Go Back

Kĩambĩrĩria Chapter 49

• 1. Nake Jakubu agĩgĩĩta ariũ ake harĩ we, akĩmera atĩrĩ, Ũnganai inyuothe hamwe, ndĩmwĩre maũndũ marĩa makamũkora thutha-inĩ.
• 2. Atĩrĩrĩ, inyuĩ ariũ a Jakubu, ta cokanĩrĩrai mũigue maũndũ; Ta tegerai ithe wanyu Isiraeli gũtũ.
• 3. Atĩrĩrĩ, Reubeni, wee nĩwe irigithathi rĩakwa, na hinya wakwa, na kĩambĩrĩria kĩa ũhoti wakwa; Gũkĩra nĩũkĩrĩte arĩa angĩ na ũnene, na hinya wa gwathana.
• 4. No rĩrĩ, wagagĩte o ta maĩ, na tondũ ũcio ndũgakĩra arĩa angĩ; Nĩ ũndũ nĩwahaicire ũrĩrĩ wa thoguo, Ũkĩũgwatia thahu. Hĩ, nĩ mũrũ wakwa wahaicire ũrĩrĩ wakwa!
• 5. Simeoni na Lawii nĩ a nyina ũmwe; Nacio hiũ ciao cia njora no cia ũhinya.
• 6. Atĩrĩrĩ, wee ngoro yakwa! Ndũkanatonye cira-inĩ wao; O nawe ũnene wakwa-rĩ, ndũkanegwatanie na ũũngano wao! Tondũ nĩmoragire mũndũ marakarĩte, Na magĩtemenga ndegwa magũrũ, makĩmĩthuithia nĩ kũmaramara kwao.
• 7. Marakara macio mao marogwatwo nĩ kĩrumi, nĩ ũndũ maarĩ meĩ mũno; O namo mathũgũta mao marogwatwo nĩkĩo, nĩ ũndũ maarĩ ma kũũnũhana. Ngamaharaganĩria thĩinĩ wa Jakubu, O na ndĩmahurunjĩre thĩinĩ wa Isiraeli.
• 8. Wee Juda-rĩ, nĩ kũgathwo ũrĩgathagwo nĩ ariũ a thoguo, Nakuo guoko gwaku gũgakinya o ngingo ya thũ ciaku ũcitorie biũ, Nao ariũ a thoguo nĩmagakũinamagĩrĩra.
• 9. Juda nĩ kĩana kĩa mũrũthi! Wee, mũrũ wakwa, nĩwambatĩte ũkainũka ũhũnĩte kĩrĩa ũnyitĩte. Atĩrĩrĩ! einamirie, agĩĩthuna ta mũrũthi, O na ta mũrũthi wa mũgoma! Nũ ũgakĩmwarahũra?
• 10. Rũthanju rũa ũnene rũtikehera harĩ Juda, O na kana rũthanju rũrĩa rũnyitagwo nĩ mũnene rũmuume gatagatĩ ka magũrũ, O nginya rĩrĩa Mũhorerania agoka, Nake nĩwe ũgaathĩkagĩrũo nĩ ndũrĩrĩ.
• 11. Ndigiri yake akamĩohaga mũthabibu-inĩ, O nayo njaũ yake ya ndigiri amĩohage mũthabibu-inĩ ũrĩa mwega; Nguo ciake cia thĩinĩ-rĩ, agacithambagĩria ndibei-inĩ, O nacio nguo ciake cia igũrũ acithambagĩrie thakame-inĩ ya thabibu;
• 12. Maitho make magatunĩhagio nĩ ndibei, Namo magego make merũhagio nĩ iria.
• 13. Zebuluni agatũũra hũgũrũrũ-inĩ cia iria, Naguo bũrũri wake ũgĩe hũgũrũrũ cia gũikaragwo nĩ marikabu, Na mũhaka wake ũkinye hakuhĩ na Zidoni.
• 14. Isakaru nĩwe ndigiri ĩrĩa ĩrĩ hinya, Ĩkomaga gatagatĩ-inĩ ga ciugũ cia mbũri.
• 15. Onire ũhurũko na ũgĩkorũo wĩ mwega, Naguo bũrũri akĩwona wĩ wa kwendeka; Nake akĩinamĩrĩria kĩande nĩguo atuĩke mũkuui mĩrigo, Agĩcoka agĩtuĩka ndungata ya mũcara.
• 16. Dani nĩagacirĩra andũ ake, O ta ũrĩa mũhĩrĩga wa Isiraeli ũngĩcirĩrũo.
