Go Back

2 Samueli Chapter 10

• 1. Na gũgĩkinya atĩrĩ, atĩ thutha wa maũndũ macio, mũthamaki wa ciana cia Amoni agĩkua, nake Hanuni, mũriũ, agĩthamaka ithenya rĩake.
• 2. Nake Daudi agĩkiuga atĩrĩ, Nĩngwĩka Hanuni, mũrũ wa Nahashi, maũndũ mega ma ũtugi, o ta ũrĩa ithe nake aanjĩkire maũndũ mega ma ũtugi. Na tondũ ũcio Daudi agĩkĩrekia ndungata ciake ikamũkirie maithori nĩ ũndũ wa gĩkuũ gĩa ithe. Nacio ndungata icio cia Daudi igĩgĩthiĩ, igĩkinya bũrũri wa ciana cia Amoni.
• 3. No rĩrĩ, anene a ciana cia Amoni makĩũria Hanuni, mwathi wao, atĩrĩ, Anga ũgwĩciria atĩ Daudi nĩ gũtĩa atĩĩte thoguo ma, atĩ nĩkĩo akũrekeirie andũ a gũgũkiria maithori? Githĩ Daudi ti kũrekia areketie ndungata ciake ituĩrie ũrĩa itũũra rĩrĩ rĩtariĩ, na irĩthigane nĩguo acoke arĩng’aũranie?
• 4. Tondũ ũcio Hanuni agĩkĩnyitithia ndungata icio cia Daudi agĩcienjithia nderu ciacio rũere rũmwe, o nacio nguo ciacio agĩcitinĩria itina-inĩ na gatagatĩ, agĩcirekia ciĩthiĩre.
• 5. Na rĩrĩ, Daudi aaheo ũhoro ũcio, akĩrekia andũ magacitũnge, nĩ ũndũ andũ acio nĩmaaconorithĩtio mũno mũno. Nake mũthamaki agĩkiuga atĩrĩ, Ikarai o kũu Jeriko o nginya nderu cianyu imere, na hĩndĩ ĩo mũgagĩcoka gũkũ.
• 6. Na rĩrĩ, hĩndĩ ĩrĩa ciana cia Amoni cionire atĩ nĩituĩkĩte ta kĩndũ gĩthũũrĩtwo mũno nĩ Daudi-rĩ, ikĩrekeria Aauriata a Bethi-rehobu andũ, ikĩrĩkanĩra nao atĩ imahe mũcara nĩ getha maciteithie; o na Asuriata a Zoba, andũ ngiri mĩrongo ĩĩrĩ arĩa metwaraga na magũrũ, ikĩrĩkanĩra o ro ũguo nao, o na mũthamaki wa Maaka, hamwe na andũ ake ngiri ĩmwe, o na andũ a Tobu ngiri ikũmi na igĩrĩ.
• 7. Na rĩrĩ, Daudi aaigua ũhoro ũcio, akĩrekia Joabu, o na ita yothe ya andũ arĩa njamba.
• 8. Nacio ciana cia Amoni ikiumagara, ikĩarania ita yacio itonyero-inĩ rĩa kĩhingo; nao Asuriata a Zoba, o na a Rehobu, o na andũ a Tobu, o na a Maaka, magĩkorũo marĩ oiki kũu werũ-inĩ.
• 9. Na rĩrĩ, hĩndĩ ĩrĩa Joabu onire atĩ ita nĩyaaranĩtio na mbere yake o na thutha wake-rĩ, agĩcokanĩrĩria andũ othe a Isiraeli njamba iria thure, akĩmaarania nĩguo mahũrane na Asuriata;
• 10. nao andũ arĩa angĩ akĩmekĩra moko-inĩ ma Abishai, mũrũ wa nyina, o nao akĩmaarania nĩguo mahũrane na ciana cia Amoni.
• 11. Nake agĩkĩĩra Abishai atĩrĩ, Asuriata maangĩria hinya-rĩ; ũgĩũke ũndeithie; no ciana cia Amoni ciagũkĩria hiaya, nĩngũũka gũgũteithia.
• 12. Ũmĩrĩria mũno, tũhũrane ta arũme ki nĩ ũndũ wa andũ aitũ, o na ũndũ wa matũũra marĩa ma Ngai witũ; nake Jehova aroeka o ta ũrĩa ekuona kwagĩrĩire.
• 13. Tondũ ũcio Joabu, o na andũ arĩa maarĩ hamwe nake, magĩthengerera ita-inĩ makahũrane na Asuriata; nao Asuriata makĩmũũrĩra.
• 14. Na rĩrĩ, hĩndĩ ĩrĩa ciana cia Amoni cionire atĩ Asuriata mekũũra-rĩ, o nacio ikĩũrĩra Abishai, igĩtonya itũũra rĩacio. Thutha wa ũguo Joabu agĩkĩhũndũka oimĩte harĩ ciana cia Amoni, agĩkinya Jerusalemu.
• 15. Na rĩrĩ, hĩndĩ ĩrĩa Asuriata monire atĩ megũtorio nĩ Isiraeli-rĩ, magĩĩcokanĩrĩria othe hamwe.
• 16. Nake Hadadezeri akĩrekania, akĩgĩrithia Asuriata arĩa maarĩ mũrĩmo ũrĩa ũngĩ wa Rũũĩ rũa Farati; nao magĩgĩũka magĩkinya Helamu me hamwe na Shobaku, mũnene wa ita ya Hadadezeri, amatongoretie.
• 17. Naguo ũndũ ũcio ũkĩĩrũo Daudi; nake agĩgĩcokanĩrĩria Isiraeli othe, nao makĩringa Jorodani, magĩkinya kũu Helamu. Nao Asuriata magĩkĩĩarania kũu ita-inĩ, makĩhũrana nake.
• 18. Na rĩrĩ, Asuriata acio magĩkĩũrĩra Isiraeli; nake Daudi akĩũraga Asuriata a makari ma ita magana mũgwanja, o na akĩũraga andũ angĩ ngiri mĩrongo ĩna arĩa maathiaga mahaicĩte mbarathi thĩinĩ wa Asuriata, o na akĩhũra Shobaku, mũnene wa ita yao, o nginya agĩkuĩra kuo.
• 19. Na rĩrĩ, hĩndĩ ĩrĩa athamaki othe arĩa maarĩ ndungata cia Hadadezeri monire atĩ megũtorio biũ nĩ Isiraeli-rĩ, makĩara ũhoro na Isiraeli wa atĩ kũgĩe thayũ, magĩcoka Kũmatungatĩra. Tondũ ũcio Asuriata magĩgĩĩtigĩra gũcoka gũteithia ciana cia Amoni o na rĩ.

Home