Go Back

Kĩambĩrĩria Chapter 44

• 1. Na rĩrĩ, Jusufu agĩatha mũnene wa nyũmba yake, akĩmwĩra atĩrĩ, Iyũria makũnia ma andũ acio irio, wĩkĩre nyingĩ o ta iria mangĩhota gũkuua, na wĩkĩre mbia cia mũndũ o mũndũ mũromo-inĩ wa ikũnia rĩake.
• 2. Na wĩkĩre gĩkombe gĩakwa kĩrĩa kĩa betha mũromo-inĩ wa ikũnia rĩa ũcio mũnyinyi, hamwe na mbia ciake cia kũgũra ngano. Mũndũ ũcio agĩgĩĩka o ta ũguo erirũo nĩ Jusufu.
• 3. Na rĩrĩ, rũcinĩ gwathera o ro ũguo, andũ acio makĩĩrũo mainũke, o ene, na ndigiri ciao.
• 4. Na rĩrĩ, maarĩkia kuuma itũũra-inĩ, matanathiĩ haraya-rĩ, Jusufu akĩĩra mũnene ũcio wa andũ a nyũmba yake atĩrĩ, Ta ũkĩra ũrũmĩrĩre andũ acio, na wamakinyĩra, ũmorie atĩrĩrĩ, Ĩ kaĩ mwarĩha wega na ũũru nĩ ũndũ kĩ?
• 5. Githĩ gĩkombe gĩkĩ tikĩo mwathi wakwa anyuagĩra, na ningĩ ti-itherũ githĩ tikĩo aragũraga nakĩo? Nĩmwĩhĩtie nĩ gwĩka ũndũ ũcio.
• 6. Agĩkĩmakinyĩra akĩmahe ũhoro ũcio.
• 7. Nao magĩkĩmũũria atĩrĩ, Mũthuri ũyũ, nĩ kĩ gĩgũgĩtũma uuge mohoro ta macio? Ithuĩ ndungata ciaku tũroaga gwĩka ũndũ ta ũcio!
• 8. Atĩrĩrĩ, mbia iria twonire mĩromo-inĩ ya makũnia maitũ-rĩ, twoima bũrũri wa Kanaani, githĩ tũtiragũcokeirie? Na rĩu-rĩ, twakĩhota atĩa kũiya betha, kana thahabu, kũu nyũmba ya mwathi waku?
• 9. Atĩrĩrĩ, mũndũ o wothe wa ndungata ici ciaku ũrĩa ũrĩonwo nakĩo-rĩ, nĩakue, o na ithuĩ tũtuĩke ngombo cia mwathi witũ.
• 10. Nake akiuga atĩrĩ, Rĩu kĩrekei gũtuĩke o ta ũguo mwoiga; mũndũ wanyu ũrĩa ũrĩonwo nakĩo-rĩ, nĩwe ũgũtuĩka ngombo yakwa; no inyuĩ arĩa angĩ mũtigĩa na ũũru.
• 11. Magĩkĩhiũha kũruta mĩrigo yao, makĩmĩiga thĩ, mũndũ o mũndũ; nao othe, o mũndũ akĩguũria ikũnia rĩake.
• 12. Mũmisiri ũcio agĩgĩcaria gĩkombe kĩu aambĩrĩirie harĩ ũrĩa mũkũrũ akĩya gũtigĩra harĩ ũrĩa mũnyinyi; gĩgĩkĩonwo ikũnia-inĩ rĩa Benjamini.
• 13. Hĩndĩ ĩo magĩgĩtembũranga nguo ciao, magĩkuuithia o mũndũ ndigiri yake mũrigo, magĩcoka kũu itũũra-inĩ.
• 14. Juda na ariũ a ithe, magĩgĩkinya kwa Jusufu nyũmba, nake Jusufu agĩkorũo arĩ o kuo; magĩkĩĩgũithia thĩ makĩmũinamĩrĩra.
• 15. Nake Jusufu akĩmoria atĩrĩ, Ũndũ ũcio nĩ ũrĩkũ mweka? Kaĩ mũtoĩ atĩ mũndũ ta niĩ aahota kũragũra?
• 16. Nake Juda akiuga atĩrĩ, Mwathi witũ, tũgũgĩkwĩra atĩa? O naguo ũhoro ũrĩa tũngĩkĩaria-rĩ, nĩ ũrĩkũ? Kana tũngĩgĩĩkũũra atĩa? Ngai nĩonete ũũru witũ, ithuĩ ndungata ciaku; atĩrĩrĩ, rĩu tũrĩ ngombo ciaku, wee mwathi witũ, ithuene, o na ũyũ wonwo na gĩkombe.
• 17. Nowe agĩkiuga atĩrĩ, Ndĩroaga gwĩka ũguo! Mũndũ ũrĩa wonwo na gĩkombe-rĩ, ũcio nĩwe ũgũtuĩka ngombo yakwa; no rĩrĩ, inyuĩ arĩa angĩ wĩinũkĩrei na ũhoro gwĩ ithe wanyu.
