Go Back

Kĩambĩrĩria Chapter 41

• 1. Na gũgĩkinya atĩrĩ, atĩ mĩaka ĩĩrĩ mĩgima yathira, Firauni akĩrota kĩroto, agĩkĩona ta arĩ kũrũgama aarũgamĩte rũũĩ-inĩ.
• 2. Naruo rũũĩ-inĩ rũu thĩinĩ hagĩkĩonwo hoimĩra ng’ombe mũgwanja njega na noru mũno, igĩitĩka kũrĩa nyeki ya rũũĩ-inĩ.
• 3. Na atĩrĩrĩ, thutha wa ng’ombe icio, hagĩcoka hakiumĩra ng’ombe ingĩ mũgwanja hĩnju mũno, itarĩ njega, igĩkĩrũgama hakuhĩ na ng’ombe icio ingĩ hũgũrũrũ-inĩ cia rũũĩ.
• 4. Nacio ng’ombe icio itarĩ njega, hĩnju mũno, ikĩrĩa ng’ombe icio ingĩ mũgwanja njega na noru. Nake Firauni agĩgĩũkĩra toro.
• 5. Ningĩ agĩgĩcoka agĩkoma, akĩrota ihinda rĩa kerĩ; na atĩrĩrĩ, hakĩonwo haagĩa magira mũgwanja mega, maiyũrĩte ngano, maciarĩtwo nĩ mũtĩ ũmwe wa ngano.
• 6. Na atĩrĩrĩ, hagĩcoka hakiumĩra magira mangĩ mũgwanja ma ngano mahũthũ momanĩrĩru, macinĩtwo nĩ rũhuho rũa mwena wa irathĩro.
• 7. Namo magira macio mahũthũ momanĩrĩru makĩmeria macio mũgwanja mega maiyũire ngano. Firauni agĩgĩũkĩra, agĩkora nĩ kĩroto.
• 8. Na gũgĩkinya atĩrĩ, atĩ rũcinĩ, ngoro yake ĩgĩtangĩka, akĩrekania agĩĩtithia ago othe a Misiri, o na andũ arĩa othe ogĩ a kuo, Firauni agĩkĩmera iroto ciake; no rĩrĩ, gũtirĩ mũndũ o na ũmwe wahotire gũcitaũrĩra Firauni.
• 9. Hĩndĩ ĩo mũnene wa arĩa maatwaragĩra Firauni gĩa kũnyua akĩmwarĩria, akĩmwĩra atĩrĩ, Hĩ! Ũmũthĩ nĩguo ndaririkana mahĩtia makwa.
• 10. He hĩndĩ ĩmwe Firauni aarakarĩtio nĩ ndungata ciake, na niĩ akĩnangithĩria nyũmba-inĩ ya mũnene wa korokoro, hamwe na mũnene wa amũthondekeri mĩgate.
• 11. Na rĩrĩ, ũtukũ o ro ũmwe ithuerĩ tũkĩrota iroto, nakĩo kĩroto kĩa mũndũ o mũndũ kĩarĩ na mũtaũrĩre wakĩo kĩũmbe.
• 12. Nakuo kũu twarĩ na mwanake Mũhibirania warĩ ndungata ya mũnene ũcio wa athigari acio arangĩri; na ithuĩ tũkĩmũhe ũhoro wa iroto ciitũ, nake agĩcitaũranĩra, o ta ũrĩa ũtaũri wa kĩroto kĩa mũndũ o mũndũ watariĩ.
• 13. Na gũgĩkinya atĩrĩ, atĩ o ta ũrĩa aatũtaũrĩire iroto ciitũ, ũguo noguo gwakinyire; nĩ ũndũ niĩ nĩndacokirio wĩra-inĩ wakwa, nake ũcio ũngĩ agĩcuurio mũtĩ igũrũ.
