Go Back

Kĩambĩrĩria Chapter 22

• 1. Thutha wa maũndũ macio gũgĩkinya atĩrĩ, atĩ Ngai akĩgeria Iburahimu, akĩmwĩra atĩrĩ, Iburahimu-ĩ; nake agĩĩtĩka akiuga, Niĩ ũyũ.
• 2. Agĩkĩmwĩra atĩrĩ, Rĩu ũkĩra woe mũrũguo o ũcio wa mũmwe, ũcio wendete mũno, o we Isaaka, ũthiĩ bũrũri wa Moria, ũkamũrutĩre kuo kĩrĩma-inĩ kĩmwe kĩa iria ii kuo, o kĩrĩa ngakwĩra, atuĩke ihaki rĩa njino.
• 3. Nake Iburahimu akĩroka gũũkĩra rũcinĩ tene, agĩtandĩka ndigiri yake, agĩthiĩ na aanake erĩ a gwake, na mũriũ Isaaka; ningĩ agĩatũranga ngũ cia gũcina ihaki rĩu rĩa njino, agĩgĩũkĩra, agĩthiĩ erekeire o kũndũ kũu erirũo nĩ Ngai.
• 4. Na mũthenya wa gatatũ we Iburahimu agĩgĩtiira maitho, akĩona kũndũ kũu e kũraya.
• 5. Nake Iburahimu akĩĩra aanake acio a gwake atĩrĩ, Inyuĩ ikaragai haha na ndigiri, na ithuĩ na kĩhĩĩ gĩkĩ tũthiĩ na kũrĩa, tũkahakĩre Ngai kuo, tũmũcokerere.
• 6. Nake Iburahimu akĩoya ngũ icio cia gũcina ihaki rĩu, agĩciigĩrĩra mũriũ Isaaka; nake agĩthiĩ agwete mwaki o na kahiũ, nao erĩ magĩgĩthiĩ hamwe.
• 7. Nake Isaaka akĩarĩria ithe Iburahimu, akiuga atĩrĩ, Baba, nake Iburahimu agĩcokia, Niĩ ũyũ, mũriũ. Agĩkĩmũũria atĩrĩ, Rĩu-rĩ, mwaki na ngũ nĩcio ici-ĩ, ndũrũme ya ihaki rĩa njino ĩkĩrĩ ha?
• 8. Nake Iburahimu akiuga atĩrĩ, Mũrũ wakwa, Ngai nĩekwĩonera ndũrũme ya ihaki rĩa njino. Nao erĩ magĩgĩthiĩ.
• 9. Magĩkinya o handũ harĩa erĩtwo nĩ Ngai; nake Iburahimu agĩaka kĩgongona ho, agĩcoka akĩara ngũ o wega, ningĩ akĩoha mũriũ Isaaka, akĩmũkomia kĩgongona-inĩ kĩu, igũrũ rĩa ngũ icio.
• 10. Nake Iburahimu agĩtambũrũkia guoko, akĩoya rũhiũ orage mũriũ.
• 11. Na rĩrĩ, mũraika wa Jehova arĩ o igũrũ akĩmwĩta akiuga atĩrĩ, Iburahimu, Iburahimu. Nake Iburahimu agĩĩtĩka akiuga, Niĩ ũyũ.
• 12. Agĩkĩmwĩra atĩrĩ, Menya ũhutie kĩhĩĩ kĩu na guoko gwaku, o na kana ũgĩĩke ũndũ o na ũrĩkũ, nĩ gũkorũo rĩu nĩndamenya atĩ nĩwĩtigĩrĩte Ngai, kuona atĩ ndũnangiria mũrũguo, o mũrũguo ũcio wa mũmwe.
• 13. Nake Iburahimu agĩgĩtiira maitho, akĩbaranga; na atĩrĩ, thutha wake gũgĩkorũo kwĩ ndũrũme ĩnyitĩtwo hĩa nĩ mĩrita gĩthaka-inĩ. Nake Iburahimu agĩthiĩ, akĩnyita ndũrũme ĩo, akĩmĩruta ĩtuĩke ihaki rĩa njino ithenya rĩa mũriũ.
• 14. Nake Iburahimu agĩtua handũ hau Jehova-jire, o ta ũrĩa gũtũire kwĩragwo o na ũmũthĩ, atĩ Kĩrĩma-inĩ kĩa Jehova nĩkuo kĩrĩa kĩbatarainie gĩkoneka.
• 15. Nake mũraika ũcio wa Jehova arĩ o igũrũ agĩcoka agĩĩta Iburahimu ihinda rĩa kerĩ,
• 16. akiuga ũũ: Jehova ekuuga atĩrĩ, Nĩndĩĩhĩtĩte ngegweta niĩ mwene, ngoiga atĩrĩ, atĩ tondũ nĩweka ũguo, waaga kũngiria mũrũguo, o mũrũguo ũcio wa mũmwe-rĩ,
• 17. kũrathima no mũhaka ngũrathime, o na gũthegeiya no mũhaka ngũthegeerie mbeũ, ĩingĩhe o ta njata cia igũrũ, o na ta mũthanga ũrĩa ũrĩ hũgũrũrũ-inĩ cia iria rĩrĩa inene; nayo mbeũ yaku nĩĩkerigagĩria na kĩhingo gĩa thũ ciayo.
• 18. Na ningĩ ndũrĩrĩ ciothe cia thĩ ikarathimwo nĩ ũndũ wa mbeũ ĩo yaku; nĩ tondũ-rĩ, nĩwĩtĩkĩrĩte kũigua mũgambo wakwa.
• 19. Gwakinya hau, Iburahimu agĩgĩcokerera aanake acio a gwake, magĩgĩũkĩra magĩthiĩ othe hamwe, magĩkinya Biri-shiba; nake Iburahimu agĩgĩtũũra kũu Biri-shiba.
• 20. Thutha wa maũndũ macio gũgĩkinya atĩrĩ, atĩ Iburahimu akĩheo ũhoro, akĩĩrũo ũũ: Atĩrĩrĩ, Milika o nake nĩaciarĩire Nahoru ũrĩa mũrũ wa nyũkwa ciana;
• 21. wa irigithathi nĩ Uzu, na mũrũ wa nyina nĩ Buzu; ningĩ he Kemueli, ithe wa Aramu,
• 22. na Kesedu, na Hazo, na Pilidashu, na Jidilafu, o na Bethueli.
• 23. Nake Bethueli nĩwe waciarire Rebeka. Andũ acio anana nĩo Milika aaciarĩire Nahoru, mũrũ wa nyina na Iburahimu.
• 24. Nayo thuriya yake yetagwo Reuma o nayo ĩgĩciara Teba, na Gahamu, na Tahashu, o na Maaka.

Home