Go Back

2 Samueli Chapter 24

• 1. Ningĩ Jehova agĩcinwo nĩ marakara nĩ ũndũ wa Isiraeli, agĩkĩarahũra ngoro ya Daudi amokĩrĩre, akĩmwĩra ũũ: Ũkĩra ũgatare Isiraeli o na Juda.
• 2. Nake mũthamaki agĩkĩĩra Joabu, ũcio mũnene wa ita yake atĩrĩ, Ũkĩra rĩu ũthiĩ kũndũ o kũndũ mĩhĩrĩga-inĩ yothe ya Isiraeli, mũmĩrutĩtie Dani o nginya Biri-shiba, ũgatare andũ, nĩ getha ’menye ũrĩa maigana.
• 3. Nake Joabu agĩkĩĩra mũthamaki atĩrĩ, Jehova Ngai waku aroongerera andũ, amaingĩhie maita igana gũkĩra ũrĩa maigana rĩu magĩtarũo, namo maitho maku mũthamaki ũyũ, mwathi wakwa-rĩ, maroeonera ũhoro ũcio; no rĩrĩ, mũthamaki ũyũ, mwathi wakwa, ũgũkenera gwĩka ũndũ ũcio nĩ ũndũ kĩ?
• 4. No rĩrĩ, o na Joabu oiga ũguo-rĩ, kiugo kĩa mũthamaki nĩkĩamũhootire, o na gĩkĩhoota anene a mbũtũ cia ita. Nake Joabu, na anene acio a mbũtũ cia ita, magĩkiuma he mũthamaki, makĩmũtiga nĩguo magatare andũ a Isiraeli.
• 5. Nao makĩringa Jorodani, makĩamba hema ciao kũu Aroeri, mwena wa ũrĩo wa itũũra rĩrĩa rĩarĩ gatagatĩ ga gĩtuamba kĩa Gadi, mang’etheire Jazeri.
• 6. Na thutha wa ũguo magĩkinya Gileadi, o na bũrũri wa Tahatimu-hodishi, magĩcoka magĩkinya Dani-jaani, magĩkĩrigicũka magĩkinya Zidoni,
• 7. magĩcoka magĩkinya kĩhingo-inĩ kĩrĩa kĩrũmu gĩa Turo, o na matũũra mothe ma Ahivi, o na ma Akanaani; magĩgĩitĩka gũthiĩ marorete mwena wa gũthini wa Juda, o kũu Biri-shiba.
• 8. Na rĩrĩ, maarĩkia gũthiĩ ũũ na ũũ magerete bũrũri ũcio wothe-rĩ, magĩkinya Jerusalemu, nao magĩkorũo maninĩte mĩeri kenda na matukũ mĩrongo ĩĩrĩ.
• 9. Nake Joabu agĩkĩhe mũthamaki ũhoro wa ũrĩa andũ acio maaiganaga maatarũo; na rĩrĩ, kũu Isiraeli gũgĩkorũo kũrĩ arũme ngiri magana manana arĩa maarĩ njamba cia gũcomora hiũ cia njora; o nao andũ a Juda magĩkorũo marĩ ngiri magana matano.
• 10. Nayo ngoro ya Daudi ĩkĩmũtheca mũno, akĩigua ũũru aarĩkia gũtara andũ ake. Nake Daudi agĩkĩĩra Jehova atĩrĩ, Nĩnjĩhĩtie mũno nĩ ũndũ wa ũndũ ũcio njĩkĩte; no rĩrĩ, rĩu wee Jehova, ndagũthaitha ũnjehererie wĩhia ũcio wakwa, niĩ ndungata yaku; nĩ gũkorũo nĩnjĩkĩte ũndũ wa ũkĩgu mũno.
• 11. Na rĩrĩ, hĩndĩ ĩrĩa Daudi aarokire gũũkĩra rũcinĩ, ndũmĩrĩri ya Jehova ĩgĩkinyĩra mũnabii, ti Gadi, ũrĩa wonagĩra Daudi maũndũ, agĩkĩĩrũo atĩrĩ,
• 12. Thiĩ warie na Daudi, ũmwĩre atĩ Jehova oiga ũũ: Atĩrĩrĩ, ngũkũigĩra mbere yaku maũndũ matatũ, nawe wĩthurĩre ũmwe wamo, nĩ getha ngwĩke guo.
• 13. Tondũ ũcio Gadi agĩgĩthiĩ agĩkinya he Daudi, akĩmũhe ũhoro ũcio, akĩmũũria atĩrĩ, Ũkwenda ũkorũo nĩ ng’aragu ya mĩaka mũgwanja bũrũri ũyũ wothe? Kana ũũrĩre thũ ciaku mĩeri ĩtatũ ũteng’eretio nĩcio? O na kana hihi kũgĩe mĩthenya ĩtatũ ya mũrimũ mũũru bũrũri wothe? Wĩcirie wega ũmenye icokia rĩrĩa ngũcokeria ũrĩa ũndekirie.
