Go Back

Kĩambĩrĩria Chapter 45

• 1. Hĩndĩ ĩo Jusufu agĩkĩremwo nĩ gũcoka kwĩyũmĩrĩria andũ arĩa othe maarũgamĩte harĩ we me ho, agĩkĩanĩrĩra akiuga atĩrĩ, Umiai andũ othe mehere harĩ niĩ. Na hatiigana gũtigwo mũndũ o na ũmwe ũrũgamĩte harĩ Jusufu, akĩĩmenyithia ariũ a ithe.
• 2. Agĩkĩanĩrĩra akĩrĩra, nao Amisiri, o na andũ a nyũmba ya Firauni, makĩmũigua.
• 3. Jusufu agĩkĩĩra ariũ a ithe atĩrĩ, Nĩ niĩ Jusufu; ĩ baba akĩrĩ o muoyo? Nao ariũ a ithe makĩremwo nĩ kũmũcokeria ũndũ; nĩ gũkorũo nĩmaagegearĩte mũno monana nake ũthiũ na ũthiũ.
• 4. Ningĩ Jusufu agĩkĩĩra ariũ a ithe atĩrĩ, Ndamũthaitha, okokai harĩ niĩ, magĩkimuokokera. Nake akĩmera atĩrĩ, Nĩ niĩ Jusufu, mũrũ wa ithe wanyu ũrĩa mwendirie Misiri.
• 5. Na rĩu menyai mũigue ũũru, kana mwĩrakarĩre, nĩ ũndũ wa kũnyendia mũgĩtũma ndehwo gũkũ; nĩ ũndũ Ngai nĩwe wandekirie njũke mbere yanyu nĩ getha ’honokie mĩoyo ya andũ.
• 6. Nĩ ũndũ rĩu nĩ mĩaka ĩĩrĩ mĩthiru gwata ng’aragu yagĩa bũrũri ũyũ; na ningĩ nĩ hatigaru mĩaka ĩngĩ ĩtano hatekũgĩa icimba kana magetha.
• 7. Ngai nĩwe wakĩndekirie njũke gũkũ mbere yanyu nĩ getha ndũme matigari manyu matũũre gũkũ thĩ, na ndĩmũhonokie mũtũũre muoyo na ũndũ wa kũhonokanio kũnene mũno.
• 8. Tondũ ũcio ti inyuĩ mwandehithirie gũkũ, no nĩ Ngai; na nĩatũmĩte nduĩke ta ithe wa Firauni, na mũnene wa nyũmba yake yothe, o na mwathi wa bũrũri wothe wa Misiri.
• 9. Na rĩu ũkĩrai mwambate mũhiũhĩte mũcoke kwĩ baba, mũmwĩre atĩrĩ, Mũrũguo Jusufu oiga ũũ: Ngai nĩanduĩte mwathi wa bũrũri wothe wa Misiri; ikũrũka ũũke kũrĩ niĩ, na ndũgaikare;
• 10. nawe ũgũtũũra bũrũri wa Gosheni, ũtũũre ũkuhanĩrĩirie na niĩ, wee mwene, o na ciana ciaku, o na ciana cia ciana ciaku, na mbũri ciaku, o na ng’ombe ciaku, o na indo ciaku ciothe iria wĩ nacio;
• 11. nakuo kũu nĩkuo ndĩrĩkũheagĩra irio; nĩ getha ndũgathĩne, wee mwene, o na andũ a nyũmba yaku, o na indo iria ciothe wĩ nacio; nĩ ũndũ nĩgũtigarĩte mĩaka ĩngĩ ĩtano ya ng’aragu.
• 12. Na atĩrĩrĩ, nĩmũkwĩonera na maitho manyu, o na Benjamini mũrũ wa maitũ nake, akeyonera, atĩ kanua gakwa niĩ mwene, nĩko karaaria na inyuĩ.
• 13. Ningĩ-rĩ, hei baba ũhoro wa ũnene wakwa wothe ũrĩa ndĩ naguo gũkũ Misiri, o na mũmũhe ũhoro wa maũndũ mothe marĩa muonete, mũcoke mũmũikũrũkie oke gũkũ narua.
