Go Back

Kĩambĩrĩria Chapter 20

• 1. Nake Iburahimu akiuma kũrĩa aarĩ, akĩgwata rũgendo erekeire bũrũri wa Gũthini, agĩthiĩ gũtũũra gatagatĩ ga Kadeshi na Shuri, agĩkĩamba kũrĩangĩra ũgeni Gerari.
• 2. Na rĩrĩ, ha ũhoro wa Sara mũtumia wake, Iburahimu akiuga atĩrĩ, Ũyũ nĩ mwarĩ witũ; nake Abimeleku mũthamaki wa Gerari akĩrehania, akĩgĩrithia Sara.
• 3. No rĩrĩ Ngai agĩkora Abimeleku ũtukũ na njĩra ya kĩroto, akĩmwĩra ũũ: Atĩrĩ rĩu ũtariĩ o ta mũndũ mũkuũ nĩ ũndũ wa mũndũ-wa nja ũyũ ũgĩrithĩtie, nĩ gũkorũo nĩ mũka wĩ na mwene.
• 4. Na rĩrĩ, Abimeleku ndaakoretwo amũthengereire; agĩkĩũria atĩrĩ, Mwathani, githĩ woraga rũrĩrĩ rũthingu?
• 5. Githĩ mũndũ ũcio we mwene ndaranjĩrire ũũ: Ũyũ nĩ mwarĩ witũ? O nake mũka ũcio we mwene aroiga ũũ: Ũyũ nĩ mũndũ witũ? Ũndũ ũcio kaĩ ndĩwĩkĩte o na ũthungĩru wa ngoro-ĩ, ngawĩka moko matarĩ na kaũũru o na karĩkũ.
• 6. Nake Ngai agĩcoka akĩmwĩra kĩroto-inĩ o kĩu atĩrĩ, Nĩguo, nĩnjũĩ atĩ wĩkĩte ũguo na ũthungĩru wa ngoro, o na nĩ niĩ ndĩrakũgiririe ũnjĩhie; nĩkĩo itanareka ũmũhutie.
• 7. Tondũ ũcio rĩu cokia mũka wa mũndũ ũcio, nĩ gũkorũo mwene nĩ mũnabii, nake nĩegũkũhoera, nawe ũikare o muoyo; na warega kũmũcokia-rĩ, menya atĩ no mũhaka ũkue, wee mwene, o na andũ aku othe.
• 8. Nake Abimeleku akĩroka gũũkĩra rũcinĩ tene, agĩĩta ndungata ciake ciothe, agĩciĩra maũndũ macio mothe ikĩmeiguagĩra na matũ ma cio, nao andũ acio magĩĩtigĩra mũno.
• 9. Hĩndĩ ĩo Abimeleku agĩĩta Iburahimu, akĩmũũria atĩrĩ, Hĩ! Ĩ watwĩka atĩa? Na ningĩ-rĩ, kaĩ ngwĩhĩtie wĩhia ũrĩkũ atĩ nĩkĩo ũtũmĩte niĩ o na bũrũri ũyũ ’thamakaga tũgĩe na ihĩtia inene ũũ? Ũnjĩkĩte maũndũ mataagĩrĩire gwĩkanwo.
• 10. Ningĩ Abimeleku akĩũria Iburahimu atĩrĩ, Kaĩ wonete kĩ, kĩu gĩatũmire wĩke ũguo?
• 11. Nake Iburahimu akiuga atĩrĩ, Ndekire ũguo nĩ ũndũ ndegeragĩria atĩrĩ, Hĩ! No mũhaka Ngai akorũo atetigĩrĩtwo kũndũ gũkũ, na nĩngũũragwo nĩ ũndũ wa mũka wakwa.
• 12. Na ningĩ ti-itherũ no witũ, nĩ mwarĩ wa awa, no ti wa maitũ, na nĩaagĩtuĩkire mũka wakwa;
• 13. na nĩgwakinyire atĩrĩ, atĩ rĩrĩa Ngai aandutire kwa awa, ’thiĩ ngorũre, nderire mũka ũcio wakwa atĩrĩ, Ũndũ ũrĩa ũrĩnjĩkaga na ũtugi waku nĩ ũyũ, atĩ kũndũ kũrĩa guothe tũrĩthiaga, ũhoro wakwa uugage atĩrĩ, Ũyũ nĩ mũndũ witũ.
• 14. Nake Abimeleku akĩoya gĩkundi kĩa ndũrũme na ndegwa, o na ndungata cia arũme na cia aka, agĩcihe Iburahimu, o na akĩmũcokeria Sara mũtumia wake.
• 15. Na ningĩ Abimeleku akĩmwĩra atĩrĩ, One, bũrũri wakwa nĩguo ũyũ wine; tũũra guo o harĩa ũrĩenda.
• 16. Agĩcoka akĩĩra Sara atĩrĩ, One, nĩndahe mũndũ ũyũ wanyu cekeri ngiri cia betha; nĩ rĩ’, nĩ kĩhumbi gĩaku kĩa maitho harĩ andũ aya othe mwĩ nao, na nĩũrĩonagwo wĩ mũthingu nĩ andũ othe.
• 17. Nake Iburahimu agĩkĩhoya Ngai, nake Ngai akĩhonia Abimeleku me na mũka, o na ndungata ciake cia airĩtu, nao magĩgĩcoka gũciaraga,
• 18. amu Jehova nĩaatũmĩte andũ-a-nja othe a nyũmba ya Abimeleku marũgamĩre o kũrũgamĩra, nĩ ũndũ wa Sara mũka wa Iburahimu.

Home