Go Back

Kĩambĩrĩria Chapter 24

• 1. Na rĩrĩ, Iburahimu nĩaakũrĩte, agatindĩkanga mĩaka ma; ningĩ Jehova nĩaarathimĩte Iburahimu maũndũ-inĩ mothe.
• 2. Nake Iburahimu akĩĩra ndungata yake ĩrĩa nene ya mũciĩ wake, ĩrĩa yaramataga indo ciake ciothe, atĩrĩ, Ndagũthaitha, ĩkĩra rũhĩ rũaku nguruĩ ya kĩero gĩakwa,
• 3. na niĩ ndũme wĩthũũrithie Jehova, o we Ngai wa igũrũ, na arĩ o we Ngai wa thĩ, uuge atĩ ndũrĩ hingo ũkahikithĩria mũrũ wakwa mũka ũrutĩtwo thĩinĩ wa airĩtu a andũ a Kanaani, aya ndũũranĩtie nao;
• 4. no rĩrĩ, nĩũthiĩ bũrũri witũ, ũkinye kũrĩ andũ aitũ, ũrutĩre mũrũ wakwa Isaaka mũka kuo.
• 5. Nayo ndungata ĩo ĩkĩmũũria atĩrĩ, Ĩ mũndũ-wa-nja ũcio angĩrega kũnũmĩrĩra oke bũrũri ũyũ-rĩ, no nginya ngatwara mũrũguo bũrũri ũcio woimire?
• 6. Nake Iburahimu akĩmĩĩra atĩrĩ, Hĩ, menya ũkanacokia mũrũ wakwa kũu!
• 7. Jehova, o we Ngai wa igũrũ, ũrĩa wandutire nyũmba-inĩ ya baba, o bũrũri ũrĩa ndaciarĩirũo, o we ũcio wanjarĩirie, na akĩnjĩra na mwĩhĩtwa ũũ: Bũrũri ũyũ nĩ mbeũ yaku ngahe-rĩ, we nĩwe ũkarekia mũraika wake athiĩ mbere yaku, nawe ũrutĩre mũrũ wakwa mũka kũu.
• 8. Na rĩrĩ, mũndũ wa nja ũcio angĩrega gũkũrũmĩrĩra-rĩ, wathirũo nĩ mwĩhĩtwa ũyũ ngũkwĩhĩtithia; ũndũ ũtangĩĩka, no gũcokia ũtangĩcokia mũrũ wakwa kũu.
• 9. Nayo ndungata ĩo ĩgĩgĩĩkĩra rũhĩ rũayo nguruĩ ya kĩero kĩa Iburahimu ũcio mwene yo, ĩkĩĩhĩta harĩ we nĩ ũndũ wa ũhoro ũcio.
• 10. Ningĩ ndungata ĩo ĩkĩoya ngamĩra ikũmi thĩinĩ wa ngamĩra cia mwene yo, ĩgĩkũũra, ĩgĩthiĩ ĩkuuĩte mĩthemba ya indo ciothe iria njega cia mwene yo; ĩgĩgĩũkĩra, ĩgĩthiĩ Mesopotamia, ĩgĩkinya itũũra rĩa Nahoru.
• 11. Na kĩhwaĩ-inĩ, hĩndĩ ĩrĩa andũ-a-nja mathiaga gũtaha maĩ, ĩgĩtũma ngamĩra ciayo iturie ndu na kũu ngarũko ya itũũra rĩu, hakuhĩ na gĩthima kĩarĩo kĩa maĩ.
• 12. Ningĩ ĩkiuga atĩrĩ, Wee Jehova, o we Ngai wa Iburahimu, mũthuri ũrĩa mũnjathi, ndagũthaitha ũndũngie mũnyaka ũmũthĩ, ũgĩtuge mwathi wakwa Iburahimu.
• 13. Ta one, ndĩkĩrũngiĩ o haha itherũkĩro-inĩ rĩrĩ rĩa maĩ, nao airĩtu a andũ arĩa ene itũũra rĩrĩ nĩ hĩndĩ maroka gũtaha maĩ.
