Go Back

Kĩambĩrĩria Chapter 30

1. Na rĩrĩ, Rakeli ona atĩ ndaciarĩire Jakubu ciana akĩiguĩra mwarĩ wa nyina ũiru, agĩkĩĩra Jakubu atĩrĩ, ’He ciana, tondũ ingĩaga, ndĩ mũkuũ.
2. Nake Jakubu agĩgĩcinwo nĩ marakara mũno nĩ ũndũ wa Rakeli, akĩmũũria atĩrĩ, Kaĩ arĩ niĩ ndĩ ithenya rĩa Ngai ũrĩa wakũimire rũciaro?
3. Rakeli agĩkiuga ũũ: Atĩrĩrĩ, ndungata yakwa ya mũirĩtu, Biliha, nĩyo ĩno; onana nayo, nĩ getha ĩciarĩre maru-inĩ makwa, na niĩ ndĩkĩgĩe na ciana nĩ ũndũ wayo.
4. Agĩkĩmũhe Biliha, ndungata ĩo yake ya mũirĩtu, ĩtuĩke mũka; nake Jakubu akĩonana nayo.
5. Biliha agĩkĩgĩa ihu, agĩciarĩra Jakubu kahĩĩ.
6. Rakeli agĩkiuga atĩrĩ, Ngai nĩanduĩrĩire cira na kĩhooto, ningĩ nĩaiguĩte mũgambo wakwa, aka’he kahĩĩ; na tondũ ũcio agĩgeta Dani.
7. Ningĩ Biliha, ndungata ĩo ya mũirĩtu ya Rakeli, ĩkĩgĩa ihu rĩngĩ, ĩgĩciarĩra Jakubu kahĩĩ ga itiema.
8. Rakeli agĩkiuga atĩrĩ, Ngianĩte na mwarĩ wa maitũ magiyana makonainie na Ngai na ngahootana; agĩgeta Nafitali.
9. Nake Lea ona atĩ ekũrũgamĩra, akĩoya Zilipa, ndungata yake ya mũirĩtu, agĩkĩhe Jakubu, ĩtuĩke mũka.
10. Nake Zilipa, ndungata ya Lea ya mũirĩtu, ĩgĩciarĩra Jakubu kahĩĩ.
11. Lea agĩkiuga atĩrĩ, Kaĩ twĩ na mũnyaka-ĩ! Agĩgeta Gadi.
12. Ningĩ Zilipa, ndungata ya mũirĩtu ya Lea, ĩgĩciarĩra Jakubu kahĩĩ ga itiema.
13. Lea agĩgĩcoka akiuga atĩrĩ, Kaĩ ndĩ mũkenu-ĩ! Nĩ ũndũ andũ-a-nja nĩmarĩnduaga mũkenu; nake agĩgeta Asheri.
14. Na hĩndĩ ya magetha ma ngano Reubeni agĩthiĩ akĩona tũtunda tũtariĩ ta ndongu gĩthaka-inĩ, agĩtwarĩra Lea, nyina. Nake Rakeli akĩĩra Lea atĩrĩ, Ndagũthaitha ’he tũtunda tũmwe tũu mũrũguo e natuo.
15. Lea agĩkĩmũũria atĩrĩ, Anga ũkuona ta arĩ ũndũ mũnyinyi, ũguo ũndunyĩte mũthuri wakwa? Na rĩu ningĩ nĩ kwenda ũkwenda kũndunya tũtunda twa mũrũ wakwa o natuo? Rakeli agĩkĩmũcokeria atĩrĩ, Nĩagakĩraare nawe ũtukũ ũyũ nĩ ũndũ wa tũtunda tũu twa mũrũguo.
16. Nake Jakubu oka hwaĩ-inĩ oimĩte mũgũnda, Lea agĩgĩthiĩ kũmũthagania, akĩmwĩra atĩrĩ, Ndũrĩ hingo ũtegũuka gwakwa; nĩ ũndũ ti-itherũ nĩngũgũrĩte na tũtunda twa mũrũ wakwa. Jakubu agĩkĩraara nake ũtukũ ũcio.
