Go Back

Kĩambĩrĩria Chapter 31

• 1. Na rĩrĩ, Jakubu akĩigua ũhoro ũkĩario nĩ ariũ a Labani, makiuga atĩrĩ, Jakubu ekũrigia na indo ciothe iria irarĩ cia ithe witũ; naguo ũtonga ũyũ wothe e naguo, aũrutĩte thĩinĩ wa indo iria irarĩ cia ithe witũ.
• 2. Ningĩ Jakubu aarora gĩthiithi kĩa Labani, akĩona atĩ ndekũmũrora akenete ta mbere.
• 3. Nake Jehova akĩĩra Jakubu atĩrĩ, Coka bũrũri wa mathoguo, o na kũrĩ andũ anyu, na nĩngũikara hamwe nawe.
• 4. Jakubu agĩkĩrekania, agĩĩta Rakeli na Lea mathiĩ kũrĩ we, o kũu werũ, kũrĩa mahiũ make maarĩ.
• 5. Agĩkĩmera atĩrĩ, Nĩnguona atĩ ithe wanyu ndekũndora akenete gĩthiithi ta mbere; no rĩrĩ, Ngai wa baba nĩatũire anjikarĩtie.
• 6. Na rĩrĩ, inyuĩ nĩmũũĩ atĩ nĩndungatĩire ithe wanyu na hinya wakwa wothe.
• 7. Nake ithe wanyu aana’henia kaingĩ, o na akagarũra ũhoro wa mũcara wakwa maita ikũmi, no rĩrĩ, Ngai ndarĩ aareka angere ngero.
• 8. Na rĩrĩ, rĩrĩa aakoragwo oigĩte atĩrĩ, Mahiũ marĩa marĩ njũgũ nĩmo megũtuĩka mũcara waku, hĩndĩ ĩo mahiũ mothe magaciara tũũri twĩ njũgũ; ningĩ rĩrĩa oiga atĩrĩ, Mahiũ marĩa mothe marĩ manyaga nĩmo megũtuĩka mũcara waku, hĩndĩ ĩo mahiũ mothe magaciara tũũri twĩ manyaga.
• 9. Ũguo nĩguo Ngai aakĩrutire mahiũ mothe gwĩ ithe wanyu, akĩ’he.
• 10. Na gũgĩkinya atĩrĩ, atĩ hĩndĩ ĩrĩa mahiũ maambire kũigũta-rĩ, ngĩgĩtiira maitho, ngĩona na kĩroto atĩ thenge iria ciahaicaga mahiũ ciarĩ manyaga na ciarĩ njũgũ, na ciarĩ mbuu.
• 11. Nake mũraika wa Ngai akĩnjĩta ngĩrota, akiuga atĩrĩ, Jakubu, na niĩ ngĩmũcokeria atĩrĩ, Niĩ ũyũ haha.
• 12. Agĩkĩnjĩra atĩrĩ, Rĩu tiira maitho, wone atĩ thenge ciothe iria ikũhaica mahiũ nĩ iria irĩ na manyaga, na iria irĩ njũgũ, na iria irĩ mbuu; nĩ ũndũ nĩnyonete maũndũ mothe marĩa Labani agwĩkĩte.
• 13. Nĩ niĩ Ngai wa Beth-eli, o kũndũ kũrĩa waitĩrĩirie gĩtugĩ maguta, kũrĩa wehĩtĩire mwĩhĩtwa nĩ ũndũ wakwa; rĩu gĩũkĩre uume bũrũri ũyũ, ũcoke bũrũri ũrĩa waciarĩirũo.
• 14. Nao Rakeli na Lea magĩcokia makĩmũũria atĩrĩ, Anga nĩharĩ gĩcunjĩ giitũ kĩa indo, o na kana igai riitũ, rĩtigarĩte thĩinĩ wa nyũmba ya ithe witũ?
• 15. Githĩ ndatũtuaga o ta tũrĩ ageni? Nĩ ũndũ nĩaatwendirie, o na ningĩ nĩarĩkĩtie kũrĩa indo ciitũ.
