Go Back

Kĩambĩrĩria Chapter 47

• 1. Jusufu agĩgĩtonya he Firauni, akĩmũhe ũhoro, akĩmwĩra atĩrĩ, Baba na ariũ a awa, me na mbũri ciao, na ng’ombe, o na indo ciao ciothe, nĩmokĩte makoima bũrũri wa Kanaani; na atĩrĩrĩ, rĩu me bũrũri wa Gosheni.
• 2. Agĩgĩthura andũ atano thĩinĩ wa ariũ a ithe, akĩmatwara mbere ya Firauni, akĩmaiga harĩ we.
• 3. Nake Firauni agĩkĩmoria atĩrĩ, Mũrutaga wĩra ũ? Magĩkĩĩra Firauni atĩrĩ, Ithuĩ ndungata ciaku tũrĩ arĩithi, ithuene, o na maithe maitũ.
• 4. Ningĩ makĩĩra Firauni atĩrĩ, Twoka kũrĩangĩra ũgeni bũrũri ũyũ; nĩ ũndũ ithuĩ, ndungata ciaku, nĩtwagĩte ria rĩa ũhiũ witũ, nĩ gũkorũo ng’aragu nĩ nene mũno kũu bũrũri wa Kanaani; na tondũ ũcio twagũthaitha ũtwĩtĩkĩrie ithuĩ, ndungata ciaku, tũtũũre bũrũri wa Gosheni.
• 5. Nake Firauni akĩaria na Jusufu, akĩmwĩra atĩrĩ, Thoguo na ariũ a thoguo nĩmokĩte kũrĩ wee,
• 6. rĩu-rĩ, bũrũri wothe wa Misiri wĩ mbere yaku; he thoguo na ariũ a thoguo ũtũũro kũndũ kũrĩa kwega gũkĩra kũrĩa kũngĩ guothe gũkũ bũrũri ũyũ. Nĩmagatũũre bũrũri wa Gosheni; na ũngĩkorũo nĩũũĩ andũ amwe arĩa ogĩ thĩinĩ wao-rĩ, matue anene a kũndoragĩra mahiũ makwa.
• 7. Ningĩ Jusufu agĩtwara Jakubu ithe, akĩmũiga he Firauni; nake Jakubu akĩrathima Firauni.
• 8. Nake Firauni akĩũria Jakubu atĩrĩ, Ũgĩtĩte mĩaka ĩigana?
• 9. Jakubu agĩkĩĩra Firauni atĩrĩ, Mĩaka ĩrĩa ngĩtĩte ngĩũrũra gũkũ thĩ nĩ igana rĩa mĩrongo ĩtatũ; no rĩrĩ, mĩaka ĩo ngĩtĩte nĩ mĩnyinyi, na ĩkoragwo ĩiyũrĩtwo nĩ mĩtangĩko, na ndĩigana mĩaka ya aa baba ĩrĩa maatũire morũraga gũkũ thĩ.
• 10. Jakubu agĩkĩrathima Firauni, agĩcoka akiuma harĩ we.
• 11. Nake Jusufu agĩkĩhe ithe, na ariũ a ithe, ũtũũro kũu bũrũri wa Misiri, agĩkĩmahe kũrĩa kwega makĩria, nakuo nĩkuo bũrũri wa Ramesese, o ta ũrĩa Firauni aathanire gwĩkwo.
• 12. Ningĩ Jusufu agakĩheaga ithe, na ariũ a ithe, o na andũ a nyũmba ya ithe irio, o ta ũrĩa nyũmba ciao ciatariĩ.
• 13. Naguo bũrũri ũcio wothe ũkĩaga irio, nĩ gũkorũo ng’aragu yarĩ nene mũno; na tondũ ũcio bũrũri wa Misiri o na wa Kanaani makĩhatĩrĩrio nĩ ng’aragu mũno.
• 14. Nake Jusufu akĩrigia na mbia ciothe cia bũrũri wa Misiri, na cia bũrũri wa Kanaani, nĩ ũndũ wa ngano ĩrĩa andũ maagũraga, nacio mbia icio Jusufu agĩcitwara kwa Firauni mũciĩ.
• 15. Na rĩrĩ, mbia ciothe ciathira bũrũri ũcio wa Misiri, o na wa Kanaani-rĩ, Amisiri othe magĩthiĩ kwĩ Jusufu, makĩmwĩra atĩrĩ, Tũhe irio; nĩ ũndũ-rĩ, kaĩ tũgũgĩkua wĩ ho nĩ ũndũ kĩ? Tondũ mbia ciitũ nĩ njagu.
• 16. Nake Jusufu akĩmera atĩrĩ, Ndeherei mahiũ manyu, na nĩngũmũheera irio mo, kũngĩkorũo mbia nĩ njagu.
• 17. Magĩgĩtwarĩra Jusufu mahiũ mao; na rĩrĩ, mbarathi, o na ndũru cia mbũri o na cia ng’ombe, o na ndigiri ciao, icio ciothe Jusufu akĩmaheera irio; agĩkĩmahe irio mwaka ũcio wothe ikũũranĩtio na mahiũ mao mothe.
