Go Back

Kĩambĩrĩria Chapter 34

• 1. Hĩndĩ ĩo Dina, mwarĩ wa Jakubu ũrĩa Lea aamũciarĩire, agĩthiĩ gũceerera airĩtu a bũrũri ũcio.
• 2. Nake Shekemu, mũrũ wa Hamoru, Mũhivi, mũnene wa bũrũri ũcio, akĩmuona; akĩmũnyita na hinya, akĩraara nake, akĩmwagithia gĩtĩo.
• 3. Nayo ngoro ya Shekemu ĩkĩĩrirĩria Dina, mwarĩ wa Jakubu mũno, agĩkĩenda mũirĩtu ũcio mũno, akĩmwarĩria na wega akĩmũhoreria.
• 4. Nake Shekemu akĩaria na Hamoru, ithe, akĩmwĩra atĩrĩ, Ndagũthaitha ’hikithĩria mũirĩtu ũyũ, atuĩke mũka wakwa.
• 5. Na rĩrĩ, Jakubu akĩigua atĩ Shekemu nĩathũkĩtie Dina, mwarĩ; nao ariũ ake maarĩ na mahiũ make werũ-inĩ, Jakubu agĩgĩĩkirĩra ki, o nginya rĩrĩa maainũkire.
• 6. Nake Hamoru, ithe wa Shekemu, akiuma gwake, agĩthiĩ kwĩ Jakubu makaarie nake.
• 7. Nao ariũ a Jakubu maaigua ũhoro ũcio, magĩkĩinũka moimĩte werũ-inĩ, nao magĩkĩigua ũũru, na makĩrakara mũno, nĩ gũkorũo mũndũ ũcio nĩekĩte ũndũ wa ũrimũ harĩ Isiraeli nĩ ũndũ wa kũraara na mwarĩ wa Jakubu; kuona atĩ ũndũ ũcio ndwagĩrĩire gwĩkwo o na hanini.
• 8. Nake Hamoru akĩaria nao, akĩmera atĩrĩ, Ngoro ya mũrũ wakwa, Shekemu nĩĩkwĩrirĩria mwarĩ wanyu mũno. Ndamũthaitha mũhei, atuĩke mũka.
• 9. Ningĩ-rĩ, nĩ wega tũhikithanagie mohiki, inyuĩ mũhikagie airĩtu aitũ, o na ithuĩ tũhikagie anyu.
• 10. Na mũtũũranie na ithuĩ; naguo bũrũri ũyũ witũ mũtirĩ handũ mũngĩgirĩrĩrio. Tũũrai guo na muonjorithagie kuo.
• 11. Nake Shekemu we mwene akĩĩra ithe wa Dina, na ariũ a ithe, atĩrĩ, Rekei njĩtĩkĩrĩke nĩ inyuĩ, na kĩrĩa gĩothe mũkũnjĩtia, nĩngũruta.
• 12. Njĩtiai rũracio rũingĩ, o na indo cia kũmũhe nyingĩ mũno, na gũtirĩ ũndũ, nĩngũmũhe o ta ũrĩa mũrĩnjĩra; no rĩrĩ, ndamũthaitha ’hei mũirĩtu ũcio atuĩke mũka wakwa.
• 13. Nao ariũ a Jakubu magĩcokeria Shekemu na Hamoru, ithe, ũhoro na ũhinga, nĩ ũndũ wa ũrĩa aathũũkĩtie Dina, mwarĩ wa nyina wao,
• 14. magĩkĩaria makĩmera ũũ: Atĩrĩrĩ, ithuĩ tũtingĩhota gwĩka ũndũ ũcio, wa kũhe mwarĩ wa nyina witũ mũndũ ũtarĩ mũruu; nĩ gũkorũo ũndũ ũcio nĩ wa gũtũmenithia kũrĩ andũ;
• 15. no rĩrĩ, ũndũ ũrĩa ũngĩhota gũtũma tũgwĩtĩkĩrĩre ũndũ ũcio-rĩ, no ũyũ wiki, wa atĩ mũngĩikara o ta ũrĩa ithuĩ tũtariĩ, arũme othe anyu maruithagio;
• 16. hĩndĩ ĩo twakĩhota kũmũhikithanagia na airĩtu aitũ, na ithuĩ tũhikagie anyu, o na tũtũũranie na inyuĩ, na tũtuĩke ta andũ a rũrĩrĩ rũmwe.
• 17. No rĩrĩ, mũngĩrega gũtũigua, mwaga kũrua-rĩ, no mũirĩtu witũ tũkuoya twĩthiĩre.