• 14. No kĩreke gũtuĩke atĩrĩ, atĩ mũirĩtu ũrĩa ndĩrĩĩra ũũ: Ta gũithagũithia ndigithũ yaku ngunde tũĩ, nake oige atĩrĩ, Kunda, o na ngamĩra ciaku nacio no ngũcinyuithia; mũirĩtu ũcio-rĩ, nĩagĩtuĩke nĩwe ũrĩa wathĩrĩirie Isaaka, ndungata yaku; niĩ na niĩ tondũ wa ũguo ’menye nĩũtugĩte mũthuri ũcio mwathi wakwa.
• 15. Na gũgĩkinya atĩrĩ, atĩ o na ĩtanarĩkia kwaria, Rebeka agĩkiumagara, mũirĩtu waciarĩtwo nĩ Bethueli, mũrũ wa Milika, mũtumia wa Nahoru, ũrĩa mũrũ wa nyina na Iburahimu, na aarĩ na ndigithũ yake kĩande.
• 16. Nake mũirĩtu ũcio aarĩ thaka mũno akĩonwo, na aarĩ mũirĩtu gathirange, ndonanĩtwo nake nĩ mũndũ; nake agĩikũrũka agĩkinya itherũkĩro-inĩ rĩu, akĩiyũria ndigithũ yake maĩ agĩcoka akĩhaica.
• 17. Nayo ndungata ĩo ĩgĩteng’era, ĩmũtũnge, ĩkiuga atĩrĩ, Ta ’he tũĩ twa ndigithũ ĩo yaku, ngunde.
• 18. Nake akiuga atĩrĩ, Kunda, mũthuri ũyũ; agĩkĩhiũhahiũha, akĩgũithagũithia ndigithũ yake akĩmĩnyitĩrĩra na guoko, akĩmũkundia.
• 19. Na aarĩkia kũmũkundia agĩcoka akiuga atĩrĩ, Ngamĩra ciaku o nacio nĩngũcitahĩra o nginya ciiganie.
• 20. Agĩkĩhiũha kuonoreria maĩ macio maarĩ ndigithũ yake mũharatĩ-inĩ, agĩcoka agĩteng’era gĩthima-inĩ rĩngĩ atahe maĩ, o nginya agĩgĩtahĩra ngamĩra ciake ciothe.
• 21. Nake mũndũ ũcio akĩmwĩrorera mũno o akirĩte ki, amenye kana Jehova nĩagaacĩirie rũgendo rũu rũake kana tiguo.
• 22. Na gũgĩkinya atĩrĩ, atĩ ngamĩra ciarĩkia kũnyua maĩ, mũndũ ũcio akĩruta gakunju ga thahabu ka nuthu ya cekeri kangĩthimwo, o na tũturo twĩrĩ twa cekeri ikũmi cia thahabu tũgĩthimwo, twa kũmwĩkĩra moko;
• 23. akĩmũũria atĩrĩ, Wĩ mwarĩ wa ũ? Ta njĩra. Ningĩ-rĩ, gwa thoguo mũciĩ kwĩ handũ tũngĩraara?
• 24. Nake akĩmwĩra atĩrĩ, Ndĩ mwarĩ wa Bethueli mũrũ wa Milika, ũrĩa aaciarĩire Nahoru.
• 25. O na ningĩ agĩcoka akĩmwĩra atĩrĩ, Twĩ na rũhuti o na riya rĩa kũrĩo nĩ nyamũ rĩiganu, o na handũ hangĩraarũo.
• 26. Nake mũndũ ũcio akĩinamĩrĩria mũtwe akĩgooca Jehova.