• 14. Nake Daudi agĩkĩĩra Gadi atĩrĩ, Hĩ! Ndĩ hairũ rĩu! No rĩrĩ, nĩ kaba tũgũe moko-inĩ ma Jehova, nĩ ũndũ tha ciake nĩ nyingĩ mũno; ndikagũe moko-inĩ ma aadũ a gũkũ thĩ.
• 15. Tondũ ũcio Jehova agĩgĩtwarithĩria Isiraeli mũrimũ mũũru kuuma o rũcinĩ rũu o nginya ihinda rĩrĩa rĩatuĩtwo; nakuo kũu bũrũri ũcio kuuma Dani o nginya Biri-shiba gũgĩkua andũ ngiri mĩrongo mũgwanja.
• 16. Na rĩrĩ, hĩndĩ ĩrĩa mũraika aatambũrũkirie guoko gwake akũroretie Jerusalemu, nĩguo arĩnine-rĩ, Jehova agĩkĩĩrira nĩ ũndũ wa ũũru ũcio, akĩĩra mũraika ũcio waninaga andũ atĩrĩ, Nĩkũiganĩte; rĩu girĩrĩria guoko gwaku. Nake mũraika ũcio wa Jehova aakorirũo arĩ kĩhuhĩro-inĩ kĩa ngano kĩa Arauna, Mũjebusi.
• 17. Nake Daudi agĩkĩaria na Jehova ona mũraika ũcio waninaga andũ, akiuga atĩrĩ, Hĩ, nĩnjĩhĩtie, na nĩnjĩkĩte ũndũ wa ũkĩgu; no rĩrĩ, andũ aya matariĩ ta ng’ondu, nĩ atĩa mekĩte? Ndagũthaitha ũreke guoko gwaku kũnjũkĩrĩre arĩ niĩ, o na nyũmba ya baba.
• 18. Nake Gadi agĩkinya he Daudi mũthenya o ro ũcio, akĩmwĩra atĩrĩ, Ambata ũgaakĩre Jehova kĩgongona o kũu kĩhuhĩro-inĩ kĩa ngano kĩa Arauna, Mũjebusi.
• 19. Nake Daudi agĩkĩambata o ta ũguo Gadi oigĩte, o na ta ũrĩa Jehova aathanĩte.
• 20. Nake Arauna agĩgĩcũthĩrĩria, akĩona mũthamaki na ndungata ciake magĩthengerera hau aarĩ; nake Arauna akiuma na nja, akĩinamĩrĩra mũthamaki, agĩturumithia ũthiũ thĩ.
• 21. Arauna agĩkĩũria atĩrĩ, Nĩ kĩ gĩatũma wee mũthamaki ũyũ, mwathi wakwa, ũũke kũrĩ niĩ, ndungata yaku? Nake Daudi agĩkiuga atĩrĩ, Nĩ kwenda ngwenda kũgũra kũrĩ wee kĩhuhĩro gĩkĩ kĩa ngano, njakĩre Jehova kĩgongona ho, nĩ getha mũrimũ ũyũ mũũru ũgirĩrĩrio, ũtige kũnina andũ.
• 22. Nake Arauna akĩĩra Daudi atĩrĩ, Mwathi wakwa mũthamaki nĩakĩoe arutĩre ho kĩrĩa gĩothe ekuona kĩagĩrĩire. Atĩrĩrĩ, ng’ombe cia kũrutwo ihaki rĩa njino nĩcio ici; nayo mĩnyamũ ĩrĩa ĩhũraga ngano, o na ĩrĩa yohaga ndegwa, nĩyo ĩno ya gũtuĩka ngũ;
• 23. indo icio ciothe, mũthamaki ũyũ-rĩ, niĩ, Arauna, nĩndakũhe wee, mũthamaki witũ. Ningĩ Arauna akĩĩra mũthamaki ũũ: Jehova Ngai waku arogwĩtĩkĩra.
• 24. Nake mũthamaki agĩkĩĩra Arauna atĩrĩ, Aca; no rĩrĩ, ti-itherũ nĩ kũgũra ngũgũra indo icio harĩ wee o ta ũrĩa thogora wacio ũtariĩ; ndingĩrutĩra Jehova Ngai wakwa ihaki rĩa njino itarĩ kĩndũ o na kĩ ndĩrĩrutĩire. Daudi agĩkĩgũra kĩhuhĩro kĩu kĩa ngano, o na ndegwa icio, na cekeri mĩrongo ĩtano cia betha.
• 25. Nake Daudi agĩgĩakĩra Jehova kĩgongona hau, agĩcoka akĩrutĩra ho mahaki ma njino, o na magongona ma ũiguano. Na tondũ ũcio Jehova agĩgĩthaithĩka nĩ ũndũ wa bũrũri ũcio; naguo mũrimũ ũcio mũũru ũkĩgirĩrĩrio, ũgĩtiga kũnina andũ a Isiraeli.

Home