• 18. Na rĩrĩ, mwaka ũcio wathira magĩcoka magĩthiĩ kũrĩ we mwaka ũyũ ũngĩ wa kerĩ, makĩmwĩra atĩrĩ, Tũtingĩhitha mwathi witũ ũhoro wa ũrĩa mbia ciitũ ciothe ithirĩte, na mahiũ maitũ rĩu nĩ mwathi witũ ũrigĩtie namo; hatirĩ kĩndũ tũtigarĩtie gĩa gũkuonia, wee mwathi witũ, tiga o mĩĩrĩ iitũ iiki, na ithaka ciitũ.
• 19. Kaĩ tũgũgĩkua wĩ ho, ũgĩtuonaga na maitho maku, o na ithaka ciũre nĩ ũndũ kĩ? Tũgũre ithuene, o na ithaka ciitũ, na ũndũ wa gũtũhe irio, na ithuĩ ithuene, hamwe na ithaka ciitũ, nĩtũgũtuĩka ndungata cia Firauni. Ningĩ twagũthaitha tũhe mbeũ cia kũhanda, nĩ getha tũtũũre muoyo tũtigakue, na bũrũri witũ ndũgatigwo ũtheri.
• 20. Jusufu agĩkĩgũrĩra Firauni bũrũri wothe wa Misiri, nĩ gũkorũo andũ a Misiri nĩmendirie ithaka ciao, mũndũ o mũndũ, nĩ ũndũ wa kũhinyĩrĩrio nĩ ng’aragu; bũrũri ũgĩgĩtuĩka wa Firauni.
• 21. Nao andũ aguo-rĩ, akĩmathamĩria matũũra-inĩ, kuuma mũhaka-inĩ ũmwe wa bũrũri wa Misiri o nginya mũhaka-inĩ ũrĩa ũngĩ waguo.
• 22. No ithaka cia athĩnjĩri-ngai akuo ataagũrire; nĩ ũndũ athĩnjĩri-ngai maarĩ na igai rĩao maaheagwo nĩ Firauni, nao magakĩrĩaga igai rĩu Firauni aamaheaga, na tondũ ũcio matiendirie ithaka ciao.
• 23. Nake Jusufu akĩĩra andũ ũũ: Atĩrĩrĩ, ũmũthĩ nĩ kũgũra ndamũgũrĩra Firauni, inyuene, o na ithaka cianyu; rĩu-rĩ, mbeũ nĩcio ici ndamũhe, oyai mũkahande mĩgũnda.
• 24. Na nĩgũgakinya atĩrĩ, atĩ hĩndĩ ya magetha mũkaheaga Firauni gĩcunjĩ gĩa gatano, nacio icunjĩ iria ingĩ inya igatuĩka cianyu inyuene, ituĩke mbeũ cia kũhandwo mĩgũnda, na irio cianyu, na cia andũ a nyũmba cianyu, o na cia ciana cianyu.
• 25. Nao makiuga atĩrĩ, Nĩwatũhonokia rĩu, mwathi witũ; reka o twĩtĩkĩrĩke nĩwe, na nĩtũgũtuĩka ndungata cia Firauni.
• 26. Naho ha ũhoro wa bũrũri ũcio wa Misiri Jusufu agĩtua atĩ kũgĩe kĩrĩra kĩa watho wa kũrũmagĩrĩrũo o nginya ũmũthĩ, gĩa atĩ gĩcunjĩ gĩa gatano kĩa magetha maguo gĩtuĩkage kĩa Firauni; ithaka cia athĩnjĩri-ngai ciiki, nocio itaatuĩkire cia Firauni.
• 27. Nake Isiraeli agĩgĩtũũra bũrũri wa Misiri, o kũu bũrũri wa Gosheni; magĩkĩĩgwatĩra ithaka kuo, magĩgĩciarũrũka mũno, makĩingĩha ma.
• 28. Nake Jakubu agĩgĩtũũra kũu bũrũri ũcio wa Misiri mĩaka ikũmi na mũgwanja; tondũ ũcio mĩaka ĩrĩa Jakubu aatũũrire muoyo yarĩ igana rĩa mĩrongo ĩna na mũgwanja.
• 29. Na rĩrĩ, ihinda rĩa Isiraeli rĩa gũkua rĩgĩkuhĩhĩria, nake agĩgĩĩta Jusufu, mũriũ, akĩmwĩra atĩrĩ, Ingĩkorũo nĩnjĩtĩkĩrĩkĩte nĩwe-rĩ, ndagũthaitha wĩkĩre rũhĩ rũaku nguruĩ ya kĩero gĩakwa, na ũnjĩke maũndũ mega matarĩ ma itherũ; ma atĩ ndagũthaitha ndũkana’thike gũkũ Misiri;
• 30. no rĩrĩ, hĩndĩ ĩrĩa ngakoma hamwe na aa baba-rĩ, nĩũkanguua ũndute gũkũ Misiri, ũga’thike o handũ harĩa maathikirũo. Nake Jusufu akiuga atĩrĩ, Nĩngeka o ta ũguo woiga.
• 31. Ningĩ Isiraeli akĩmwĩra atĩrĩ Njĩra ũhoro ũcio na mwĩhĩtwa; agĩkĩĩhĩta akĩmwĩra atĩ nĩageka ũndũ ũcio. Isiraeli agĩkĩĩinamĩrĩria mũtwe-inĩ wa ũrĩrĩ ũrĩa aakomete.

Home