• 14. Nake Firauni agĩkĩrekania, agĩĩtithia Jusufu; nao andũ makĩmũgĩra narua mamũrutĩte kũu korokoro-inĩ; nake Jusufu agĩkĩĩenja, akĩruta nguo iria ehumbĩte agĩĩkĩra ingĩ, agĩgĩthiĩ, agĩtonya he Firauni.
• 15. Nake Firauni akĩĩra Jusufu atĩrĩ, Nĩ kĩroto ndotete, na gũtirĩ mũndũ ũhotete gũgĩtaũra; nayo ngumo yaku nĩĩnginyĩire, ngerũo atĩ ũngĩigua kĩroto wahota gũgĩtaũra.
• 16. Jusufu agĩgĩcokeria Firauni akĩmwĩra atĩrĩ, Ũhoro ũcio nduumaga harĩ niĩ, niĩ mwene; Ngai nĩwe ũgũcokeria Firauni ũhoro wa gũtũma agĩe na ũhoreri.
• 17. Firauni agĩkĩĩra Jusufu atĩrĩ, Kĩroto-inĩ gĩakwa-rĩ, nĩ kũrũgama ndĩrarũgamĩte hũgũrũrũ-inĩ cia rũũĩ;
• 18. na atĩrĩrĩ, rũũĩ-inĩ rũu haroimĩra ng’ombe mũgwanja kuo thĩinĩ, noru na njega mũno; nacio iraitĩka kũrĩa nyeki ya rũũĩ-inĩ;
• 19. na thutha wa icio haroimĩra ng’ombe ingĩ mũgwanja hinyaru, itarĩ njega o na hanini, na ndirĩ ndona ingĩ tacio njũru ũguo bũrũri wa Misiri wothe;
• 20. nacio ng’ombe icio mũgwanja hĩnju mũno, itarĩ njega, irarĩa ng’ombe icio mũgwanja noru cia mbere;
• 21. na ciarĩkia gũcirĩa-rĩ, gũtingĩmenyeka atĩ nĩicirĩĩte, no ikonagwo irĩ njũru o ta ũrĩa iratariĩ mbere. Ndĩragĩũkĩra toro.
• 22. Ningĩ o ngĩrota-rĩ, ndĩrona magira mũgwanja mega, maiyũrĩte ngano, makĩmera mũtĩ-inĩ ũmwe wa ngano;
• 23. na atĩrĩrĩ, haracoka haramera magira mangĩ mũgwanja mahũthũ momanĩrĩru, macinĩtwo nĩ rũhuho rũa mwena wa irathĩro,
• 24. namo magira macio mahũthũ momanĩrĩru marameria magira macio mũgwanja mega, maramanina biũ; na niĩ ndĩrahe ago ũhoro wa kĩroto kĩu, no hatirĩ mũndũ o na ũmwe ũrahotire kũndaũrĩra.
• 25. Nake Jusufu agĩkĩĩra Firauni atĩrĩ, Kĩroto kĩa Firauni no kĩmwe. Ũndũ ũrĩa Ngai akiriĩ gwĩka nĩguo oimbũrĩire Firauni.
• 26. Ng’ombe icio njega mũgwanja-rĩ, nĩ mĩaka mũgwanja, o namo magira macio mũgwanja-rĩ, no mĩaka mũgwanja; kĩroto kĩu no kĩmwe.
• 27. Nacio ng’ombe icio mũgwanja hĩnju, itarĩ njega, o icio ciokire thutha wa icio ingĩ-rĩ, nĩ mĩaka mũgwanja, o namo magira macio mũgwanja momĩtio nĩ rũhuho rũa irathĩro marĩ matheri matarĩ kĩndũ-rĩ, megũtuĩka mĩaka mũgwanja ya ng’aragu.
• 28. Ũguo noguo gũtariĩ, atĩ maũndũ marĩa Ngai akiriĩ gwĩka nĩmo onetie Firauni o ta ũguo ndamwĩra.
