Go Back

Kĩambĩrĩria Chapter 17

• 1. Na rĩrĩ, rĩrĩa Aburamu aakorirũo arĩ wa mĩaka mĩrongo kenda na kenda, Jehova akĩmuumĩrĩra, akĩmwĩra atĩrĩ, Niĩ nĩ niĩ Mũrungu ũrĩa Mwene-Hinya; tũũra ũthiaga ũtekuuma harĩ niĩ, na ũtuĩke mũkinyanĩru.
• 2. Na niĩ nĩngwĩkĩra kĩrĩkanĩro giitũ nawe, na nĩngatũma ũkĩrĩrĩrie gũthegea.
• 3. Nake Aburamu akĩĩgũithia agĩturumithia ũthiũ thĩ, nake Ngai akĩmwarĩria, akĩmwĩra atĩrĩ,
• 4. Niĩ hakwarĩ, nĩ kũrĩkanĩra ndarĩkanĩra nawe, nawe nĩũgatuĩka ithe wa ndũrĩrĩ nyingĩ mũno.
• 5. O na ningĩ kuuma rĩu ndũgacoka gwĩtwo Aburamu; ũrĩĩtagwo Iburahimu, nĩ ũndũ nĩngũtuĩte ithe wa ndũrĩrĩ nyingĩ mũno.
• 6. Na nĩngatũma ũciarũrũke, na ndũme ũtuĩke ndũrĩrĩ nyingĩ, o na ndũme thĩinĩ waku kuume athamaki.
• 7. Na nĩngatũũra nũmĩtie kĩrĩkanĩro giitũ nawe, o na mbeũ yaku ya thutha, o gwata njiaro ciayo ciothe, nĩ getha gĩtuĩke kĩrĩkanĩro gĩa gũtũũra tene na tene, gĩa atĩ nduĩke Ngai waku, na wa mbeũ yaku ya thutha.
• 8. Naguo bũrũri ũyũ ũtũire wĩ mũgeni, o bũrũri ũyũ wothe wa Kanaani-rĩ, nĩwe ngahe, o na mbeũ yaku ya thutha, ũtuĩke wanyu kĩũmbe tene na tene; na niĩ-rĩ, nĩ niĩ ngatũũra ndĩ o Ngai wayo.
• 9. Ningĩ Ngai akĩĩra Iburahimu atĩrĩ, Nawe, ha ũhoro waku-rĩ, tũũra ũrũmĩrĩire kĩrĩkanĩro gĩkĩ gĩakwa, wee mwene, na mbeũ yaku ya thutha, o gwata njiaro ciayo ciothe.
• 10. Na rĩrĩ, kĩrĩkanĩro gĩakwa, kĩrĩa mũgũtũũra mũrũmĩrĩire, giitũ na inyuĩ na mbeũ yaku ya thutha, nĩkĩo gĩkĩ: atĩ mũndũ o wothe wĩ thĩinĩ wanyu wa mũthemba wa arũme no kinya akarua.
• 11. Na mũrĩruaga nyama ya mwĩrĩ ĩrĩa ya gĩrima; naguo ũndũ ũcio ũtuĩke rũũri rũa atĩ he kĩrĩkanĩro giitũ na inyuĩ.
• 12. Mwana o wothe wa kahĩĩ wĩ thĩinĩ wanyu, aanina mĩthenya ĩnana, no mũhaka akarua; mũndũ o wothe wa mũthemba wa arũme njiaro-inĩ cianyu ciothe, no mũhaka akarua, o gwata ũrĩa ũtarĩ wa mbeũ yaku ũciarĩirũo mũciĩ, o na kana akagũrũo harĩ mũndũ wa kũngĩ na mbia.
• 13. Mũndũ ũcio ũciarĩirũo gwaku mũciĩ, O na kana ũcio ũgũrĩtwo na mbia ciaku-rĩ, matirĩ hingo matekũrua, nĩguo kĩrĩkanĩro gĩakwa gĩtũũre mĩĩrĩ-inĩ yanyu gĩtuĩke kĩrĩkanĩro gĩa tene na tene.