• 18. Naguo ũhoro ũcio maamwĩrire ũgĩkenia Hamoru, na Shekemu mũriũ.
• 19. Nake mwanake ũcio ndaigana kũgondereria ũndũ ũcio, nĩ ũndũ nĩendaga mwarĩ wa Jakubu mũno, na ningĩ aarĩ mũtĩĩku mũno gũkĩra arĩa angĩ othe a nyũmba ya ithe.
• 20. Nao Hamoru na Shekemu, mũriũ, magĩthiĩ magĩkinya kĩhingo-inĩ gĩa itũũra rĩao, magĩcira na andũ a itũũra rĩu rĩao, makĩmera atĩrĩ,
• 21. Andũ acio nĩmaarĩte ũhoro na ithuĩ; na tondũ ũcio rekei matũũre bũrũri ũyũ, na monjorithagie kuo; nĩ ũndũ atĩrĩ, bũrũri nĩ mũnene wa kũmaigana; na nĩ wega tũhikagie airĩtu ao, matuĩkage atumia aitũ, o na ithuĩ tũmetĩkĩrie airĩtu aitũ.
• 22. No rĩrĩ, ũndũ ũyũ wiki noguo ũngĩtũma andũ acio metĩkĩre gũtũũrania na ithuĩ, na tũtuĩke ta tũrĩ rũrĩrĩ rũmwe, naguo nĩ wa atĩ arũme othe thĩinĩ witũ, mũndũ o mũndũ arue, o ta ũrĩa o ene maruĩte.
• 23. Githĩ ng’ombe ciao, na indo ciao, itigagĩtuĩka ciitũ, o na mahiũ mao mothe? No kĩrekei tũmetĩkĩrĩre ũndũ ũcio, nao nĩmegũtũũrania na ithuĩ.
• 24. Nacio ciugo icio cioigirũo nĩ Hamoru, na Shekemu mũriũ, igĩĩtĩkĩrũo nĩ andũ othe arĩa moimaga na kĩhingo gĩa itũũra rĩu rĩao. Nao arũme othe arĩa moimaga na kĩhingo gĩa itũũra rĩu rĩao magĩkĩrua.
• 25. Na gũgĩkinya atĩrĩ, atĩ mũthenya wa ĩtatũ, hĩndĩ ĩrĩa andũ acio maatuuragwo, andũ erĩ thĩinĩ wa ariũ a Jakubu, Simeoni na Lawii, ariũ a nyina na Dina, makĩoya o mũndũ rũhiũ rũake rũa njora, magĩthiĩ itũũra-inĩ rĩu materĩgĩrĩirũo, makĩũraga arũme othe.
• 26. Magĩkĩũraga Hamoru, na Shekemu mũriũ, na rũhiũ rũa njora, magĩkĩruta Dina nyũmba ya Shekemu, makĩmuoya, magĩĩthiĩra.
• 27. Nao ariũ a Jakubu magĩkinya harĩ andũ acio moragĩtwo na ihenya magĩtaha indo itũũra-inĩ rĩu rĩao, nĩ ũndũ nĩmaathũkĩtie mwarĩ wa ithe wao.
• 28. Magĩgĩthiĩ na mahiũ mao ma mbũri na ng’ombe, na ndigiri ciao, o na kĩndũ kĩrĩa gĩothe kĩarĩ itũũra rĩu, o na irio iria ciothe ciarĩ mĩgũnda,
• 29. magĩgĩthiĩ na ũtonga wao wothe, na ciana ciao ciothe, na atumia ao, makĩmataha othe, o na indo iria ciothe ciarĩ nyũmba ciao.
• 30. Jakubu agĩkĩĩra Simeoni na Lawii atĩrĩ, Rĩu nĩmwatũma ’nyarirĩke, o na mwatũma ’nunge harĩ andũ a bũrũri ũyũ, nao nĩ Akanaani na Aperizi; ningĩ tondũ wa ũrĩa andũ akwa marĩ anyinyi magĩtarũo-rĩ, acio maahota kũnyũnganĩra ma’hũre ’ninwo, niĩ mwene, o na andũ a nyũmba yakwa.
• 31. Nao magĩkiuga atĩrĩ, Githĩ nĩkwagĩrĩire eke mwarĩ wa maitũ o ta ũrĩa angĩĩka mũmaraya?

Home