• 16. Tondũ atĩrĩ, ũtonga wothe ũrĩa Ngai atunyĩte ithe witũ-rĩ, nĩ witũ, o na wa ciana ciitũ. Ika maũndũ mothe o ta ũrĩa Ngai akwĩrĩte.
• 17. Hĩndĩ ĩo Jakubu agĩũkĩra, akĩigĩrĩra ariũ ake na atumia ake igũrũ rĩa ngamĩra,
• 18. nake agĩthiĩ na mahiũ make mothe, o na indo ciake ciothe iria onganĩtie, nacio nĩcio ũhiũ ũrĩa aagĩire naguo, o ũcio onganĩtie kũu Padani-aramu, nĩ getha athiĩ akinye kwa Isaaka, ithe, o kũu bũrũri wa Kanaani.
• 19. Na rĩrĩ, hĩndĩ ĩo Labani nĩ gũthiĩ aathiĩte kũmura ng’ondu ciake guoya; nake Rakeli akĩiya mĩhianano ĩrĩa ithe aahoyaga ngai ciake nayo.
• 20. Nake Jakubu akiuma kũu na hitho, Labani ũcio, Mũsuriata, atekũmenya atĩ nĩegũthiĩ; nĩ ũndũ ndaigana kũmwĩra atĩ nĩekũũra.
• 21. Ũguo nĩguo orĩre na indo ciothe iria aarĩ nacio; agĩgĩũkĩra aguthiĩra, akĩringa rũũĩ rũa Farati, aroretie ũthiũ kĩrĩma kĩa Gileadi.
• 22. Na rĩrĩ, mũthenya wa ĩtatũ Labani akĩĩrũo atĩ Jakubu nĩorĩte.
• 23. Agĩ-kĩoya ariũ a ithe, akĩmũrũmĩrĩra rũgendo rũa matukũ mũgwanja, akĩmũkinyĩrĩra o kũu kĩrĩma-inĩ kĩa Gileadi.
• 24. Nake Ngai akiumĩrĩra Labani Mũsuriata, ũtukũ, rĩrĩa aarotaga, akĩmwĩra atĩrĩ, Wĩmenyerere ndũkae kwarĩria Jakubu ũndũ o na ũrĩkũ mwega kana mũũru.
• 25. Labani agĩgĩkinya he Jakubu. Na rĩrĩ, Jakubu agĩkorũo aambĩte hema yake hau kĩrĩma-inĩ; nake Labani na ariũ a ithe makĩamba hema ciao kĩrĩma-inĩ o ro kĩu kĩa Gileadi.
• 26. Labani agĩkĩũria Jakubu atĩrĩ, Hĩ! Ĩ nĩ atĩa wagĩĩka wakiuma kũrĩ niĩ na hitho na ndũkĩnjĩre, na wagĩthiĩ na airĩtu akwa ta arĩ gũtahwo maatahirũo mahũranĩirũo na rũhiũ rũa njora?
• 27. Wakĩũra na hitho nĩ ũndũ kĩ, wathiĩ o ro ũguo itekũmenya, na wakĩrega kũnjĩra atĩ nĩũgũthiĩ, nĩ getha ngũinũkie na gĩkeno, na gũkĩinagwo nyĩmbo, o na gũkĩhũragwo ihembe na inanda cia mũgeto?
• 28. Ningĩ warega kũ’he ihinda rĩa kũmumunya ariũ akwa na airĩtu akwa nĩkĩ? Atĩrĩrĩ, nĩweka ũndũ wa ũkĩgu.
• 29. Kũhota ndahota gũkũgera ngero; no rĩrĩ, Ngai wa thoguo nĩaranjarĩirie ũtukũ wa ira, aranjĩra atĩrĩ, Wĩmenyerere ndũkae kwarĩria Jakubu ũndũ o na ũrĩkũ mwega kana mũũru.
• 30. Na rĩrĩ, o na kũngĩtuĩka rĩu ũkĩrĩ mũthiu, na wakiumire gwitũ nĩ ũndũ nĩũtũire wĩriragĩria mũno gũcoka nyũmba ya thoguo-rĩ, wakĩiyire mĩhianano ĩrĩa ’hoyaga ngai ciakwa nayo nĩ ũndũ kĩ?