• 17. Dani agatuĩka ta nyamũ-ya-thĩ ĩikarĩte njĩra-inĩ, Atuĩke ta nduĩra ĩrĩ gacĩra-inĩ Ya kũrũmaga mbarathi ihahinya ciayo, Na tondũ ũcio mũmĩhaici akagũa na ngara.
• 18. Atĩrĩrĩ, Jehova! Njetereire o kũhonokania gwaku!
• 19. Ha ũhoro wa Gadi-rĩ, agatharĩkĩrũo nĩ andũ ikundi; No rĩrĩ, we mwene nĩagaciteng’eria acikinyĩte nyarĩrĩ.
• 20. Naho ha ũhoro wa Asheri-rĩ, mĩgũnda yake ya irio nĩĩgatuĩka mĩnoru, Nacio indo cia gũkenia athamaki ikoimaga kũrĩ we.
• 21. Nafitali atariĩ ta thwariga ya mũgoma yohoretwo, Nacio ciugo iria ciumaga kanua gake nĩ njega mũno.
• 22. Jusufu atariĩ ta rũhonge rũrĩa rũciaraga wega, O rũhonge rũrĩa rũciaraga wega rũĩ gĩthima-inĩ; Honge ciake itambaga rũthingo-inĩ guothe.
• 23. Aikia mĩguĩ nĩmamũiguithagia kĩeha mũno; Mamũikagia mĩguĩ makamũnyarira;
• 24. No rĩrĩ, ũta wake ũikaraga ũrĩ o na hinya ũrũmĩte, O nacio icoka cia moko make igekĩrũo hinya Nĩ moko ma Ũrĩa-wĩ-Hinya-Mũno wa Jakubu, O we ũcio Mũrĩithi, mũtue Ihiga rĩa Isiraeli,
• 25. O we Ngai wa thoguo, ũrĩa ũgagũteithia, Ningĩ we Mwene-Hinya-Wothe, ũrĩa ũgakũrathima Na irathimo ciumĩte igũrũ matu-inĩ, O na irathimo cia kũndũ kũrĩa kũriku mũhuro warĩo, O na irathimo cia nyondo, o na cia nda.
• 26. Atĩrĩrĩ! Irathimo cia thoguo Nĩikĩrĩte irathimo cia arĩa maanjiarire, Nacio ikinyĩte o mĩthia-inĩ ya irĩma iria itũũraga tene na tene. Irathimo icio-rĩ, igũikara igũrũ rĩa mũtwe wa Jusufu, O ruototia-inĩ rũa mũtwe wa ũrĩa waamũranĩtio na ariũ a ithe.
• 27. Benjamini atariĩ ta njũi ĩrĩa ĩtinanganagia. Ihinda rĩa rũcinĩ nĩ kũrĩa akarĩa kĩrĩa anyitĩte, Ningĩ hwaĩ-inĩ agayanie kĩrĩa atahĩte.
• 28. ANDŨ acio othe-rĩ, nĩo mĩhĩrĩga ĩrĩa ikũmi na ĩĩrĩ ya Isiraeli; namo maũndũ macio nĩmo ithe wao aamerire, o na akĩmarathima; agĩkĩmarathima o ta ũrĩa kĩrathimo kĩa mũndũ o mũndũ gĩatariĩ.
• 29. Ningĩ akĩmaatha, akĩmera atĩrĩ, Nĩ hingo ngũgĩturanĩrũo na arĩa maanakua; nĩ wega mũ’thike hamwe na aa baba ngurunga-inĩ ĩrĩa ĩrĩ gĩthaka kĩa Efironi, Mũhiti,
• 30. o ngurunga-inĩ ĩrĩa ĩrĩ gĩthaka kĩa Makipela, ĩng’ethanĩire na Mamure kũu bũrũri wa Kanaani, o ĩo Iburahimu aagũranĩirie na gĩthaka kĩu kũrĩ Efironi ũcio Mũhiti, ĩtuĩke handũ hake ha gũthikanaga.
• 31. Hau nĩho Iburahimu aathikirũo na Sara, mũtumia wake; na noho Isaaka aathikirũo na Rebeka, mũtumia wake; ningĩ noho ndathikire Lea;
• 32. nakĩo gĩthaka kĩu, o na ngurunga ĩo ĩrĩ kuo, ciagũrirũo harĩ ciana cia Hethi.
• 33. Na rĩrĩ, Jakubu aakĩrĩkia gwatha ariũ ake, agĩgĩthuna magũrũ arĩ ũrĩrĩ igũrũ, agĩtuĩkana, agĩturanĩrũo na arĩa maanakua.

Home