Go Back

Kĩambĩrĩria Chapter 25

• 1. Na rĩrĩ, Iburahimu nĩaahikirie mũka ũngĩ, nake etagwo Ketura.
• 2. Nake akĩmũciarĩra Zimirani, na Jokishani, na Medani, na Midiani, na Ishibaku, na Shua.
• 3. Nake Jokishani agĩciara Sheba, na Dedani. Nacio ciana cia Dedani nĩcio Aashuri, na Aletushi, na Aleumi.
• 4. Nao ariũ a Midiani nĩo aya: Efa, na Eferi, na Hanoku, na Abida, na Elidaha. Acio othe nĩ ciana cia Ketura.
• 5. Nake Iburahimu akĩhe Isaaka indo ciake ciothe.
• 6. No rĩrĩ, ariũ a thuriya iria Iburahimu aarĩ nacio-rĩ, we Iburahimu nĩ iheo aamaheire; na hĩndĩ ĩo arĩ o muoyo akĩmathengia meherere Isaaka mũrũwe, akĩmaroria irathĩro-inĩ, mathiĩ na kũu bũrũri ũcio wa irathĩro-inĩ.
• 7. Namo matukũ marĩa Iburahimu aatũũrire ma mĩaka ya muoyo wake-rĩ, nĩmo maya, nĩ mĩaka igana rĩmwe rĩa mĩrongo mũgwanja na ĩtano.
• 8. Nake Iburahimu agĩtuĩkana, agĩkua ekinyĩirie, arĩ o mũthuri mũniaru, agĩgĩturanĩrũo na andũ ao arĩa maanakua.
• 9. Nao ariũ ake, Isaaka na Ishumaeli, makĩmũthika ngurunga ya Makipela thĩinĩ, ĩrĩa yarĩ gĩthaka kĩa Efironi, mũrũ wa Zoharu ũrĩa Mũhiti, kũrĩa kũng’ethanĩire na Mamure;
• 10. o mũgũnda-inĩ ũrĩa Iburahimu aagũrire gwĩ ciana cia Hethi; hau nĩho Iburahimu aathikirũo, o na Sara mũtumia wake.
• 11. Na gũgĩkinya atĩrĩ, atĩ Iburahimu aarĩkia gũkua, Ngai akĩrathima mũrũwe Isaaka o nake; nake Isaaka agĩgĩtũũra gũkuhĩ na Birilahai-roi.
• 12. Na rĩrĩ, ici nĩcio njiaro cia Ishumaeli, mũrũ wa Iburahimu, ũrĩa Iburahimu aaciarĩirũo nĩ Hagari ũrĩa Mũmisiri, mũirĩtu ũrĩa watungatagĩra Sara;
• 13. marĩĩtwa ma ariũ a Ishumaeli nĩmo maya, makĩringanio na marĩĩtwa mao, o marĩa njiaro ciao ciacokire gwĩtagwo: irigithathi rĩa Ishumaeli nĩ Nebaiothu, na arĩa angĩ nĩ Kedaru, na Adubeeli, na Mibisamu,
• 14. na Mishima, na Duma, na Masa,
• 15. na Hadadi, na Tema, na Jeturu, na Nafishu, na Kedema;
• 16. acio nĩo ariũ a Ishumaeli, na macio nĩmo marĩĩtwa mao, makĩringanio na mĩciĩ yao, o na kũrĩa gwatũire iraaro ciao; nĩ anene ikũmi na erĩ makĩgwetwo kũringana na ndũrĩrĩ iria ciĩtanagio nao.
• 17. Na ĩno nĩyo mĩaka ĩrĩa Ishumaeli aatũũrire muoyo; nĩ mĩaka igana rĩa mĩrongo ĩtatũ na mũgwanja, nake agĩtuĩkana agĩkua; akĩwaturanĩrũo na andũ ao arĩa maanakua.