• 27. Agĩkiuga atĩrĩ, Jehova, o we Ngai wa Iburahimu mũthuri ũrĩa mũnjathi, arogathwo, o we ũrĩa ũtarĩ aatiga gũtuga mwathi wakwa, o na kũmwĩka maũndũ ma ma; ningĩ o na harĩ niĩ-rĩ, Jehova nĩandehete o na njĩra, akanginyia mũciĩ wa andũ a mũhĩrĩga wa aa mwathi ũcio wakwa.
• 28. Nake mũirĩtu ũcio agĩteng’era, agĩthiĩ akĩhe aa nyina ndeto iringaine na ũhoro ũcio.
• 29. Na rĩrĩ, Rebeka: aarĩ na mũrũ wa nyina, na etagwo Labani; nake Labani ũcio akiumagara na ihenya, agĩthiĩ harĩ mũndũ ũcio, akĩmũkora hau itherũkĩro-inĩ rĩu rĩa maĩ.
• 30. Gũgĩgĩkinya atĩrĩ, atĩ rĩrĩa onire gakunju karĩa o na tũturo tũu twĩ moko ma mwarĩ wa nyina, o na ningĩ aaigua ũhoro ũcio waaririo nĩ mwarĩ wa nyina Rebeka, rĩrĩa oigaga atĩ, Mũndũ ũcio anjĩrire ũna na ũna, no gũthiĩ aathiire harĩ mũndũ ũcio; na atĩrĩ, agĩkora arũngiĩ harĩ ngamĩra o hau itherũkĩro inĩ.
• 31. Agĩkiuga atĩrĩ, Ũka ũtonye mũciĩ, wee mũrathimwo nĩ Jehova; ũrũgamĩte haha thome nĩkĩ? Nĩngũthondekeire nyũmba, o na handũ ha ngamĩra.
• 32. Nake mũndũ ũcio agĩthiĩ agĩtonya mũciĩ; akĩaũrithia ngamĩra mĩrigo, nake Labani agĩkĩrutĩra ngamĩra rũhuti o na riya, na akĩruta maĩ ma gũthambia magũrũ ma mũndũ ũcio, o na ma andũ arĩa maarĩ nake.
• 33. Ningĩ agĩcoka akĩrutĩrũo irio arĩe, nake akiuga atĩrĩ, Ndingĩrĩa itaambĩte kũmwĩra bata ũrĩa ndĩ naguo. Nake Labani akĩmwĩra, No kĩarie.
• 34. Nake akiuga atĩrĩ, Niĩ ndĩ ndungata ya Iburahimu.
• 35. Nake Jehova nĩarathimĩte mũthuri ũcio mwathi wakwa mũno, agatũũgĩra; ningĩ akamũhe ndũru cia mbũri na cia ng’ombe, o na betha na thahabu, o na ndungata cia arũme na cia airĩtu, na ndũru cia ngamĩra na ndigiri.
• 36. Nake Sara, mũtumia wa mũthuri ũcio mwathi wakwa nĩaaciarĩire mũthuri ũcio mũnjathi kahĩĩ arĩ kĩheti, nake nĩakaheete indo ciake ciothe.
• 37. Na ningĩ mũthuri ũcio mũnjathi agĩtũma ndĩĩhĩte, akiuga atĩrĩ, Menya ũkanahikithĩria mũrũ wakwa mũka ũrutĩtwo thĩinĩ wa airĩtu a andũ a Kanaani, aya ene bũrũri ũyũ ndũire;
• 38. no rĩrĩ, nĩũthiĩ nyũmba inĩ ya awa, ũkinye kũrĩ andũ aitũ, ũrutĩre mũrũ wakwa mũka kuo.
• 39. Niĩ na niĩ ngĩũria mwathi wakwa atĩrĩ, Ĩ mũndũ-wa-nja ũcio angĩrega gũkĩnũmĩrĩra?
