Go Back

Kĩambĩrĩria Chapter 43

• 1. Nayo ng’aragu ĩgĩkĩneneha mũno bũrũri ũcio.
• 2. Na gũgĩkinya atĩrĩ, atĩ maanina ngano ĩrĩa maarutĩte Misiri, ithe wao akĩmera atĩrĩ, Ũkĩrai mũthiĩ kuo rĩngĩ, mũgatũgũrĩre tũirio.
• 3. Nake Juda akĩmwĩra atĩrĩ, Mũndũ ũcio nĩaatwĩhĩtĩire, akiuga atĩrĩ, Mũriũ ũcio ũngĩ wa ithe wanyu angĩkaaga gũkorũo e hamwe na inyuĩ-rĩ, mũtigacoka kũnyona ũthiũ rĩngĩ.
• 4. Tondũ ũcio ũngĩkorũo nĩũkũreka tũthiĩ na mũriũ ũyũ ũngĩ wa ithe witũ, nĩtũgũikũrũka tũgakũgũrĩre irio;
• 5. no warega-rĩ, na ithuĩ tũtiikũrũka; tondũ mũndũ ũcio aatwĩrire atĩrĩ, Mũriũ ũcio ũngĩ wa ithe wanyu angĩgakorũo atarĩ hamwe na inyuĩ-rĩ, mũtigacoka kũnyona uthiũ rĩngĩ.
• 6. Nake Isiraeli akĩmoria atĩrĩ, Mwakĩnjĩkire ũũru ũguo nĩkĩ, mũkĩĩra mũndũ ũcio atĩ mwĩ na mũndũ ũngĩ wa ithe wanyu?
• 7. Nao makĩmwĩra atĩrĩ, Mũndũ ũcio nĩaatũgũcire mũno ũhoro-inĩ witũ ithuene, o na wa nyũmba iitũ, agĩtũũria atĩrĩ, Ĩ ithe wanyu arĩ o muoyo? Ningĩ-rĩ, nĩmũrĩ na mũndũ ũngĩ wa ithe wanyu, kana aca? Na ithuĩ tũgĩkĩmũcokeria o ta ũrĩa mohoro marĩa aatũũragia maathiĩte; kaĩ tũngĩakĩhotire atĩa kũmenya atĩ hihi aatwĩra, Thiĩi mũgĩre mũndũ ũcio ũngĩ wa ithe wanyu, mũũke nake?
• 8. Juda agĩkĩĩra ithe atĩrĩ, Njĩtĩkĩria kamwana gaka tũthiĩ nako, nĩ getha tũtũũre muoyo tũtigakue, ithuene, o nawe, o na twana twitũ.
• 9. Nĩ niĩ ngũkarũgamĩrĩra, na nĩ niĩ ũkoria ũhoro wako, na rĩrĩ, ingĩkaaga gũgacokia harĩ wee, ndĩkaige mbere yaku, ũndũ ũcio ũronjokerera niĩ, ũtũũre wĩ ihĩtia rĩakwa tene na tene.
• 10. Nĩ ũndũ-rĩ, tiga tũtindĩrĩire, ti-itherũ rĩu tũngĩrĩ acoku rĩa kerĩ.
• 11. Nake Isiraeli, ithe wao, akĩmera atĩrĩ, Kũngĩkorũo nĩ ũguo, ĩkai ũũ: ikũrũkai mũthiĩ mũkuuĩte maciaro mamwe mega ma bũrũri ũyũ me mĩrigo-inĩ yanyu, mũhirĩre mũndũ ũcio, matuĩke kĩheo mũmũhe, hamwe na mahuti manyinyi marĩa manungaga wega, na kaũũkĩ kanini, na ubani, na ũũkĩ-wa-ngoma ũrĩa wĩtagwo manemane, na njothi, na rothi;
• 12. ningĩ thiĩi mũkuuĩte na moko manyu mbia iria igũragwo irio nacio maita merĩ; o nacio mbia iria ciacokirio, igĩĩkĩrũo mũromo-inĩ wa makũnia manyu mũkĩinũka-rĩ, cokai nacio mũcikuuĩte; nĩ gũkorũo hihi ũndũ ũcio nĩ kũhĩtana wahĩtanire,
• 13. o nake mũrũ wa ithe wanyu muoei, mũũkĩre mũcoke kwĩ mũndũ ũcio;
• 14. nake Ngai Mwene-Hinya-Wothe arotũma mũiguĩrũo tha nĩ mũndũ ũcio, nĩ getha amuohorere mũrũ wa ithe wanyu ũcio ũngĩ, o na Benjamini. Niĩ na niĩ-rĩ, ingĩgĩthirĩrũo nĩ ciana ciakwa, nĩciagĩ’thirĩra, gũtirĩ ũndũ.
• 15. Andũ acio magĩkĩoya indo icio cia kũheanwo, na magĩkuua mbia maita merĩ, magĩgĩthiĩ hamwe na Benjamini, magĩũkĩra magĩikũrũka magĩkinya Misiri, makĩrũgama mbere ya Jusufu.
• 16. Na rĩrĩ, Jusufu ona Benjamini e hamwe nao, akĩĩra mũnene wa andũ a nyũmba yake atĩrĩ, Matonyie gwakwa, ũcoke ũmathĩnjĩre, ũhaarĩrie ũhoro wothe wa irio; nĩ ũndũ tũrĩrĩa na andũ aya mĩaraho.
• 17. Nake mũndũ ũcio agĩgĩĩka o ta ũrĩa erirũo nĩ Jusufu, agĩtwara andũ acio kwa Jusufu nyũmba.