• 14. Nake akĩhimbĩria Benjamini mũrũ wa nyina ngingo, akĩrĩra; o nake Benjamini akĩrĩrĩra ngingo-inĩ yake.
• 15. Ningĩ akĩmumunya ariũ a ithe, akĩrĩraga, amahĩmbĩirie; thutha wa ũguo ariũ a ithe magĩkĩaria nake.
• 16. Na rĩrĩ, ngumo ya ũhoro ũcio ĩkĩiguwo mũciĩ wa Firauni, gũkĩĩranwo atĩrĩ, Ariũ a ithe na Jusufu nĩmokĩte; naguo ũndũ ũcio ũgĩkenia Firauni, o na ndungata ciake.
• 17. Firauni agĩkĩĩra Jusufu atĩrĩ, Ĩra ariũ a thoguo atĩrĩ, Ĩkai ũũ: kuuithiai nyamũ cianyu mĩrigo, mũthiĩ mũkinye o bũrũri wa Kanaani,
• 18. muoe ithe wanyu, o na andũ a nyũmba cianyu, mũcoke mũũke gũkũ kũrĩ niĩ; na niĩ nĩngamũtuga na indo iria njega cia bũrũri ũyũ wa Misiri, na mũrĩage ũnoru wa bũrũri ũyũ.
• 19. Na rĩu, tondũ nĩwaathwo ũguo-rĩ, ĩkai ũũ: thurai makari ma gũkũ bũrũri ũyũ wa Misiri, mũthiĩ namo, ma kũrehe ciana cianyu, na atumia anyu; na mũgĩre ithe wanyu mũmũrehe gũkũ.
• 20. Menyai mũtindanĩrĩre na indo iria mwĩ nacio; nĩ gũkorũo maũndũ marĩa mothe mega ma bũrũri ũyũ wa Misiri nĩ manyu.
• 21. Nao ariũ a Isiraeli magĩĩka o ta ũguo; nake Jusufu akĩmahe makari, o ta ũrĩa aathirũo nĩ Firauni, o na akĩmahe irio cia rĩĩgu.
• 22. Ningĩ akĩhe mũndũ o mũndũ wao nguo cia kũgarũrĩra; no rĩrĩ, aaheire Benjamini mbia magana matatũ, o na nguo cia magarũrĩra matano.
• 23. Nake ithe akĩmũtwarithĩria indo ici: ndigiri ikũmi ikuuithĩtio indo iria njega cia Misiri, o na ndigiri ingĩ ikũmi cia mĩgoma ikuuithĩtio ngano, na irio, o na rĩĩgu wa gũkarĩĩrũo nĩwe njĩra-inĩ.
• 24. Agĩkiugĩra ariũ a ithe ũhoro, nao magĩĩthiĩra, na akĩmera atĩrĩ, Wĩmenyererei mũtigatetanie mũrũĩre njĩra.
• 25. Nao magĩkiuma Misiri magĩkinya bũrũri wa Kanaani gwĩ ithe wao Jakubu.
• 26. Magĩkĩmũhe ũhoro, makĩmwĩra ũũ: Atĩrĩrĩ, Jusufu no atũire muoyo, na nĩwe mwathi wa bũrũri wothe wa Misiri. Nake Jakubu agĩkĩhindigana nĩ ũndũ wa kwaga kũmetĩkia.
• 27. Magĩkĩmũhe ũhoro wothe ũrĩa Jusufu aamerire; na rĩrĩ, ona makari marĩa Jusufu aatwarithĩtie ma kũmũkuua, ngoro ya ithe wao Jakubu ĩgĩcoka kwĩigua.
• 28. Nake Isiraeli agĩkiuga atĩrĩ, Hĩ! Hatikĩrĩ ũndũ ũngĩ ũtigaire; nĩ ũndũ kuona atĩ Jusufu mũrũ wakwa arĩ o muoyo-rĩ, nĩngũthiĩ ngamwĩonere itanakua.

Home