩ, wee, Mwathani Ngai nĩũnjũĩ niĩ ndungata yaku.
• 21. Tondũ wa ũhoro ũcio warĩtie, o na ũndũ wa ũrĩa wendete gwĩka na ngoro yaku, nĩkĩo wĩkĩte maũndũ macio manene ũguo, nĩ getha ũ’menyithie niĩ, ndungata yaku, ũhoro wamo.
• 22. Tondũ ũcio, wee Jehova Ngai, ũrĩ mũnene mũno; nĩ gũkorũo gũtirĩ ũngĩ ũhaana tawe, o na kana gũkagĩa Ngai ũngĩ tiga wee, o ta ũrĩa ũhoro wothe ũrĩa twĩiguĩrĩire na matũ maitũ ũtariĩ.
• 23. Ningĩ-rĩ, nĩ rũrĩrĩ rũrĩkũ gũkũ thĩ rũtariĩ ta andũ aku o aya a Isiraeli, o aya Ngai aathiire gwĩkũũrĩra matuĩke rũrĩrĩ rũake kĩũmbe, nĩ getha atũme we mwene egĩĩre igweta; na eke maũndũ manene nĩ ũndũ wanyu, o na maũndũ ma kũmakania nĩ ũndũ wa bũrũri waku, o na mbere ya andũ aku, Ngai, aya wekũũrĩire wee mwene, ũkĩmaruta Misiri moime ndũrĩrĩ-inĩ ingĩ, na meherere ngai ciacio?
• 24. Na ningĩ nĩwatũmire andũ aku, Isiraeli, mehande maikare marũmĩte wega marĩ aku, matuĩke rũrĩrĩ rũaku kĩũmbe tene na tene; o nawe Jehova ũgĩtuĩka Ngai wao.
• 25. Na rĩu Jehova Ngai, ũhoro ũcio warĩtie ũngoniĩ niĩ ndungata yaku, o na ũkoniĩ nyũmba yakwa-rĩ, tũũra ũwĩkĩrĩte hinya tene na tene, na wĩke o ta ũguo uugĩte.
• 26. Narĩo rĩĩtwa rĩaku tũma rĩtũũre rĩnenehagio tene na tene, na kwĩragwo atĩrĩ, Jehova, Mũnene wa Ita, nĩwe Ngai ũrĩa wathaga Isiraeli; o nayo nyũmba ya ndungata yaku, Daudi, nĩĩkahandwo ĩtũũre ĩrũmĩte wega mbere yaku.
• 27. Nĩ gũkorũo wee Jehova, Mũnene wa Ita, Ngai wa Isiraeli, nĩũnguũrĩirie niĩ ndungata yaku ũndũ ũyũ, ũkoiga atĩrĩ, Nĩngakũhandĩra nyũmba; na tondũ ũcio niĩ, ndungata yaku, nĩnyonete arĩ wega na ngoro yakwa atĩ ngũhoe ihoya rĩu.
• 28. Na rĩu wee Mwathani Ngai, wee nĩwe Ngai, naguo ũhoro waku nĩ wa ma, o ma, na nĩũnjĩrĩire niĩ, ndungata yaku, ũndũ ũcio mwega.
• 29. Na tondũ ũcio, ndagũthaitha ũrathime nyũmba yakwa, niĩ ndungata yaku, nĩ getha ĩtũũre mbere yaku tene na tene; nĩ gũkorũo wee Mwathani Ngai nĩwe uugĩte ũndũ ũcio; nayo nyũmba yakwa niĩ ndungata yaku-rĩ, tũma ĩtũũre ĩrĩ ndathime na kĩrathimo gĩaku tene na tene.

Home