Go Back

Kĩambĩrĩria Chapter 40

• 1. Na gũgĩkinya atĩrĩ, atĩ thutha wa maũndũ macio mũndũ ũrĩa watwaragĩra mũthamaki wa Misiri gĩa kũnyua, na mũmũthondekeri mĩgate, makĩĩhia mwathi wao, mũthamaki ũcio wa Misiri, makĩmũrakaria.
• 2. Firauni agĩkĩrakario mũno nĩ anene acio ake erĩ, mũnene ũcio wa arĩa maamũtwaragĩra gĩa kũnyua, na mũnene ũcio wa amũthondekeri mĩgate.
• 3. Agĩkĩmarangithĩria kũu nyũmba-inĩ ya mũnene wa athigari arĩa maarangagĩra korokoro, o korokoro-inĩ ĩo Jusufu ohetwo.
• 4. Nake mũnene ũcio akĩmanengera Jusufu amarorage, agĩkĩmatungatĩra, nao magĩgĩikara ihinda marangĩiruo.
• 5. Na rĩrĩ, andũ acio erĩ, mũndũ ũcio watwaragĩra mũthamaki wa Misiri gĩa kũnyua, o na ũcio ũngĩ mũmũthondekeri mĩgate, o erĩ makĩrota iroto, ũtukũ o ro ũmwe, o mũndũ kĩroto gĩake; nakĩo kĩroto kĩa mũndũ o mũndũ kĩarĩ na mũtaũrĩre wakĩo kĩũmbe.
• 6. Jusufu agĩkĩroka gũtonya harĩ o rũcinĩ, akĩmarora, magĩkĩonwo me na kĩeha.
• 7. Nake akĩũria anene a Firauni acio arangĩre kũu nyũmba ya mwathi wake atĩrĩ, Nĩ kĩ gĩtũmĩte mũikare ta andũ me na kĩeha ũmũthĩ?
• 8. Magĩkĩmwĩra atĩrĩ, Nĩ kĩroto tũrotete, na gũtirĩ mũndũ ũngĩhota gũgĩtaũra. Jusufu agĩkĩmera atĩrĩ, Ĩ githĩ ũtaũranĩri iroto ndũkoniĩ Ngai? Ta njĩrai kĩroto kĩu.
• 9. Mũnene wa arĩa maatwaragĩra Firauni gĩa kũnyua agĩkĩĩra Jusufu kĩroto gĩake, akĩmwĩra atĩrĩ, Kĩroto-inĩ gĩakwa-rĩ, nĩ kuona nyonire mũthabibu wĩ mbere yakwa;
• 10. naguo mũthabibu ũcio uuma na honge ithatũ, naguo waikara ta wathundũra waruta kĩro, nakĩo kĩro kĩarĩkia kuoneka-rĩ, imanjika cia thabibu cierua, ciatuĩka thabibu njĩru;
• 11. na niĩ ndakorũo ’nyitĩte gĩkombe kĩa Firauni na guoko gwakwa; nacio thabibu icio ndacitua, ndacihihĩrĩra gĩkombe-inĩ kĩa Firauni, ndamũnengera, anyite na guoko gwake.
• 12. Jusufu agĩkĩmwĩra atĩrĩ, Ũtaũri wakĩo nĩ ũyũ: honge icio ithatũ-rĩ, nĩ mĩthenya ĩtatũ;
• 13. mũira wa mĩthenya ĩo ĩtatũ ĩthire-rĩ, Firauni nĩegugũtũũgĩria, agũcokie wĩra-inĩ waku, ũcoke kũnengera Firauni gĩkombe anyite na guoko gwake, o ta ũrĩa ũrekaga tene rĩrĩa ũrarĩ mũmũtwarĩri gĩa kũnyua.
• 14. No rĩrĩ, ndagũthaitha ũkandirikana hĩndĩ ĩrĩa ũkona wega, ũnjĩke ũndũ mwega wa ũtugi, ũngwete he Firauni, ũndutithie nyũmba ĩno;
• 15. nĩ ũndũ ti-itherũ, nĩ kũiyũo ndaiyirũo, ngĩrutwo bũrũri wa Ahibirania, na ningĩ gũkũ gũtirĩ ũndũ o na ũrĩkũ ndekire wa gũtũma njikio korokoro-inĩ.
• 16. Na rĩrĩ, mũnene wa athondeki mĩgate ona atĩ gũtaũrũo gwa kĩroto kĩu nĩ kwega, akĩĩra Jusufu atĩrĩ, Niĩ o na niĩ ngĩrota-rĩ, nĩ kuona nyonire ikabu ithatũ cia mĩgate mĩerũ ii mũtwe ndĩcikuuĩte,
• 17. na rĩrĩ, gĩkabu kĩrĩa gĩkũrigĩtie igũrũ kiuma na mĩgate ya mĩthemba yothe, ĩthondekeirũo Firauni, nacio nyamũ cia mathagu ikamĩrĩaga ĩrĩ gĩkabu-inĩ kĩu, igũrũ rĩa mũtwe wakwa.
• 18. Jusufu agĩgĩcokia akiuga atĩrĩ, Ũtaũri wakĩo nĩ ũyũ: ikabu icio ithatũ-rĩ, nĩ mĩthenya ĩtatũ;
• 19. mũira wa mĩthenya ĩo ĩtatũ ĩthire-rĩ, Firauni nĩegũgũtinithia mũtwe agũcuurie Mũtĩ igũrũ; nacio nyamũ cia mathagu ikũrĩe nyama ya mwĩrĩ waku.
• 20. Na gũgĩkinya atĩrĩ, atĩ mũthenya wa ĩtatũ, ũrĩa warĩ wa iciarĩro rĩa Firauni, wakinya, akĩrugithĩria ndungata ciake ciothe gĩathĩ; hĩndĩ ĩo agĩkĩririkana mũnene wa arĩa maamũtwaragĩra gĩa kũnyua, o na mũnene wa amũthondekeri mĩgate, a thiritũ ya ndungata ciake.
• 21. Agĩgĩcokia mũnene wa arĩa maamũtwaragĩra gĩa kũnyua wĩra-inĩ wake wa kũmũtwarĩra gĩa kũnyua; mũndũ ũcio agĩgĩcoka kũnengera Firauni gĩkombe, akĩnyite na guoko;
• 22. no rĩrĩ, mũnene wa andũ arĩa amũthondekeri mĩgate, akĩmũcuuria mũtĩ igũrũ o ta ũrĩa Jusufu aamataũrĩire.
• 23. No rĩrĩ, mũnene ũcio wa arĩa maamũtwaragĩra gĩa kũnyua ndaigana kũririkana Jusufu, no nĩaariganĩirũo nĩwe.

Home