• 31. Jakubu agĩgĩcokia akĩĩra Labani atĩrĩ, ’Thiĩte na hitho nĩ ũndũ nĩndĩretigagĩra; nĩ gũkorũo ndĩroigire atĩrĩ, Hihi ndũrĩ hinya ũkĩndunya airĩtu aku.
• 32. No rĩrĩ, mũndũ ũrĩa ũrĩona na mĩhianano yaku-rĩ, mũndũ ũcio ndangĩtũũra muoyo; na rĩu ariũ aya a awa me ho-rĩ, ta tuĩria kĩndũ gĩaku kĩrĩa ndĩ nakĩo, ũkĩoe. Nĩ gũkorũo Jakubu ndaamenyete atĩ Rakeli nĩaaiyĩte mĩhianano ĩo.
• 33. Labani agĩgĩtonya hema ya Jakubu, na ya Lea, na cia ndungata iria cierĩ cia andũ-a-nja; no rĩrĩ, ndaigana kũmĩona. Agĩcoka akiuma hema ya Lea, agĩtonya ya Rakeli.
• 34. Nake Rakeli agĩkorũo nĩwe woete mĩhianano ĩo, akamĩĩkĩra matandĩko-inĩ ma ngamĩra thĩinĩ, akamĩikarĩra. Nake Labani akiururia hema-inĩ guothe, na ndaigana kũmĩona.
• 35. Nake Rakeli akĩĩra ithe atĩrĩ, Mũthuri ũyũ, tiga kũndakarĩra nĩ ũndũ wa ũrĩa ’nemetwo nĩ gũgũũkĩrĩra; nĩ ũndũ-rĩ, nĩ maũndũ ma andũ-a-nja ndĩ namo. Labani agĩgĩcaria mĩhianano ĩo mũno, na ndaigana kũmĩona.
• 36. Jakubu agĩkĩrakara, agĩtetia Labani, agĩkĩmũũria atĩrĩ, Ndũkĩnjĩre ihĩtia rĩakwa? Nakuo kwĩhia kũrĩa ngwĩhĩtie-rĩ, nĩ kũrĩkũ atĩ nĩkĩo ũnũmĩrĩire ũrakarĩte ũũ?
• 37. Ningĩ tondũ nĩuururĩtie indo-inĩ ciakwa ciothe-rĩ, nĩ kĩ wona kĩa indo cia gwaku mũciĩ? Ta kĩige haha mbere ya ariũ a awa, na ariũ a thoguo, nĩ getha matũtuithanie cira ũcio.
• 38. Rĩu-rĩ, nĩ mĩaka mĩrongo ĩĩrĩ ndũũranĩtie nawe; na rĩrĩ, ng’ondu ciaku, o na mbũri cia mĩgoma, itirahunaga, na niĩ ndirĩ ndarĩa ndũrũme cia mahiũ maku.
• 39. Ningĩ mbũri ĩrĩa yakoragwo ĩrĩĩkĩte, ĩgatinangio nĩ nyamũ, ndiakũrehagĩre, no nĩ niĩ ndamĩrĩhaga; nĩ ũndũ o na ĩngĩkorũo ĩiyĩtwo mũthenya, kana ũtukũ, nĩwandĩhagia.
• 40. Nayo mĩtũũrĩre-inĩ yakwa-rĩ, mũthenya nĩ kũũragwo ndoragagwo nĩ ũrugarĩ wa riũa, na ũtukũ ngoragwo nĩ mbaa; namo maitho makwa makĩũrũo nĩ toro.
• 41. Ningĩ-rĩ, rĩu nĩ mĩaka mĩrongo ĩĩrĩ ndũũranĩtie nawe gwaku mũciĩ; na thĩinĩ wayo, mĩaka ikũmi na ĩna ndagũtungatĩire nĩ getha ’hikie airĩtu aku erĩ, o nayo mĩaka ĩngĩ ĩtandatũ ngĩgũtungatĩra nĩ ũndũ wa mahiũ maku; naho ha ũhoro wa mũcara wakwa-rĩ, wanaũgarũra maita ikũmi.