• 14. Nake mũndũ wa mũthemba wa arũme ũrĩa ũtaruĩte nyama ya mwĩrĩ ĩrĩa ya gĩrima, ũcio no mũhaka aingatwo oime rũrĩrĩ-inĩ; mũndũ ũcio-rĩ, nĩ kwagarara aagararĩte kĩrĩkanĩro gĩakwa.
• 15. Ningĩ Ngai akĩĩra Iburahimu atĩrĩ, Ha ũhoro wa mũkaguo Sarai-rĩ, ndũgũcoka kũmwĩta Sarai; rĩĩtwa rĩrĩa arĩĩtagwo nĩ Sara.
• 16. O nake-rĩ, nĩngũmũrathima, na ningĩ nĩngatũma agũciarĩre kahĩĩ. Ĩĩ-ni, nĩngũmũrathima, na nĩagatuĩka nyina wa ndũrĩrĩ nyingĩ, na thĩinĩ wake nĩgũkoima athamaki a gũthamakĩra irĩndĩ.
• 17. Hĩndĩ ĩo Iburahimu agĩkĩĩgũithia agĩturumithia ũthiũ thĩ, agĩtheka; akĩĩyũria na ngoro atĩrĩ, Githĩ mũndũ wa mĩaka igana aahota kũgĩa mwana? Sara nake, na nĩ wa mĩaka mĩrongo kenda-rĩ, githĩ aaciara?
• 18. Nake Iburahimu agĩcoka akĩĩra Ngai atĩrĩ, Na arĩ korũo Ishumaeli etĩkĩrĩka maitho-inĩ maku!
• 19. Nake Ngai akiuga atĩrĩ, Aca-ni; nĩ Sara, mũkaguo, ũgagũciarĩra kahĩĩ, nawe ũgatue Isaaka; na nĩngakarũmĩria kĩrĩkanĩro gĩakwa, gĩtuĩke gĩa gũtũũra tene na tene harĩ mbeũ yako ya thutha.
• 20. Na ha ũhoro wa Ishumaeli-rĩ, nĩndĩkĩtie gũkũigua; atĩrĩrĩ, kũmũrathima nĩndĩmũrathimĩte, na nĩngatũma aciare mũno, na akĩrĩrĩrie gũthegea; nake agaciara anene ikũmi na erĩ, na nĩngatũma atuĩke rũrĩrĩ rũnene.
• 21. No rĩrĩ, nĩ Isaaka ngarũmĩria kĩrĩkanĩro gĩakwa, o we ũcio ũgaciarĩrũo nĩ Sara, ihinda o ta rĩrĩ rĩakinya, mwaka ũyũ ũgũũka.
• 22. Nake Ngai agĩgĩtiga kũmwarĩria, akĩambata igũrũ, akiuma harĩ Iburahimu.
• 23. Na rĩrĩ, mũthenya o ro ũcio Iburahimu akĩoya mũriũ Ishumaeli, na andũ othe arĩa maaciarĩirũo gwake, o na andũ othe arĩa maagũrĩtwo na mbia ciake, arĩa othe a mũthemba wa arũme a nyũmba yake, akĩmaruithia nyama ya mwĩrĩ ĩrĩa ya gĩrima, o ta ũrĩa Ngai aamwĩrĩte.
• 24. Nake Iburahimu aakorirũo arĩ wa mĩaka mĩrongo kenda na kenda, hĩndĩ ĩo aaruire nyama ya mwĩrĩ ĩrĩa ya gĩrima.
• 25. Nake mũriũ Ishumaeli aakorirũo arĩ wa mĩaka ikũmi na ĩtatũ hĩndĩ ĩo aaruire nyama ya mwĩrĩ ĩrĩa ya gĩrima.
• 26. Mũthenya o ro ũcio-rĩ, noguo Iburahimu o na mũriũ Ishumaeli maaruire,
• 27. o na arũme othe a nyũmba yake, arĩa maaciarĩirũo gwake, na arĩa maagũrĩtwo harĩ mũndũ wa kũngĩ na mbia, andũ acio othe-rĩ, makĩruanĩra o hamwe nake.

Home