Go Back

2 Samueli Chapter 21

• 1. Na rĩrĩ, matukũ-inĩ ma Daudi gũgĩkĩgĩa ng’aragu mĩaka ĩtatũ, mwaka o mwaka; nake Daudi agĩgĩtuĩria ũhoro he Jehova. Nake Jehova akiuga atĩrĩ, Ũhoro ũcio wonekete nĩ ũndũ wa Saulu, o na nyũmba yake ĩrĩa yaitithagia thakame, nĩ ũndũ wa ũrĩa oragire Agibeoni.
• 2. Nake mũthamaki agĩgĩĩta Agibeoni, akĩaria nao, (na rĩrĩ, Agibeoni acio matiarĩ a ciana cia Isiraeli, no maarĩ matigari ma Aamori; nacio ciana cia Isiraeli igĩkorũo ciĩhĩtanĩire nao; nake Saulu nĩaacarĩtie njĩra ya kũmoraga nĩ ũndũ wa kĩyo kĩrĩa aarĩ nakĩo gĩa gũteithia ciana cia Isiraeli na Juda;)
• 3. Daudi agĩkĩũria Agibeoni acio atĩrĩ, Rĩu-rĩ, ngũkĩmwĩka atĩa? Na ningĩ-rĩ, nĩ kĩ ngũkĩruta kĩa horohio, nĩ getha mũrehithĩrie ũgai wa Jehova kĩrathimo?
• 4. Nao Agibeoni acio makĩmwĩra atĩrĩ, Ũhoro ũrĩa wĩ ho ũtũkoniĩ ithuĩ na Saulu, kana nyũmba yake-rĩ, ti ũhoro ũngĩrutĩrũo betha kana thahabu; ningĩ-rĩ, ithuĩ twakĩhota kũũraga mũndũ o na ũrĩkũ thĩinĩ wa Isiraeli? Nake agĩkiuga atĩrĩ, Ũndũ ũrĩa mũkuuga-rĩ, noguo ngũmwĩka.
• 5. Nao magĩkĩĩra mũthamaki atĩrĩ, Mũndũ ũrĩa watũninithirie, na ũrĩa watũmire tũũkĩrĩrũo nĩguo tũninwo tũtikae gũtigara mĩhaka-inĩ ya Isiraeli o na atĩa-rĩ,
• 6. nĩtũrutĩrũo andũ mũgwanja thĩinĩ wa ariũ ake, na ithuĩ tũmacuurie mũtĩ igũrũ mbere ya Jehova, o kũu Gibea ya Saulu, o ũcio wathurĩtwo nĩ Jehova. Nake Daudi agĩkiuga atĩrĩ, Nĩngũmũne.
• 7. No rĩrĩ, mũthamaki nĩaacaĩire Mefibosthethu wa Jonathani mũrũ wa Saulu, nĩ ũndũ wa mwĩhĩtwa ũrĩa Daudi na Jonathani ũcio mũrũ wa Saulu mehĩtanĩire o erĩ makĩgwetaga rĩĩtwa rĩa Jehova.
• 8. No mũthamaki nĩaanyitire ariũ a Rizipa, mwarĩ wa Aia, arĩa aaciarĩire Saulu, nao nĩ Arimoni na Mefiboshethu, na ariũ atano a Merabu, mwarĩ wa Saulu, arĩa aaciarĩire Adirieli wa Barizilai, Mũmeholathu;
• 9. nake akĩmaneana harĩ Agibeoni, nao makĩmacuuria mũtĩ igũrũ handũ kĩrĩma-inĩ mbere ya Jehova; nao acio othe mũgwanja magĩkua o ihinda rĩmwe; nao moragirũo hĩndĩ ya magetha, o matukũ ma mbere, kĩambĩrĩria-inĩ kĩa magetha ma cairi.
• 10. Nake Rizipa, mwarĩ wa Aia, akĩoya tama wa ikũnia, akĩũtambũrũkĩria hau ihiga igũrũ magetha maambĩrĩrio, o nginya hĩndĩ ĩrĩa mbura yamoirĩire yumĩte igũrũ; nake ndaigana kũreka nyamũ cia rĩera-inĩ ciũmbe igũrũ rĩao mũthenya, o na kana nyamũ cia gĩthaka imahutie ũtukũ.