• 42. Tiga Ngai wa baba aarĩ hamwe na niĩ, nake nĩwe Ngai wa Iburahimu, o we ũrĩa Mwĩtigĩrũo nĩ Isaaka-rĩ, ti-itherũ ũngĩanyinũkia ndĩ mũtheri. Ngai nĩonete thĩna wakwa, na wĩra wa moko makwa, na nĩkĩo aragukaanirie hwaĩ wa ira.
• 43. Labani agĩgĩcokia akĩĩra Jakubu atĩrĩ, Airĩtu aya nĩ airĩtu akwa, na ciana ici nacio nĩ ciana ciakwa, namo mahiũ maya nĩ mahiũ makwa, o nacio indo ici ciothe ũkuona, nĩ ciakwa; rĩu ũmũthĩ-rĩ, nĩ ta atĩa ingĩkĩhota gwĩka airĩtu aya akwa, kana njĩke ciana ici maciarĩte?
• 44. Rĩu ta kĩreke tũrĩkanĩre nawe; nakĩo kĩrĩkanĩro kĩu gĩtuĩke ũira harĩ niĩ nawe.
• 45. Jakubu agĩkĩoya ihiga, akĩrĩhanda rĩrũngiĩ ta gĩtugĩ.
• 46. Ningĩ Jakubu akĩĩra ariũ a ithe atĩrĩ, Ũnganiai mahiga; nao makĩoya mahiga, makĩmaiga nũndo magĩcoka makĩrĩĩra irio hau hakuhĩ na nũndo ĩo.
• 47. Nake Labani akĩmĩtua Jagari-sahadutha; no rĩrĩ, Jakubu aamĩtuire Galeedi.
• 48. Ningĩ Labani akiuga atĩrĩ, Ũmũthĩ-rĩ, nũndo ĩno nĩyo ũira wa ũhoro witũ, ithuĩ nawe. Narĩo rĩĩtwa rĩayo rĩgĩĩtwo Galeedi nĩ ũndũ wa ũhoro ũcio;
• 49. ningĩ rĩgĩĩtwo Mizipa, nĩ ũndũ Labani oigire atĩrĩ, Jehova arorora ũhoro witũ, ithuĩ nawe, hĩndĩ ĩrĩa tũrai-hanĩnirie.
• 50. Atĩrĩrĩ, wee ũngĩgathĩnia airĩtu akwa, kana ũhikie airĩtu angĩ, ũmatue airu a airĩtu aya akwa-rĩ, ririkana atĩ ti mũndũ wa gũkũ thĩ ũkagĩa ho, no Ngai nĩwe mũira ũhoro-inĩ witũ, ithuĩ nawe.
• 51. Ningĩ Labani akĩĩra Jakubu ũũ: Ta rora wone nũndo ĩno o na gĩtugĩ gĩkĩ, ici ’handĩte gatagatĩ-inĩ gaitũ, ithuĩ nawe.
• 52. Nũndo ĩno-rĩ, ĩrotuĩka ũira, o nakĩo gĩtugĩ gĩkĩ kĩrotuĩka ũira, atĩ tũtikahĩtũka nũndo ĩno, niĩ ngĩũka kũrĩ wee, kana wee ũhĩtũke nũndo ĩno, kana gĩtugĩ gĩkĩ, ũgĩũka kũrĩ niĩ, tũkĩenda kũgerana ngero.
• 53. Ngai wa Iburahimu, na Ngai wa Nahoru, o we ũcio Ngai wa ithe wao, nĩatũtuithanie cira ithuerĩ. Nake Jakubu agĩgĩĩthũũrithia ũcio Mwĩtigĩrũo nĩ Isaaka ithe.
• 54. Jakubu agĩkĩrutĩra igongona kĩrĩma-inĩ kĩu, agĩgĩĩta athoni ake marĩe irio; nao makĩrĩa irio, na makĩraara kĩrĩma-inĩ kĩu ũtukũ ũcio wothe.
• 55. Naguo mũthenya ũyũ ũngĩ Labani akĩroka gũũkĩra rũcinĩ tene, akĩmumunya ariũ ake na airĩtu ake, akĩmarathima, agĩgĩĩthiĩra agĩtigana nao, akĩĩinũkĩra gwake.

Home