Go Back

Kĩambĩrĩria Chapter 14

• 1. Na rĩrĩ, gũgĩkinya atĩrĩ, atĩ matukũ ma Amurafeli mũthamaki wa Shinaru, na Arioku mũthamaki wa Elasaru, na Kedorilaomeri mũthamaki wa Elamu, na Tidali mũthamaki wa Goimu-rĩ, athamaki acio nĩmaathiire ita
• 2. makahũrane na Bera mũthamaki wa Sodomu, na Birisha mũthamaki wa Gomora, na Shinabu mũthamaki wa Adima, na Shemeberi mũthamaki wa Zeboimu, o na ũrĩa warĩ mũthamaki wa Bela (na nokuo Zoari).
• 3. Acio othe-rĩ, nĩmeringanĩire hamwe gĩtuamba-inĩ gĩa Sidimu (na nokuo Iria rĩa Cumbĩ).
• 4. Maatũire matungatagĩra mũthamaki ũcio wetagwo Kedorilaomeri mĩaka ikũmi na ĩĩrĩ, na mwaka wa ikũmi na ĩtatũ makĩmũrega.
• 5. Na mwaka wa ikũmi na ĩna Kedorilaomeri agĩthiĩ na athamaki acio maarĩ nake, makĩhũrĩra Arefai kũndũ gwĩtagwo Ashiterothu-karinaimu, o na makĩhũrĩra Azuzi kũrĩa gwĩtagwo Hamu, na Aemi kũrĩa gwĩtagwo Shave-kiriathaimu,
• 6. o na Ahori kĩrĩma-inĩ kĩao gĩĩtagwo Seiru, o nginya Eli-parani, kũrĩa gũkuhanĩrĩirie na werũ.
• 7. Magĩcoka makĩhũndũka, magĩkinya Eni-mishipatu (na nokuo Kadeshi), magĩkĩhũra bũrũri wothe wa Aamaleki, o na makĩhũra Aamori arĩa maatũire Hazazoni-tamaru.
• 8. Nake mũthamaki wa Sodomu, na mũthamaki wa Gomora, na mũthamaki wa Adima, na mũthamaki wa Zeboimu, na mũthamaki wa Bela (na nokuo Zoari), acio othe-rĩ, makiumagara, magĩthiĩ makĩarania ita ciao mahũranĩre o kũu gĩtuamba gĩa Sidimu
• 9. na athamaki acio angĩ, aa Kedorilaomeri mũthamaki wa Elamu, na Tidali mũthamaki wa Goimu, na Amurafeli mũthamaki wa Shinaru, na Arioku mũthamaki wa Elasaru; athamaki acio ana mahũrane na athamaki acio angĩ atano.
• 10. Nakĩo gĩtuamba kĩu gĩa Sidimu kĩaiyũire mĩthima ya rami; nao aa mũthamaki wa Sodomu na wa Gomora makĩũra, makĩgũa kuo, nao arĩa maatigarire makĩũrĩra kĩrĩma-inĩ.
• 11. Nao acio angĩ magĩtaha indo ciothe cia Sodomu na Gomora, o na irio ciao ciothe, magĩĩthiĩra.
• 12. O na magĩtaha Loti, mũriũ wa mũrũ wa nyina na Aburamu, ũrĩa watũire Sodomu, o na indo ciake, magĩĩthiĩra.
• 13. Na rĩrĩ, mũndũ ũmwe wahonokete agĩthiĩ, akĩhe Aburamu ũcio Mũhibirania ũhoro; na rĩrĩ, Aburamu aatũire hakuhĩ na mĩtĩ ĩrĩa ĩĩtagwo Mĩgandi ya Mamure ũrĩa Mũamori, mũrũ wa nyina na Eshikoli, o na Aneri; nao andũ acio nĩmaatumĩte rũmwe na Aburamu.
• 14. Nake Aburamu aaigua atĩ mũndũ ũcio wao nĩ mũtahe, akiumagara me na andũ ake arĩa megithĩtio mbaara, na nĩ arĩa maaciarĩirũo gwake, andũ magana matatũ na ikũmi na anana, magĩkĩrũmĩrĩra thũ icio na ihenya, magĩcikinyia o Dani.
• 15. Na rĩrĩ, we na atungati acio ake makĩamũkangana ũtukũ, magĩcihũra, magĩthingatana nacio, magĩcikinyia Hoba, itũũra rĩrĩa rĩĩ mwena wa ũmotho wa Dameski.
• 16. Agĩgĩcokithia indo ciothe, na mũndũ ũcio wao wetagwo Loti, na indo ciake, na andũ-a-nja, o na andũ arĩa angĩ.
• 17. Nake mũthamaki wa Sodomu agĩthiĩ kũmũthagania akiuma mũito-inĩ ũcio wa Kedorilaomeri na athamaki arĩa maarĩ nake, akĩmũtũnga gĩtuamba gĩa Shave (na nokĩo gĩĩtagwo Gĩtuamba kĩa Mũthamaki).
• 18. Nake Melikisedeki mũthamaki wa Salemu akĩruta mũgate na ndibei, o we mũthĩnjĩri-Ngai Mũrungu Ũrĩa-wĩ-Igũrũ-Mũno,
• 19. agĩkĩmũrathima, akiuga atĩrĩ, Aburamu arorathimwo nĩ Mũrungu Ũrĩa-wĩ-Igũrũ-Mũno, o we mwene igũrũ na thĩ;
• 20. ningĩ Mũrungu Ũrĩa-wĩ-Igũrũ-Mũno arogathwo, o we ũrĩa ũrekereirie thũ ciaku agacineana moko-inĩ maku. Nake Aburamu akĩmũgaĩra gĩcunjĩ gĩa ikũmi kĩa indo ciothe cia ndaho.
• 21. Ningĩ mũthamaki wa Sodomu akĩĩra Aburamu atĩrĩ, Niĩ nĩ’heo andũ, no indo-rĩ, wĩthiĩre nacio wee mwene.
• 22. Nake Aburamu akĩĩra mũthamaki ũcio wa Sodomu atĩrĩ, Jehova Mũrungu Ũrĩa-wĩ-Igũrũ-Mũno, o we mwene igũrũ na thĩ-rĩ, nĩndamuoeire guoko gwakwa na igũrũ, ngĩĩgirithia, ngiuga atĩrĩ,
• 23. Ndingĩthiĩ na kĩndũ o na kĩmwe gĩaku, o na kũngĩtuĩka no kauthi, o na kana karũkwa ga kĩratũ, nĩ getha ndũkanoige atĩrĩ, Niĩ nĩ niĩ ndongetie Aburamu.
• 24. Kĩndũ gĩakwa-rĩ, no kĩrĩa kĩrĩĩtwo nĩ aanake, na rũgai rũa andũ arĩa tũrathiĩte nao; Aneri na Eshikoli na Mamure-rĩ, acio nĩmagwate rũgai rũao.

Home