Go Back

2 Samueli Chapter 23

• 1. NA RĨRĨ, ici nĩcio ciugo cia Daudi cia kũrigĩrĩria: Atĩrĩrĩ, Daudi mũrũ wa Jesii, ekuuga ũũ, We ũrĩa watũũgĩririo mũno ekuuga atĩrĩ, O we ũcio mũitĩrĩrio maguta wa Ngai wa Jakubu, Na akendeka mũno nĩ ũndũ wa gũthugundĩra Isiraeli thaburi:
• 2. Roho wa Jehova nĩ kwaria aaririe na kanua gakwa, Nakĩo kiugo gĩake gĩkĩgĩa rũrĩmĩ-inĩ rũakwa.
• 3. Ngai wa Isiraeli oigire atĩrĩ, O we rũaro rũa ihiga rũa Isiraeli akĩnjĩra atĩrĩ, Mũndũ ũrĩa wathaga andũ na kĩhooto, Agaathana na ũndũ wa gwĩtigĩra Ngai-rĩ,
• 4. Agatuĩka o ta ũtheri ũrĩa ũtheraga rũcinĩ riũa rĩaratha, O rũcinĩ rũrĩa rũtarĩ matu ma mbura; O hĩndĩ ĩrĩa nyeki ya mũmerano yaitĩka kũmera tĩri-inĩ, Nĩ ũndũ wa ũrĩa gũkĩĩte gũgathera wega thutha wa mbura.
• 5. Githĩ ũguo tiguo nyũmba yakwa ĩtariĩ ĩkĩonwo nĩ Mũrungu? Nĩ ũndũ nĩaarĩkanĩire na niĩ kĩrĩkanĩro gĩa gũtũũra tene na tene, Kĩrĩa gĩthondeketwo wega maũndũ-inĩ mothe, na gĩĩ kĩrũmu; Nĩ ũndũ ũhoro ũcio noguo ũhonokio wakwa wothe, na ũkahingia maũndũ mothe marĩa ndĩĩriragĩria, O na harĩa atarĩ aratũma ũhoro ũcio ũkũre.
• 6. No rĩrĩ, andũ arĩa othe aaganu magatuĩka o ta mĩigua ya gũteo, Nĩ ũndũ ndĩngĩnyitĩka na guoko;
• 7. No rĩrĩ, mũndũ akĩmĩhutia No mũhaka akorũo agwatĩte kĩndũ gĩa kwĩgitĩra gĩa kĩgera, o na mũtĩ wa itimũ, Nayo ĩcinĩrũo handũ hayo na mwaki, ĩninwo biũ,
• 8. Maya nĩmo marĩĩtwa ma andũ arĩa maarĩ njamba arĩa Daudi aarĩ nao; wa mbere-rĩ, nĩ Joshebu-bashebethu, Mũtakemoni, mũnene wa anene arĩa angĩ a athigari; na nowe wetagwo Adino, Mũezini, ũrĩa woragire andũ magana manana, o ihinda rĩmwe akĩrũa nao.
• 9. Nake ũrĩa wamũrũmĩrĩire nĩ Eleazaru, mũrũ wa Dodai, mũrũ wa mũndũ Mũahohi, ũmwe wa andũ acio atatũ njamba irĩ hinya arĩa maarĩ na Daudi, rĩrĩa mogitire Afilisiti arĩa monganĩte marũe mbaara, o hĩndĩ ĩrĩa andũ a Isiraeli maakorirũo maambatĩte magethiĩra;
• 10. mũndũ ũcio agĩgĩũkĩra akĩhũra Afilisiti o nginya rĩrĩa aanogire guoko, nakuo guoko gwake gũgĩikara o ro ũguo kũnyitĩte rũhiũ rũa njora; nake Jehova agĩtũma ũhonokanio mũnene woneke mũthenya ũcio; nao andũ makĩmũrũmĩrĩra o magatahe.
• 11. Na thutha wake kwarĩ Shama, mũrũ wa Agee, Mũharari. Tondũ rĩrĩa Afilisiti monganĩte me mbũtũ ĩmwe handũ haarĩ mũgũnda ũiyũrĩte ndengũ, nao andũ a Isiraeli makĩũrĩra Afilisiti-rĩ,
• 12. Shama aarũgamire mũgũnda-inĩ ũcio gatagatĩ akĩgiria Afilisiti maũkinye, akĩmoraga; nake Jehova agĩtũma ũhonokanio mũnene woneke.
• 13. Ningĩ thĩinĩ wa arĩa mĩrongo ĩtatũ anene, kwarĩ andũ atatũ maaikũrũkire, magĩkinya he Daudi ngurunga-inĩ ya Adulamu hĩndĩ ya magetha; nayo mbũtũ ya athigari a Afilisiti ĩgĩkorũo yambĩte hema ciayo gĩtuamba kĩa Refaimu.
• 14. Nake Daudi hĩndĩ ĩo agĩkorũo arĩ kĩhingo-inĩ gĩakĩtwo na hinya, nakĩo gĩtungati kĩa Afilisiti gĩgaikara Bethi-lehemu.
• 15. Nake Daudi aaigua abataire mũno, agĩkiuga atĩrĩ, Hĩ! Na arĩ korũo he mũndũ ũngĩ’he maĩ ma gĩthima kĩa Bethi-lehemu kĩrĩa kĩrĩ kĩhingo-inĩ, ’nyue!