• 29. Atĩrĩrĩ, nĩgũgũũka mĩaka mũgwanja ya bũthi mũnene bũrũri wothe wa Misiri;
• 30. na thutha wayo, nĩhagacoka hoke mĩaka ĩngĩ mũgwanja ya ng’aragu, naguo bũthi ũcio wothe nĩũkariganĩra bũrũri wa Misiri, nayo ng’aragu ĩo nĩĩkanina bũrũri ũyũ biũ;
• 31. na gũtikagĩa kĩmenyithia o na kĩmwe bũrũri ũyũ gĩa atĩ kwarĩ bũthi, nĩ ũndũ wa ng’aragu irĩa ĩgacoka gũũka thutha, nĩ gũkorũo nĩĩkaneneha mũno.
• 32. Na rĩrĩ, gĩtũmi kĩa Firauni arotithio ũndũ ũcio kerĩ-rĩ, nĩ ũndũ atĩ Ngai nĩatuĩte na ma atĩ nĩekũwĩka, na nĩekũũhingia o narua.
• 33. Tondũ ũcio, Firauni nĩacarie mũndũ mũbarĩrĩri maũndũ, na mũũgĩ, amũtue mũrori wa bũrũri wa Misiri.
• 34. Firauni nĩeke ũguo, ningĩ atue andũ amwe atabarĩri maũndũ ma bũrũri, nĩguo metagie gĩcunjĩ gĩa ithano kĩa irio cia bũrũri wa Misiri ihinda rĩa mĩaka ĩo mũgwanja ya bũthi.
• 35. Nao macokererie irio ciothe cia mĩaka ĩo mũgwanja mĩega ĩgũũka, mahae ngano, mamĩige watho-inĩ wa Firauni ya gũgatuĩka irio cia matũũra; na macimenyerere.
• 36. Nacio irio icio nĩcio igatuĩka mũthithũ wa bũrũri nĩ ũndũ wa mĩaka ĩo mũgwanja ya ng’aragu, ĩrĩa ĩkagĩa bũrũri wa Misiri; nĩ getha bũrũri ndũkanathire nĩ ng’aragu.
• 37. Naguo ũndũ ũcio ũkĩonwo ta ũrĩ mwega nĩ Firauni, o na ndungata ciake ciothe.
• 38. Firauni agĩkĩũria ndungata ciake atĩrĩ, Anga twakĩhota kuona mũndũ ũngĩ ũtariĩ ta ũyũ, wĩ na roho wa Ngai thĩinĩ wake?
• 39. Firauni agĩkĩĩra Jusufu atĩrĩ, Tondũ Ngai nĩakuonetie maũndũ maya mothe-rĩ, nguuga atĩrĩ, atĩ hihi gũtirĩ mũndũ ũngĩ mũbarĩrĩri maũndũ na mũũgĩ gũgũkĩra.
• 40. Tondũ ũcio wee nĩwe ũgũtuĩka mũrori wa nyũmba yakwa, nao andũ akwa othe marĩathagwo nĩwe o ta ũrĩa ũriugaga; ũndũ ngũgũkĩra naguo no gũikarĩra gĩtĩ-gĩa-ũthamaki.
• 41. Nake Firauni agĩkĩĩra Jusufu atĩrĩ, Ta one atĩ nĩndagũtua mũrori wa bũrũri wothe wa Misiri.
• 42. Firauni agĩkĩruta gĩcũhĩ kĩa rũũri rũake guoko, agĩgĩĩkĩra guoko kwa Jusufu, na akĩmũhumba nguo cia gatani njega, agĩcoka akĩmwĩkĩra kĩrengeri gĩa thahabu ngingo,
• 43. na agĩtua atĩ athiage ahaicĩte ngari yake ya kerĩ, nakuo mbere yake kwanagĩrĩrũo gũkoigwo atĩrĩ, Turiai ndu. Firauni agĩkĩmũtua mũrori wa bũrũri wothe wa Misiri.