• 11. Nake Daudi agĩkĩheo ũhoro wa ũrĩa Rizipa, mwarĩ wa Aia, thuriya ya Saulu, ekĩte.
• 12. Nake Daudi agĩgĩthiĩ akĩoithia mahĩndĩ ma Saulu, o na mahĩndĩ ma Jonathani, mũrũwe, akĩmaruta harĩ andũ a Jabeshi-gileadi, arĩa maamaiyĩte makamaruta kawerũ-inĩ ka Bethi-shani, harĩa Afilisiti maamacuurĩtie mũtĩ igũrũ, mũthenya ũrĩa Afilisiti moragĩire Saulu o kũu Giliboa,
• 13. agĩkĩambatia mahĩndĩ macio ma Saulu, o na ma Jonathani mũrũwe, akĩmaruta kũu; o namo mahĩndĩ ma andũ acio maacuurĩtio mũtĩ igũrũ makĩũnganio.
• 14. Nao andũ magĩgĩthika mahĩndĩ ma Saulu na Jonathani mũrũwe, bũrũri wa Benjamini, o kũu Zela, mbĩrĩra-inĩ ya Kishu ithe; magĩgĩĩka maũndũ mothe marĩa maathĩtwo nĩ mũthamaki. Na thutha wa maũndũ macio, Ngai agĩthaithĩka nĩ ũndũ wa bũrũri wao.
• 15. Nao Afilisiti magĩgĩcoka kũgĩa na mbaara rĩngĩ na Isiraeli; nake Daudi agĩikũrũka e hamwe na ndungata ciake, makĩhũrana na Afilisiti acio; nake Daudi akĩũrũo nĩ hinya mũno.
• 16. Hĩndĩ ĩo Ishibi-benobu, ũrĩa warĩ wa ariũ a Rafa, na aarĩ na itimũ rĩa cekeri magana matatũ cia gĩcango rĩgĩthimwo, na akohwo rũhiũ rũa njora rũa mũturano, agĩgĩcirĩra kũũraga Daudi.
• 17. No rĩrĩ, Abishai wa Zeruia akĩmũteithia, akĩgũtha Mũfilisiti ũcio, akĩmũũraga. Hĩndĩ ĩo andũ a Daudi makĩmwĩra na mwĩhĩtwa atĩrĩ, Wee ndũgacoka kuumagarania na ithuĩ o na rĩ tũgĩthiĩ ita-inĩ, nĩ getha ndũkahorie tawa wa Isiraeli.
• 18. Na gũgĩkinya atĩrĩ, atĩ thutha wa maũndũ macio, gũkĩgĩa mbaara rĩngĩ ya kũhũranwo na Afilisiti o kũu Gobu na hĩndĩ ĩo Sibekai, Mũhushathi, akĩũraga Safu, ũrĩa warĩ wa ariũ a Rafa.
• 19. Ningĩ gũkĩgĩa mbaara o hĩndĩ ĩngĩ kũu Gobu ya kũhũranwo na Afilisiti; nake Elihanani, mũrũ wa Jaare-oregimu, Mũbethi-lehemu, akĩũraga Goliathu, Mũgiti, naguo mũtĩ wa itimũ rĩake watariĩ ta mũtĩ wa mũtambo ũrĩa ũtumaga tama.
• 20. O na ningĩ gũgĩcoka gũkĩgĩa mbaara o hĩndĩ ĩngĩ kũu Gathu, nakuo kwarĩ mũndũ mũraihu mũno kĩũga. Nake mũndũ ũcio aarĩ na ciara mĩrongo ĩĩrĩ na inya, nĩ ũndũ aarĩ na ciara ithathatũ o guoko, o na ciara ithathatũ o kũgũrũ. Mũndũ ũcio o nake aaciarĩtwo nĩ Rafa.
• 21. Na rĩrĩa ogitire Isiraeli, Jonathani wa Shimei, mũrũ wa nyina na Daudi, akĩmũũraga.
• 22. Andũ acio ana-rĩ, maaciarĩirũo nĩ Rafa ũcio o kũu Gathu; nao makĩũragwo nĩ Daudi na ndungata ciake.

Home