17. Nake Ngai akĩigua mahoya ma Lea, agĩkĩgĩa ihu, agĩciarĩra Jakubu kahĩĩ ga gatano.
18. Hĩndĩ ĩo Lea agĩkiuga atĩrĩ, Ngai nĩa’heete mũcara wakwa, nĩ ũndũ wa ũrĩa ’heete mũthuri wakwa ndungata yakwa ya mũirĩtu; agĩgĩgeta Isakaru.
19. Ningĩ Lea akĩgĩa ihu rĩngĩ, agĩciarĩra Jakubu kahĩĩ ga gatandatũ.
20. Nake Lea agĩkiuga atĩrĩ, Ngai nĩa’heete kĩheo kĩega ma; rĩu mũthuri wakwa nĩegũtũũrania na niĩ, nĩ ũndũ nĩndĩmũciarĩire ihĩĩ ithathatũ; agĩgĩgeta Zebuluni.
21. Na rĩrĩ, thutha ũcio agĩciara mũirĩtu, akĩmwĩta Dina.
22. Ningĩ Ngai akĩririkana Rakeli, akĩmũigua, akĩmũhe rũciaro;
23. agĩkĩgĩa ihu, agĩciara kahĩĩ. Hĩndĩ ĩo akiuga atĩrĩ, Ngai nĩanjehereirie rũmena rũrĩa ’menetwo;
24. agĩgĩgeta Jusufu, akiuga atĩrĩ, Jehova aronyongerera kahĩĩ kangĩ.
25. Na gũgĩkinya atĩrĩ, atĩ rĩrĩa Rakeli aakorirũo aciarĩte Jusufu, Jakubu akĩĩra Labani atĩrĩ, ’He rũtha ’thiĩ, nĩ getha nginye gwitũ, o bũrũri witũ.
26. O nao atumia akwa aya maatũũmire ndũũre ngũtungatagĩra, o na ciana ciakwa, ’nengera ũreke ndĩĩthiĩre; nĩ ũndũ wee nĩũũĩ wĩra wakwa ũrĩa ndũire ngũrutagĩra.
27. Labani agĩkĩmũcokeria atĩrĩ, Kũngĩkorũo nĩngwĩtĩkĩrĩka nĩwe-rĩ, ikaranga, nĩ ũndũ nĩnyonete na ma atĩ Jehova nĩandathimĩte nĩ ũndũ waku.
28. Agĩcoka akĩmwĩra atĩrĩ, Ta tua ũnjĩre mũcara waku ũrĩa ũkwenda kũheo, na nĩngũkũhe.
29. Nake Jakubu akĩmwĩra atĩrĩ, Wee nĩũũĩ ũrĩa ngũtungatĩire, na ũrĩa mahiũ maku maikarĩte ndĩ namo.
30. Nĩ ũndũ-rĩ, itanoka, mahiũ marĩa warĩ namo maarĩ manyinyi, na rĩu, nĩmongererekete makaingĩha mũno; o na ningĩ nginya ndoka Jehova nĩakũrathimĩte na ndwere ciothe iria njerekagĩra; na rĩrĩ, kaĩ ngakĩrĩmĩra andũ a nyũmba yakwa hĩndĩ ĩrĩkũ?
31. Nake Labani akĩmũũria atĩrĩ, Ũkwenda ngũhe kĩ? Jakubu agĩkĩmwĩra atĩrĩ, Ndũrĩ kĩndũ ũkũ’he; no rĩrĩ, wakorũo nĩũgwĩtĩkĩra kũnjĩka ũndũ ũmwe ũrĩa ngũkwĩra-rĩ, nĩngũcoka kũrĩithia mahiũ maku, na ndĩmamenyagĩrĩre.
