Go Back

Kĩambĩrĩria Chapter 35

• 1. Nake Ngai akĩĩra Jakubu atĩrĩ, Ũkĩra wambate, ũthiĩ Beth-eli, ũgatũũre kuo, na wakĩre Ngai kĩgongona kuo, o we ũrĩa wakuumĩrĩire rĩrĩa worĩire Esau, mũrũ wa nyũkwa.
• 2. Hĩndĩ ĩo Jakubu akĩĩra andũ a nyũmba yake, o na andũ arĩa othe maarĩ hamwe nake atĩrĩ, Eheriai ngai cia kũngĩ iria irĩ thĩinĩ wanyu mũtigane nacio, mwĩtherie, na mũrute nguo iria mwĩhumbĩte, mwĩkĩre ingĩ,
• 3. mũũkĩre twambate tũthiĩ Beth-eli ngaakĩre Ngai kĩgongona kuo, o we ũrĩa wanjokeirie ũhoro mũthenya ũrĩa ndarĩ na thĩna akĩ’menyerera ndĩ njĩra ĩrĩa ndagereire.
• 4. Andũ acio magĩkĩnengera Jakubu ngai cia kũngĩ iria ciothe maarĩ nacio, o na icũhĩ iria ciarĩ matũ mao; nake Jakubu agĩcithika gĩtina-inĩ kĩa mũgandi ũrĩa wakuhanĩrĩirie na Shekemu.
• 5. Thutha wa ũguo makĩgwata rũgendo; na andũ arĩa maatũire matũũra marĩa maamarigicĩirie mĩena yothe makĩgwatwo nĩ guoya mũnene, na matiigana kũrũmĩrĩra ariũ a Jakubu.
• 6. Jakubu agĩgĩthiĩ agĩkinya Luzu, itũũra rĩa bũrũri wa Kanaani (na norĩo Beth-eli), we mwene, o na andũ othe arĩa maarĩ hamwe nake.
• 7. Agĩgĩakĩra kĩgongona hau, naho handũ hau akĩhatua Eli-Beth-eli; nĩ ũndũ nĩho Ngai aamwĩguũrĩirie rĩrĩa orĩire mũrũ wa nyina.
• 8. Nake Debora mũreri wa Rebeka agĩkua, agĩgĩthikwo mwena wa mũhuro wa Beth-eli, gĩtina-inĩ kĩa mũgandi ũrĩa warĩ ho, naguo ũgĩtuwo Aloni-bakuthu.
• 9. NINGĨ Ngai akiumĩrĩra Jakubu o rĩngĩ, oima Padani-aramu, akĩmũrathima.
• 10. Ngai agĩkĩmwĩra atĩrĩ, Rĩu wĩtagwo Jakubu; no rĩrĩ, thutha ũyũ ndũgacoka gwĩtwo Jakubu, no ũrĩĩtagwo Isiraeli; Ngai agĩkĩmũtua Isiraeli.
• 11. Ningĩ Ngai akĩmwĩra atĩrĩ, Niĩ nĩ niĩ Ngai Mwene-Hinya Wothe; ũrociarũrũka mũno, na wongerereke. Atĩrĩrĩ, rũrĩrĩ rũmwe, o na ndũrĩrĩ nyingĩ, ikoima thĩinĩ waku, na athamaki makoima mũthimo waku;
• 12. o naguo bũrũri ũrĩa ndaheire Iburahimu na Isaaka, nĩwe ngũhe, o na ngaũhe njiaro ciaku iria igoka thutha waku.
• 13. Nake Ngai agĩkĩambata igũrũ, akiuma harĩ we o handũ hau aaragĩria nake.
• 14. Nake Jakubu akĩhanda gĩtugĩ handũ hau Jehova aaragĩria nake, nakĩo gĩtugĩ kĩu kĩarĩ kĩa ihiga; na igũrũ rĩakĩo agĩgĩitĩrĩria indo iria ciarutagwo cia kũnyuwo cia igongona, na agĩgĩitĩrĩria maguta.
• 15. Naho handũ hau Ngai aaragĩria nake, Jakubu akĩheta Beth-eli.
• 16. Nao makĩgwata rũgendo moimĩte Beth-eli; na rĩrĩ, rĩrĩa maakorirũo matigairie gatĩĩna karayaraya makinye Efiratha-rĩ, Rakeli agĩitĩka kũrũmwo, akĩgiĩka mũno.
• 17. Na gũgĩkinya atĩrĩ, atĩ rĩrĩa aagiĩkaga mũno, mũciarithania akĩmwĩra atĩrĩ, Tiga gwĩtigĩra, nĩ ũndũ rĩu nĩũkũgĩa na kahĩĩ kangĩ.
• 18. Ningĩ gũgĩkinya atĩrĩ, atĩ rĩrĩa oimagwo nĩ muoyo (nĩ ũndũ nĩaakuire), agĩgatua Beni-oni; no ithe aagatuire Benjamini.
• 19. Rakeli agĩgĩkua, agĩthikwo njĩra-inĩ ya gũthiĩ Efiratha (na nokuo Bethi-lehemu).
• 20. Nake Jakubu akĩhanda gĩtugĩ kĩrũngiĩ mbĩrĩra-inĩ yake; nakĩo gĩtugĩ kĩu gĩtũire gĩĩtagwo Gĩtugĩ kĩa mbĩrĩra ya Rakeli, o na ũmũthĩ.
• 21. Isiraeli agĩkĩgwata rũgendo, agĩthiĩ akĩhanda hema ciake mbarĩ ĩrĩa ĩngĩ ya mũthiringo wa nyũmba ĩrĩa ndaya na igũrũ wa Ederi.
• 22. Na gũgĩkinya atĩrĩ, atĩ hĩndĩ ĩo Isiraeli aatũire bũrũri ũcio, Reubeni agĩthiĩ, akĩraara na Biliha, thuriya ya ithe; nake Isiraeli akĩigua ũhoro ũcio. Na rĩrĩ, ariũ a Jakubu maarĩ ikũmi na erĩ;
• 23. ariũ a Lea nĩ aya: nĩ Reubeni, irigithathi rĩa Jakubu, na Simeoni, na Lawii, na Juda, na Isakaru, na Zebuluni;
• 24. nao ariũ a Rakeli, nĩ Jusufu, na Benjamini;
• 25. nao ariũ a Biliha, ndungata ya mũirĩtu ya Rakeli, nĩ Dani, na Nafitali;
• 26. nao ariũ a Zilipa, ndungata ya mũirĩtu ya Lea, nĩ Gadi, na Asheri; acio nĩo ariũ a Jakubu, arĩa aaciarĩirũo nĩo o kũu Padani-aramu.
• 27. Jakubu agĩgĩthiĩ agĩkinya Mamure kũrĩ ithe Isaaka, o kũu Kiriathu-ariba (na nokuo Hebironi), nakuo nĩ kũrĩa Iburahimu na Isaaka maatũire marĩ ageni.
• 28. Nayo mĩaka ĩrĩa Isaaka aatũũrire muoyo yarĩ igana rĩa mĩrongo ĩnana.
• 29. Nake Isaaka agĩtuĩkana, agĩkua, agĩgĩturanĩrũo na andũ ao arĩa maanakua, nake agĩgĩkorũo e mũkũrũ aninĩte mĩaka mĩingĩ; nao ariũ ake, Esau na Jakubu, makĩmũthika.

Home