• 16. Nao andũ acio atatũ njamba irĩ hinya, magĩtũrĩkĩria thĩinĩ wa ita ya Afilisiti, magĩtaha maĩ gĩthima-inĩ kĩu kĩa Bethi-lehemu, o kĩu kĩrĩ kĩhingo-inĩ, magĩgĩthiĩ namo makĩmatwarĩra Daudi; no ndaigana gwĩtĩkĩra kũmanyua, nĩ gũita aamaitire thĩ, amarutĩre Jehova ta marĩ ma igongona.
• 17. Nake agĩkiuga atĩrĩ, Jehova, ũndũ ũyũ ũroaga gwĩkwo nĩ niĩ wa atĩ ’nyue maĩ maya! Kaĩ ingĩkĩhota atĩa kũnyua thakame ya andũ aya metwarĩrĩire ũgwati-inĩ wa gĩkuũ? Na tondũ ũcio ndaigana gwĩtĩkĩra kũmanyua. Maũndũ macio nĩmo njamba icio ithatũ ciekire.
• 18. Nake Abishai, mũrũ wa nyina na Joabu, mũrũ wa Zeruia, nĩwe warĩ ũrĩa mũnene wa acio atatũ. Nake ũcio nĩwe woire itimũ rĩake akĩrũa na andũ magana matatũ, agĩkĩmoraga, akĩgĩa igweta mũno thĩinĩ wa acio atatũ.
• 19. Githĩ tiwe wagĩtĩĩkire mũno thĩinĩ wa acio atatũ, akĩmakĩra? Na tondũ ũcio agĩgĩtuwo mũnene wao; no rĩrĩ, ndaigana kũgĩa igweta ta acio angĩ atatũ a mbere.
• 20. Nake Benaia wa Jehoiada, mũrũ wa mũndũ njamba wa Kazibeeli, ũrĩa wekĩte maũndũ ma hinya-rĩ, nĩwe woragire ariũ erĩ a Arieli wa Moabi; o na ningĩ agĩikũrũka agĩtonya irima hĩndĩ kwoiraga tharunji, akĩũragĩra mũrũthi kuo;
• 21. na ningĩ akĩũraga Mũmisiri warĩ karau akĩonwo; nake Mũmisiri ũcio aarĩ na itimũ guoko; no rĩrĩ, Benaia aaikũrũkire agĩthiĩ harĩ we na rũthanju; nake agĩkĩhuria itimũ rĩu rĩarĩ guoko kwa Mũmisiri ũcio, agĩkĩmũũraga na itimũ rĩu rĩake we mwene.
• 22. Maũndũ macio nĩmo mekirũo nĩ Benaia, mũrũ wa Jehoiada, nake agĩkĩgĩa igweta mũno thĩinĩ wa acio atatũ maarĩ njamba.
• 23. Mũndũ ũcio agĩgĩtĩĩka mũno gũkĩra acio angĩ mĩrongo ĩtatũ; no rĩrĩ, ndaigana kũgĩa igweta ta acio angĩ atatũ a mbere. Nake Daudi akĩmũtua mwathi wa gwathaga arĩa maamũrangagĩra.
• 24. Nake Asaheli, mũrũ wa nyina na Joabu, aarĩ wa acio mĩrongo ĩtatũ; nao arĩa angĩ nĩ aya: Elihanani, mũrũ wa Dodo wa kũu Bethi-lehemu,
• 25. na Shama, Mũharodi, na Elika, Mũharodi,
• 26. na Helezu, Mũpaliti, na Ira, mũrũ wa Ikeshu, Mũtekoa,
• 27. na Abiezeri, Mũanathothi, na Mebunai, Mũhushathi,
• 28. na Zalimoni, Mũahohi, na Maharai, Mũnetofathi,
• 29. na Helebu, mũrũ wa Baana, Mũnetofathi, na Itai, mũrũ wa Ribai, wa itũũra rĩa Gibea, wa ciana cia Benjamini,
• 30. na Benaia, Mũpirathoni, na Hidai wa kũu tũrũũĩ-inĩ twa Gaashu,
• 31. na Abi-aliboni, Mũaribathi, na Azamavethu, Mũbahurimu,
• 32. na Eliaba, Mũshaaliboni, na ariũ a Jasheni, na Jonathani,
• 33. na Shama, Mũharari, na Ahiamu, mũrũ wa Sharari, Mũharari,
• 34. na Elifeleti, mũrũ wa Ahasabai, mũrũ wa Mũmaakathi, na Eliamu, mũrũ wa Ahithofeli, Mũgiloni,
• 35. na Herezo, Mũkarimeli, na Paarai, Mũaribi,
• 36. na Igali, mũrũ wa Nathani wa kũu Zoba, na Bani, Mũgadi,
• 37. na Zeleku, Mũamoni, me na Naharai, Mũbeerothi, arĩa maakuuagĩra Joabu, mũrũ wa Zeruia, indo ciake cia mbaara,
• 38. na Ira, Mũithiri, na Garebi, Mũithiri,
• 39. na Uria, Mũhiti; andũ acio othe-rĩ, maarĩ mĩrongo ĩtatũ na mũgwanja.

Home