32. Naguo ũndũ ũcio nĩ ũyũ: Atĩrĩ, ngũthiĩ njange rũũru-inĩ rũaku ruothe ũmũthĩ, nyamũre ng’ondu iria ciothe irĩ mbara, na iria irĩ rumbĩ, na iria ciothe irĩ mbirũ, nacio mbũri-rĩ, nyamũre iria ciothe irĩ maara, na iria njũgũ, ndĩcieherie; iria itariĩ ũguo nĩcio igũtuĩka mũcara wakwa.
33. Naguo ũndũ ũyũ nĩguo ũkanjarĩrĩria ũhoro-inĩ wa ũthingu wakwa thutha-inĩ rĩrĩa ũgoka kũrora mũcara wakwa ũrĩa ũkonagwo o mbere yaku nĩwe; thĩinĩ wa mbũri-rĩ, iria ciothe itarĩ njũgũ o na kana maara, o na ningĩ thĩinĩ wa ng’ondu-rĩ, iria itarĩ mbirũ, icio ciothe niĩ ingĩkonwo nacio, igatuĩka cia ũici.
34. Nake Labani akiuga ũũ: Atĩrĩrĩ, nĩndetĩkĩra gũtuĩke o ta ũguo woiga.
35. Mũthenya ũcio Labani agĩkĩamũra thenge ciothe iria ciarĩ manyaga, na iria maara, na mĩgoma yothe ĩrĩa yarĩ njũgũ, na ĩrĩa yarĩ maara; o icio ciothe ciarĩ manyaga-rĩ, agĩcieheria, na ng’ondu ciothe iria ciarĩ mbirũ agĩciamũra, nacio icio ciothe agĩcihe ariũ ake macirorage,
36. agĩciehereria Jakubu handũ ha rũgendo rũa matukũ matatũ; Jakubu agĩgĩtuĩka mũrĩithi wa ndũru cia mbũri cia Labani iria ciatigarire.
37. Nake Jakubu akĩĩyoera thanju njigũ cia mũlibina, na ingĩ cia mũrothi, na cia mũarimaũ, agĩciũnũra mĩcooro mĩerũ, agĩtũma handũ hamwe harĩa herũ ha thĩinĩ wa thanju icio honeke.
38. Nacio thanju icio onũraga agaciiga mĩtaro-inĩ ya handũ harĩa haathondeketwo ha kũnyuithĩria mbũri maĩ, nĩ getha cionagwo nĩcio hĩndĩ ĩrĩa igũthiĩ kũnyuĩra maĩ ho; nacio ciaigũtaga ciathiĩ kũnyua maĩ.
39. Na rĩrĩ, mbũri igakĩigũta irĩ o hau mbere ya thanju icio nacio igagĩciara tũũri twĩ manyaga, na twĩ njũgũ, na twĩ maara.
40. Ningĩ Jakubu akĩamũrania tũũri tũu; na rĩrĩ, mothiũ ma mbũri akamaroria o harĩ tũũri tũu twĩ manyaga, o na harĩ tũrĩa tuothe tũirũ thĩinĩ wa mbũri cia Labani; nake Jakubu akĩiga mbũri ciake ciothe mwanya, na ndaigana gũcitukania na cia Labani.
41. Na gũgĩkinya atĩrĩ, atĩ hĩndĩ ĩrĩa yothe mbũri ĩrĩa ĩrĩ na hinya thĩinĩ wa mahiũ Ikũigũta-rĩ, Jakubu akaiga thanju icio mĩtaro-inĩ nĩguo cionwo nĩ mbũri ĩo, nĩ getha ĩigũtĩre thanju-inĩ icio;
42. no rĩrĩ, hĩndĩ ĩrĩa mbũri ihĩnjĩte, agatiga kũiga thanju icio ho; na tondũ ũcio mbũri iria ciarĩ hĩnju igĩtuĩka cia Labani, nacio iria ciarĩ na hinya igĩtuĩka cia Jakubu.
43. Indo cia mũndũ ũcio, ti Jakubu, ikĩongerereka mũno, agĩkĩgĩa na mahiũ maingĩ, na ndungata cia airĩtu, o na ndungata cia arũme, na ngamĩra, o na ndigiri.

Home