• 18. Nao andũ acio ake maatũũrire kuuma Havila o nginya Shuri, kũrĩa kũhakaine na Misiri, matwaranĩte na bũrũri wa Ashuri; we Ishumaeli-rĩ, kũrĩa kwamũgũĩrĩire nĩ mwena ũcio wa irathĩro wa ariũ a ithe arĩa angĩ othe.
• 19. Nacio ici nĩcio njiaro cia Isaaka, mũrũ wa Iburahimu: Iburahimu aaciarire Isaaka;
• 20. nake Isaaka aarĩ wa mĩaka mĩrongo ĩna rĩrĩa aahikirie Rebeka, mwarĩ wa Bethueli, Mũsuriata wa Padani-aramu, mwarĩ wa nyina na Labani, Mũsuriata.
• 21. Nake Isaaka agĩthaithanĩra mũka he Jehova nĩ ũndũ aarĩ thata; nake Jehova agĩthaithĩka nĩwe, nake mũka Rebeka agĩkĩgĩa ihu.
• 22. Nacio ciana icio ii nda yake ikĩgianĩra kuo, nake akĩũria atĩrĩ, Okorũo nĩ ũguo-rĩ, ngũgĩtũũra ndĩ wa kĩ? Agĩgĩthiĩ gũtuĩria ũhoro kwĩ Jehova.
• 23. Nake Jehova akĩmwĩra ũũ: Nda yaku-rĩ, nĩ ndũrĩrĩ igĩrĩ ii kuo, Nĩ ithemba igĩrĩ cia andũ ikaamũkana kuuma o rĩrĩa ikoima kũu mũkonyo-inĩ waku; Gĩthemba kĩmwe nĩgĩgakĩria kĩrĩa kĩngĩ hinya, Mwana ũrĩa mũkũrũ atuĩke ndungata ya ũrĩa mũnyinyi.
• 24. Na rĩrĩ, matukũ make ma kuohoka maahinga-rĩ, hĩ! gũgĩgĩkorũo nĩ mahatha e namo nda.
• 25. Nako kaana karĩa kaambire kuuma kaarĩ gatune, na gakahaana o ta ririmba mwĩrĩ wako wothe; magĩgatua Esau.
• 26. Na thutha wa ũguo mũrũ wa nyina nake agĩcoka akiuma, nake agĩkorũo anyitĩte Esau ndiira ya kũgũrũ; nake agĩtuwo Jakubu; nake Isaaka aarĩ wa mĩaka mĩrongo ĩtandatũ rĩrĩa Rebeka aaciarire ciana icio.
• 27. Natuo tũhĩĩ tũu tũgĩkũra, nake Esau agĩtuĩka mũũgĩ na ũguĩmi, arĩ mũndũ wa werũ; nake Jakubu agĩtuĩka mũndũ mũhoreri watũũraga o hema-inĩ.
• 28. Na rĩrĩ, Isaaka endete Esau, nĩ ũndũ nĩaarĩaga nyama cia iguĩma rĩake, nake Rebeka akenda Jakubu.
• 29. Na rĩrĩ, Jakubu agĩkorũo akĩruga irio cia ngimo, nake Esau agĩũka oimĩte werũ-inĩ, agĩgĩkorũo arĩ mũhooteku;
• 30. we Esau agĩkĩĩra Jakubu atĩrĩ, Ta nũmia irio icio ndune ũraruga, amu ndĩ mũhooteku; nĩkĩo aacokire gwĩtagwo Edomu.
• 31. Nake Jakubu akĩmwĩra atĩrĩ, No wambire kũnyenderia ũrigithathi waku.
• 32. Nake Esau akiuga ũũ: Atĩrĩrĩ, nĩ ta ngĩkiriĩ gũkua; ũrigithathi ũcio ũgakĩng’una na kĩ?
• 33. Nake Jakubu akiuga atĩrĩ, No wambire kũndĩkĩria na mwĩhĩtwa; nake agĩkĩmũrĩkĩria na mwĩhĩtwa, agĩkĩenderia Jakubu ũrigithathi wake.
• 34. Nake Jakubu agĩkĩhe Esau mũgate na irio icio ngime cia ndengũ; nake akĩrĩa na akĩnyua, agĩcoka agĩũkĩra agĩĩthiĩra; ũguo nĩguo Esau aanyararire ũrigithathi ũcio wake.

Home