• 18. Nao andũ acio maatwarũo kwa Jusufu nyũmba magĩgĩĩtigĩra, makiuga atĩrĩ, Twarehwo gũkũ hihi nĩ ũndũ wa mbia iria ciacokirio makũnia-inĩ maitũ, rũgendo-inĩ ruitũ rũa mbere; nĩ getha ahote gũtũguthũkĩra, atũnyite na hinya, atũtue ngombo ciake; o nacio ndigiri ciitũ atũtunye.
• 19. Magĩgĩkuhĩhĩria mũnene wa andũ a nyũmba ya Jusufu, makĩmwarĩria, e mũromo-inĩ wa nyũmba,
• 20. makĩmwĩra atĩrĩ, Mwathi witũ, ti-itherũ hĩndĩ ya mbere, rĩrĩa twaikũrũkĩte tũgoka gũkũ, no gũũka twokĩte kũgũra irio;
• 21. na gũgĩkinya atĩrĩ, atĩ rĩrĩa twakinyire kĩraaro-inĩ-rĩ, twohora makũnia maitũ, tũkĩona mbia cia mũndũ o mũndũ irĩ o mũromo-inĩ wa ikũnia rĩake, nacio igĩkorũo irĩ ho ciothe igĩtarũo; na rĩu nĩtwacoka nacio tũcikuuĩte.
• 22. Na ningĩ nĩtwoka na mbia ingĩ cia kũgũra irio; no rĩrĩ, mũndũ ũrĩa wekĩrire mbia icio ciitũ makũnia-inĩ maitũ-rĩ, ithuĩ tũtiũĩ ũrĩa we.
• 23. Nake akĩmera atĩrĩ, Mũrogĩa na thayũ, tigai gwĩtigĩra; Ngai wanyu, o we ũrĩa Ngai wa ithe wanyu, nĩwe wamwĩkĩrĩire mũthithũ ũcio wa mbia makũnia-inĩ manyu. Mbia icio cianyu-rĩ, nĩcianginyĩire o wega. Nake agĩkĩrehithie Simeoni harĩ o.
• 24. Mũndũ ũcio agĩkĩmatwara kwa Jusufu nyũmba, akĩmahe maĩ, magĩgĩĩthamba magũrũ; o nacio ndigiri ciao-rĩ, agĩcihe gĩa kũrĩa.
• 25. Nacio indo cia kũhe Jusufu magĩciiga hakuhĩ mũira wa oke kũrĩ o mĩaraho; nĩ gũkorũo nĩmaaiguĩte atĩ mekũrĩa irio kuo.
• 26. Nake Jusufu aainũka, makĩmũtwarĩra indo iria maarĩ nacio cia kũmũhe kũu nyũmba thĩinĩ, macinyitĩte na moko; nao makĩinamĩrĩra magĩturumithia mothiũ thĩ mbere yake.
• 27. Jusufu agĩkĩmahoya ũhoro wao, akĩmoria atĩrĩ, Ĩ ithe wanyu, mũthuri ũcio mwa’heire ũhoro wake, akĩrĩ o mũhoro hihi? Akĩrĩ o ho, o na rĩu?
• 28. Magĩgĩcokia atĩrĩ, Ĩĩ, ndungata ĩo yaku, ithe witũ, no horo; na ĩrĩ o ho, o na rĩu. Magĩkĩmũinamĩrĩra mamwĩnyihĩrie.
• 29. Nake agĩtiira maitho, akĩona Benjamini, mũrũ wa nyina, akĩũria atĩrĩ, Ĩ ũyũ nĩwe mũrũ wa ithe wanyu ũrĩa mũnyinyi, ũrĩa mwa’heire ũhoro wake? Agĩcoka akĩmwĩra atĩrĩ, Ngai arogwĩka maũndũ mega ma ũtugi, mũrũ wakwa.
• 30. No rĩrĩ, Jusufu akĩigua ta egũikio nĩ ngoro nĩ ũndũ wa mũrũ wa nyina, agĩkĩhiũha gũcaria handũ ha kũrĩrĩra; agĩgĩtonya nyũmba yake ya toro, akĩrĩrĩra kuo.
• 31. Agĩcoka agĩĩthamba ũthiũ, akiuma, akĩĩyũmĩrĩria, akiuga atĩrĩ, Irio nĩciigwo metha-inĩ.
• 32. Jusufu agĩkĩigĩrũo irio ciake e wiki, nao ariũ a ithe makĩigĩrũo ciao marĩ oiki, o nao andũ a Misiri arĩa maamenyerete kũrĩanĩra nake, makĩigĩrũo ciao oiki; nĩ ũndũ Amisiri matietikagĩrio kũrĩanĩra irio na Ahibirania; nĩ gũkorũo gwĩka ũguo kwĩ mũgiro harĩ Amisiri.
• 33. Ariũ a ithe magĩgĩikara mbere yake mathingataine ũũ; irigithathi rĩgĩikara o handũ harĩo ha mbere, na ũrĩa mũnyinyi akĩrigia thutha wao othe, o ta ũrĩa ũnyinyi wake ũtariĩ; nao makĩgega, magĩkĩrorana o mũndũ na mũndũ.
• 34. Nacio irio iria ciarĩ hau mbere yake ikĩihũrũo, akĩmatwarithĩria o mũndũ rũĩga rũake; no rĩrĩ, rũĩga rũa Benjamini rũkĩneneha o ta maita matano gũkĩra njĩĩga cia acio angĩ. Ningĩ magĩkĩnyua, na magĩkenanĩra nake.

Home