Go Back

Kĩambĩrĩria Chapter 28

• 1. Isaaka agĩgĩĩta Jakubu, akĩmũrathima, agĩcoka akĩmũtaara, akĩmwĩra atĩrĩ, Menya ũkanahikia mũka wa airĩtu a Kanaani.
• 2. Ũkĩra ũthiĩ Padani-aramu, ũkinye kwa Bethueli guukaguo, ithe wa nyũkwa, ũgecarĩrie mũka kũu wa airĩtu a Labani, mamaguo.
• 3. Nake Ngai Mwene-Hinya-Wothe arokũrathima, na atũme ũciarũrũke mũno na wongerereke, nĩ getha ũgatuĩka ndũrĩrĩ nyingĩ;
• 4. ningĩ Ngai arotũma ũrigie na kĩrathimo kĩrĩa Iburahimu aathĩrĩirio, wee mwene, o na njiaro ciaku, nĩ getha bũrũri ũyũ ũtũire wĩ mũgeni, o ro ũyũ Ngai aaheire Iburahimu, ũtuĩke waku.
• 5. Isaaka agĩkĩĩra Jakubu ethiĩre, nake agĩgĩkinya Padani-aramu kwa Labani wa Bethueli, Mũsuriata, mũrũ wa nyina na Rebeka, nyina wa Jakubu na Esau.
• 6. Na rĩrĩ, Esau ona atĩ Isaaka ekũrathima Jakubu na aamwĩra athiĩ Padani-aramu agecarĩrie mũka kuo, na atĩ o hĩndĩ ĩo aamũrathimaga, nĩaamũtaarire akĩmwĩra ũũ: Atĩrĩrĩ, menya ũkanahikia mũka wa airĩtu a Kanaani,
• 7. o na aakĩona atĩ Jakubu nĩaaiguire ithe na nyina, o na agĩkorũo nĩ mũthiu Padani-aramu-rĩ,
• 8. Esau agĩkĩona atĩ airĩtu a Kanaani matigũkenia Isaaka, ithe, wega,
• 9. agĩgĩcoka agĩthiĩ gwĩ Ishumaeli, akĩhikia Mahalathu, mwarĩ wa Ishumaeli wa Iburahimu, mwarĩ wa nyina na Nebaiothu, atuĩke mũka akĩmuonganĩrĩria na atumia acio angĩ ake.
• 10. Nake Jakubu akiuma Biri-shiba, agĩthiĩ arorete Harani.
• 11. Agĩkinya handũ, akĩraara ho ũtukũ ũcio wothe, nĩ ũndũ riũa nĩrĩamũthũĩire, agĩkĩoya ihiga rĩmwe rĩa marĩa maarĩ ho, agĩĩtiira mũtwe narĩo, agĩkoma o handũ hau nĩ getha ahĩtwo nĩ toro.
• 12. Nake akĩrota, na atĩrĩrĩ, akĩona ngathĩ ĩturumĩte igũrũ matu-inĩ, nao araika a Ngai makahaicaga magĩikũrukaga nayo.
• 13. Na atĩrĩrĩ, Jehova akĩonwo arũgamĩte o igũrũ rĩayo, agĩkiuga atĩrĩ, Niĩ nĩ niĩ Jehova, Ngai wa Iburahimu, thoguo, na Ngai wa Isaaka; bũrũri ũyũ ũkomete nĩwe ngahe, wee mwene, o na njiaro ciaku;
• 14. nacio njiaro ciaku igatuĩka o ta rũkũngũ rũa thĩ, na nĩũkaharaganĩria bũrũri wa mwena wa ithũĩro, ũiyũre kuo, na wa irathĩro, o na wa gathigathini na gũthini; na ningĩ-rĩ, njiaro ciothe cia thĩ ikarathimwo nĩ ũndũ waku, o na ũndũ wa njiaro ciaku.
• 15. Na atĩrĩrĩ, niĩ ndĩ hamwe nawe, na nĩndĩrĩgũikaragia o kũndũ guothe kũrĩa ũrĩthiaga, na nĩngagũcokia bũrũri ũyũ; nĩ ũndũ-rĩ, ndigagũtiga o nginya hĩndĩ ĩrĩa ngakorũo njĩkĩte maũndũ marĩa ngũheete ũhoro wamo.
• 16. Nake Jakubu agĩgĩũkĩra toro, agĩkiuga atĩrĩ, Ti-itherũ Jehova e handũ haha na ndikũũĩ.
• 17. Agĩkĩigua guoya, akiuga atĩrĩ, Kaĩ handũ haha nĩ ha kũmakania-ĩ! Na hatingĩhĩtia gũtuĩka nĩho nyũmba ya Ngai; o na kĩhingo kĩa igũrũ matu-inĩ nĩ haha.
• 18. Nake Jakubu akĩroka gũũkĩra rũcinĩ tene, akĩoya ihiga rĩrĩa etiirĩte mũtwe narĩo, akĩrĩhanda ho rĩrũngiĩ ta gĩtugĩ, agĩkĩrĩitĩrĩria maguta igũrũ.
• 19. Nake agĩĩta handũ hau Beth-eli; no rĩrĩ, rĩĩtwa rĩa itũũra rĩu mbere ĩo rĩetagwo Luzu.
• 20. Ningĩ Jakubu akĩĩhĩta mwĩhĩtwa, akiuga atĩrĩ, Ngai angĩikara hamwe na niĩ, o na a’menyerere njĩra-inĩ ĩno ngũthiĩra, na a’he irio cia kũrĩa, o na nguo cia kwĩhumba,
• 21. nĩguo ngacoka nyũmba ya baba na thayũ-rĩ, Jehova nĩagatuĩka Ngai wakwa,
• 22. narĩo ihiga rĩrĩ, o rĩrĩ ndarũgamia haha ta gĩtugĩ, rĩtuĩke nyũmba ya Ngai; na ti-itherũ gĩcunjĩ gĩa ikũmi kĩa indo ciothe iria ũka’he nĩngagũcokagĩria.

Home