• 18. Hĩndĩ ĩo Juda agĩkĩmũthengerera, akĩmwĩra atĩrĩ, Mwathi wakwa, ndagũthaitha ũ’thikĩrĩrie, niĩ ndungata yaku, ngũhe ũhoro, o na ningĩ ndũgacinwo nĩ marakara nĩ ũndũ wakwa, niĩ ndungata yaku; nĩ ũndũ wee ũtariĩ o ta Firauni.
• 19. Wee mwathi wakwa watũũririe ithuĩ ndungata ciaku, atĩrĩ, Nĩmũrĩ na ithe wanyu, kana o mũrũ wa ithe wanyu ũngĩ?
• 20. Nawe, mwathi wakwa, tũgĩkwĩra atĩrĩ, Twĩ na ithe witũ, mũthuri mũkũrũ, o na mwana ũngĩ ũrĩa ithe witũ aaciarire e mũkũrũ, na nĩ mũnyinyi; ningĩ tondũ mũrũ wa nyina nĩakuĩte-rĩ, nowe wiki mũtige e wa mũmwe, na nĩendetwo nĩ ithe mũno.
• 21. Nawe ũgĩtwĩra, ithuĩ ndungata ciaku, atĩrĩ, Mũrehei harĩ niĩ, nĩ getha ndĩmwĩonere na maitho makwa.
• 22. Na ithuĩ tũgĩkwĩra, wee mwathi wakwa, atĩrĩ, Mwanake ũcio ndangĩtigithanĩka na ithe; nĩ ũndũ angĩtigithanio na ithe-rĩ, hihi ithe no gũkua angĩkua.
• 23. Nawe ũgĩtwĩra, ithuĩ ndungata ciaku, atĩrĩ, Mũtigacoka kũnyona ũthiũ o na rĩ, tiga o mũrũ wa ithe wanyu okire hamwe na inyuĩ.
• 24. Na gũgĩkinya atĩrĩ, atĩ hĩndĩ ĩrĩa twaambatire tũgĩkinya kũrĩ ithe witũ ũcio ndungata yaku, nĩtwamuheire ũhoro ũrĩa wee mwathi witũ watwĩrire.
• 25. Nake ithe witũ aatwĩra, Thiĩi kuo rĩngĩ, mũgatũgũrĩre tũirio-rĩ,
• 26. tũgĩkĩmwĩra atĩrĩ, Tũtingĩhota gũikũrũka kuo; no rĩrĩ, kũngĩkorũo nĩtũgũtwarana na mũrũ wa ithe witũ ũyũ mũnyinyi-rĩ, nĩtũgũikũrũka; nĩ ũndũ tũngĩaga gũkorũo twĩ hamwe na mũrũ wa ithe witũ ũyũ mũnyinyi, tũtingĩrekwo tuone ũthiũ wa mũndũ ũcio.
• 27. Nake baba, ũcio ndungata yaku, agĩtwĩra atĩrĩ, Inyuĩ nĩmũũĩ atĩ mũtumia wakwa aanjiarĩire tũhĩĩ twĩrĩ;
• 28. nako kamwe gakiuma kũrĩ niĩ, na niĩ ngiuga atĩrĩ, Hĩ! Ti-itherũ nĩ gatinangie nĩ nyamũ, tondũ gwata mũthenya ũcio ndirĩ ndacoka gũkona;
• 29. o nako gaka kangĩ mũngĩthiĩ nako mũkarute kũrĩ niĩ, gacoke gakone ũũru hihi-rĩ, nĩmũgaikũrũkia mbuĩ ciakwa Kwa-ngoma nĩ kĩeha.
• 30. Na gũgĩkinya atĩrĩ, atĩ ndakinya kũrĩ awa, ũcio ndungata yaku, nake mwanake ũyũ aage gũkorũo hamwe na ithuĩ, kuona atĩ muoyo wake ũgwatĩrĩirũo nĩ mwanake ũyũ-rĩ,
• 31. rĩrĩa ithe akona atĩ tũtirĩ nake, no gũkua agakua; na ithuĩ ndungata ciaku, tũtuĩke aikũrũkia mbuĩ cia ndungata yaku, ithe witũ, mbĩrĩra-inĩ nĩ kĩeha.
• 32. Nĩ ũndũ niĩ, ndungata yaku, nĩ niĩ ndatuĩkire mũrũgamĩrĩri wa mwanake ũyũ he baba, ngĩmwĩra atĩrĩ, Ingĩkaaga gũgũcokeria mũrũguo-rĩ, nĩ niĩ ngacokererio ũũru nĩ baba tene na tene.
• 33. Tondũ ũcio ndagũthaitha, wee mwathi wakwa, ũreke niĩ, ndungata yaku, nduĩke ngombo yaku, ithenya rĩa mwanake ũyũ; nake mwanake ũyũ ũreke aambate ainũke me na ariũ a ithe.
• 34. Nĩ ũndũ-rĩ, niĩ ndakĩhota atĩa kwambata nyinũke kũrĩ awa, mwanake ũyũ atarĩ hamwe na niĩ? Ndĩroaga gwĩka ũguo, nĩ getha ndikanone ũũru ũrĩa baba akagĩa naguo!

Home