• 44. Ningĩ Firauni akĩĩra Jusufu atĩrĩ, Niĩ nĩ niĩ Firauni, na nguuga atĩrĩ, atĩ bũrũri ũyũ wa Misiri wothe, gũtirĩ mũndũ ũkoya guoko gwake na igũrũ, o na kana kũgũrũ gwake, tiga o etĩkĩrĩtio nĩwe.
• 45. Nake Firauni agĩtua Jusufu rĩĩtwa, akĩmwĩta Zafenathu-panea; ningĩ akĩmũhe Asenathu, mwarĩ wa Potifera, mũthĩnjĩri-ngai wa kũu Onu, atuĩke mũka. Nake Jusufu agĩgĩcanga bũrũri wothe wa Misiri.
• 46. Na hĩndĩ ĩo aarũgamĩte mbere ya Firauni, mũthamaki wa Misiri, aarĩ wa mĩaka mĩrongo ĩtatũ. Jusufu agĩkiuma he Firauni agĩtuĩkanĩria ng’ongo ciothe cia bũrũri wa Misiri.
• 47. Na rĩrĩ, mĩaka ĩo mũgwanja ya bũthi bũrũri ũcio ũgĩciara irio nyingĩ igĩkĩrĩrĩria.
• 48. Nacio irio ciothe cia bũrũri wa Misiri cia mĩaka ĩo mũgwanja-rĩ, Jusufu agĩcicokereria, agĩcihaithia makũmbĩ ma matũũra-inĩ; irio cia mĩgũnda ĩrĩa yarigicĩirie itũũra o itũũra, icio-rĩ, agĩcihaithia o ro itũũra-inĩ rĩu.
• 49. Jusufu agĩkĩhaithia ngano nyingĩ mũno o ta mũthanga wa iria-inĩ, o nginya akĩya gũtiga kũmĩgera, nĩ ũndũ ndĩagerekaga.
• 50. Ningĩ Jusufu agĩciarĩrũo tũhĩĩ twĩrĩ mĩaka ĩo ya ng’aragu ĩtanakinya, tũgĩgĩciarũo nĩ Asenathu, mwarĩ wa Potifera, mũthĩnjĩri-ngai wa Onu.
• 51. Nako ka irigithathi Jusufu agĩgatua Manase, akiuga atĩrĩ, Nĩ tondũ Ngai nĩatũmĩte ndiganĩrũo nĩ mathĩna makwa mothe, o na nyũmba ya baba yothe.
• 52. Nako ga itiema agĩgatua Efiraimu, agĩkiuga atĩrĩ, Nĩ tondũ Ngai nĩatũmĩte ngĩe na rũciaro ndĩ bũrũri ũrĩa ’nyarirĩkĩire.
• 53. Nayo mĩaka ĩo mũgwanja ya bũthi ũcio warĩ Misiri ĩgĩgĩthira,
• 54. mĩaka ĩo mũgwanja ya ng’aragu ĩkĩambĩrĩria gũũka, o ta ũrĩa Jusufu oigĩte; na mabũrũri mothe magĩkĩgĩa ng’aragu, no kũu bũrũri wa Misiri guothe kwarĩ irio.
• 55. Na rĩrĩ, hĩndĩ ĩrĩa andũ othe a bũrũri wa Misiri maaitĩkire kũhũta mũno, magĩkaĩra Firauni amahe irio; nake Firauni akĩĩra Amisiri othe atĩrĩ, Thiĩi kwĩ Jusufu, na ũrĩa arĩmwĩra-rĩ, ĩkai guo.
• 56. Nayo ng’aragu ĩo-rĩ, ĩkĩgĩa kũndũ guothe thĩ; nake Jusufu akĩhingũra nyũmba ciothe iria ciaigĩtwo mũthithũ, akĩenderia Amisiri irio; nayo ng’aragu ĩkĩneneha mũno bũrũri wa Misiri.
• 57. Nao andũ a mabũrũri mothe magĩthiĩ Misiri kũrĩ Jusufu, makagũre irio; nĩ ũndũ ng’aragu nĩyanenehete mũno kũndũ guothe thĩ.

Home