• 40. Nake akĩnjĩra atĩrĩ, Jehova, ũrĩa ndũire ’thiaga itekuuma harĩ we, nĩakarekia mũraika wake athiĩ hamwe nawe, na agaacĩrie rũgendo rũaku, nawe ũrutĩre mũrũ wakwa mũka thĩinĩ wa andũ aitũ, o thĩinĩ wa nyũmba ya awa;
• 41. na rĩrĩ, warĩkia gũkinya kwa andũ aitũ, hĩndĩ ĩo nĩũgathirũo nĩ rĩĩgeka rĩrĩ ngũkwĩgekithia; nao mangĩkaaga gũkũne we, wagĩthirũo nĩ rĩĩgeka rĩu rĩakwa.
• 42. Niĩ na niĩ ũmũthĩ nĩguo nginyire harĩa itherũkĩro-inĩ, ndoiga atĩrĩ, Wee Jehova, o wee Ngai wa Iburahimu, mũthuri ũrĩa mũnjathi, ũngĩkorũo rĩu nĩũkũgaacĩria rũgendo rũrũ njũkĩte,
• 43. ta one, ndĩkĩrũngiĩ o haha itherũkĩro-inĩ rĩrĩ rĩa maĩ. No kĩreke gũtuĩke atĩrĩ, atĩ mũirĩtu ũrĩa ũngiumagara oke gũtaha maĩ, o ũrĩa ndĩrĩĩra ũũ: Ta ’he tũĩ twa ndigithũ ĩo yaku ngunde,
• 44. nake anjĩre atĩrĩ, Wee kunda, o na nĩngũtahĩra ngamĩra ciaku o nacio; ũcio-rĩ, nĩatuĩke nĩwe mũndũ-wa-nja ũrĩa Jehova aathĩrĩirie mũriũ wa mũthuri ũrĩa mwathi wakwa.
• 45. Na rĩrĩ, itanarĩkia kwaria ũguo na ngoro-rĩ, atĩrĩrĩ, Rebeka aakiumagara e na ndigithũ yake kĩande; nake aaikũrũka aakinya itherũkĩro-inĩ, aataha maĩ; ndakĩmwĩra atĩrĩ, Ta reka ngunde.
• 46. Nake aahiũhahiũha, aaruta ndigithũ kĩande aamĩgũithagũithia, oiga atĩrĩ, Kunda, o na ngamĩra ciaku nacio no ngũcinyuithia; ndakĩnyua, nake aacoka aanyuithia ngamĩra o nacio.
• 47. Ndagĩcoka ndamũũria atĩrĩ, Wĩ mwarĩ wa ũ? Nake oiga, Ndĩ mwarĩ wa Bethueli mũrũ wa Nahoru, ũrĩa Milika aamũciarĩire; na niĩ ndakĩmwĩkĩra gakunju iniũrũ, na tũturo moko.
• 48. Ningĩ ndainamĩrĩria mũtwe, ndahee Jehova gĩtĩo, ndakĩgatha Jehova, o we Ngai wa Iburahimu mũthuri ũcio mũnjathi, amu nĩaandehire na njĩra o ĩrĩa yerekereire nĩguo njiyĩre mwarĩ wa mũrũ wa nyina na mwathi ũcio wakwa, agatuĩke wa mũrũwe.
• 49. Na rĩu mũngĩkorũo nĩmũgwĩka mwathi ũcio wakwa maũndũ ma ma-rĩ, njĩrai; na kũngĩkorũo tiguo, mũnjĩre, nĩ getha ’menye kana ngũgera ya ũrĩo kana ya ũmotho.
• 50. Hĩndĩ ĩo Labani na Bethueli magĩcokia makiuga atĩrĩ, Ũndũ ũyũ uumĩte kwĩ Jehova; ithuĩ-rĩ, tũtingĩhota gũgũcokeria ũũru kana wega.
• 51. Rĩu-ĩ, Rebeka nĩwe ũyũ o haha ũrĩ, muoe mũthiĩ, agagĩtuĩke mũka wa mũrũ wa mũthuri ũcio mwathi waku, o ta ũguo Jehova aarĩtie.
• 52. Na gũgĩkinya atĩrĩ, atĩ rĩrĩa ndungata ya Iburahimu yaiguire ũhoro wao, ĩkĩinamĩrĩra Jehova ĩgĩturumithia ũthiũ thĩ.
• 53. Ningĩ ndungata ĩo ĩkĩruta indo cia betha, o na cia thahabu, o na nguo, ĩgĩcihe Rebeka, nake mũrũ wa nyina, o gwata nyina, ĩkĩmahe indo ii bata.
• 54. Nayo ndungata ĩo na andũ acio maarĩ nayo magĩkĩrĩa na makĩnyua, na makĩraara kuo ũtukũ ũcio; magĩkĩroka gũũkĩra rũcinĩ, nake mũndũ ũcio akiuga atĩrĩ, Rekei ndĩĩthiĩre nyinũke kwĩ mwathi wakwa.
• 55. Nake mũrũ wa nyina na mũirĩtu, o na nyina, makiuga atĩrĩ, Reka mũirĩtu aikarange na ithuĩ tũtukũ tũnini, na arĩ ikũmi; na thutha ũcio agagĩthiĩ.
• 56. Nake akĩmera atĩrĩ, Tigai kũngiria ’thiĩ, kuona atĩ Jehova nĩagaacĩirie rũgendo rũrũ rũakwa; rekei ’thiĩ nyinũke kwĩ mwathi wakwa.
• 57. Nao makiuga atĩrĩ, Nĩtũgwĩta mũirĩtu tũmũũrie, tũigue kanua gake.
• 58. Magĩgĩĩta Rebeka, makĩmũũria atĩrĩ, Nĩmũgũthiĩ na mũndũ ũyũ? Nake akiuga atĩrĩ, Nĩngũthiĩ.
• 59. Magĩkiugĩra Rebeka mwarĩ ũcio wao ũhoro, na mũtumia ũrĩa wamũrerete, o na ndungata ĩo ya Iburahimu, hamwe na andũ ayo.
• 60. Magĩkĩrathima Rebeka, makĩmwĩra atĩrĩ, Mwarĩ ũyũ witũ, ũrotuĩka nyina wa ngiri ikũmi maita ngiri na ngiri, nayo mbeũ yaku ĩrokerigagĩria na kĩhingo kĩa arĩa makamĩthũũra.
• 61. Nake Rebeka agĩũkĩra, me na airĩtu ake a kumũtungata, magĩthiĩ mahaicĩte ngamĩra, makĩrũmĩrĩra mũndũ ũcio; nayo ndungata ĩo ĩkĩoya Rebeka, ĩgĩĩthiĩra.
• 62. Nake Isaaka agĩkorũo okĩte na njĩra ĩrĩa yoimĩte Biri-lahai-roi, nĩ gũkorũo aatũire bũrũri ũcio wa Gũthini.
• 63. Na rĩrĩ, ihinda rĩa kĩhwaĩ-inĩ Isaaka akiumagara na hau rũriĩ agecũranganie, ningĩ agĩtiira maitho, akĩona atĩrĩ, nĩ ngamĩra iroka.
• 64. O nake Rebeka agĩtiira maitho, na ona Isaaka, agĩkiuma ngamĩra igũrũ.
• 65. Akĩũria ndungata ĩo atĩrĩ, Mũndũ ũrĩa ũroka na gũkũ rũriĩ gũtũtũnga, nĩ ũrĩkũ? Nayo ndungata ĩo ĩkiuga atĩrĩ, Nĩ mwathi wakwa; nake Rebeka akĩoya tama wake wa kwĩhumbĩra, akĩĩhumba naguo.
• 66. Nayo ndungata ĩo ĩkĩĩra Isaaka maũndũ mothe marĩa yekĩte.
• 67. Nake Isaaka akĩmũtonyia hema ya nyina Sara, agĩkĩhikia Rebeka ũcio, agĩtuĩka mũka, na akĩmwenda; Isaaka agĩkĩhorerio ihooru rĩa gũkuĩrũo nĩ nyina.

Home